Levitikus Nuarin-tas alupas 19.
Nuarin-tas alupas 19.
1 Er aketo um asuptecnaig niji tas alep et acheiachei.
1IS tas a Ihova ehele Moses, um ika,
2Namu tas aiek ehele nup Isreel asega, um ika, Akumu upene aijaua: ek idim upene ainyak Ihova Atua unyimia.
3Akumu ecen vai rismia, im etmamia aijaua asega, um apos nadiat atumop unyak: ek Atua unyimia ainyak Ihova.
4Akumu jim ahidaig pan caua ehele ilpu atmas aijaua, um jim ago natmasimai hat imi caua: ek Atua unyimia ainyak Ihova.
5El eka ahlap aijaua an nitai ahlap naaurinig vai Ihova, akumu ahlap aijaua an liinmopomia upene.
6Uhmu caig an nadiat iyehki eka ahlap iran aijaua, im lep an tak apnyin: ja el et eled tah nuarin um yetpan an nadiat dirt, uhmu atnamud an cap.
7El eh caig an nadiat dirt, et idim has; inyi eti upene inliinmopoi Atua vaig.
8Etpu amen nedo has irai natimi inig et caig aien, et mun auahas nitai inig aien is itap vai Ihova: uhmu atipagki natimi inig ehele ilpu atimi o un.
9Aku wit ucsei itai ededel umamia aijaua, akumu jim ucsei ehni ira esvi vaig umamia aijaua, um jim asjapicnaig nohwai itai et etjo an nucsei vaig itai.
10Namu jim ecero aldei nohwai itai aiek an nokoro vaine unyum, um jim aldei nohwai vaine asega an nokoro vaine unyum; namu udei vai ilpu ihki atimi im ilpu atimi irai taka pece: ek Atua unyimia ainyak Ihova.
11Akumu jim ehnegitai aijaua, um jim ago nedo efaifa, um jim asan tas ahcil jipe ehelemia;
12um jim asan tas aktit, ahcil an nidak, um jim tup asaig nidai Atua unyimia: ek Ihova ainyak.
13Namu jim ehcerucai natimi eblaamnem unyum aiek, um jim atoraliak itai o un: etmu jim amen ehelum an nepig asega um yetpan an nuhialeg nimtan imi yin is ago nauritai unyum aien.
14Namu jim ahlaijai natimi ucjipines intikgan aiek, um jim ati nitai epihtau an nuhup u natimi apat nesganimtan, namu imtitai Atua unyum aiek: ek Ihova ainyak.
15Akumu jim ago nedo inig et eti atoh an tas alep unyimia aijaua, um jim aiheuc vai ilpu ihki atimi, um jim ecen vai ilpu atimi esjilid: ja namu tas alep atoh aiek vai natimi eblaamnem unyum.
16Namu jim atga jipe aiek et idivaig natimi hos tas ehele atimi: um jim atau um ika yi mas a natimi eblaamnem unyum: ek Ihova ainyak.
17Namu jim amcel vai etwam aiek an liinmopom: ja namu ated natimi eblaamnem unyum aiek, um jim asipiaig nedo has o un.
18Namu jim aru irai up uran pece unyum aiek, um jim atpaijinai ra, etmu aiyu inliinmopom aiek vai natimi eblaamnem unyum, et idivaig vai euc: ek Ihova ainyak.
19Akumu apos intas alep unyak aijaua. Etmu jim ahei jipe niji itai eklim edo irai pece acheiachei unyum: namu jim ahwaig upsi itai acheiachei umam aiek: um jim aso euc an napelumai er ahod irai ya alau irai siip im inya irai aijema.
20El et amen tah ehelen tah intakata, er ohuun yin, et aminjinai tah natamaig aien, eris eti auanimtan, um eti atcijai yin; uhmu aredei natamaig iyehki; eri eti atgei yin, vaig inig nikavaig, eris eti atcijai natahig iyehki.
21Etmu imiapan nitai ahlap va nedo ahnag o un a natamaig iyehki vai Ihova, u neucse neom er asjapicnaig o un, nikavaig, siip atamaig yi ethi nitai ahlap va nedo ahnag o un.
22Etmu asa nigpa a natimi ahlap irai siip atamaig nitai ahlap va nedo ahnag an nuhup u Ihova va nedo has is ago aien: ja eri eti aru iran va nedo has is ago aien.
23Aku wit apan aijaua an pece iyehki, um ahwaig niji obotpot auicai asega va nitai caig, akumu ika aijaua et idivaig nitai inig eh eti aperitome nohwai itai iran: inyi idivaig nitai inig eh eti aperitome vai caua irai mesese inyi eseij: uhmu jim caig.
24Ja inyi upene nohwai itai asega iran an mesese ford, va uhpu imiahpas Ihova.
25Etu wit yetpam inmesese fifd, akumu caig nohwan aijaua, va etpu ohwai itai vai caua: ek Atua unyimia ainyak Ihova.
26Akumu jim caig tah nitai aijaua et amen inja iran: um jim ago nedo vai ilpu atmas, um jim ago tah nedo apat.
27Akumu jim ucsei inhagamogid unyimia aijaua um jim auahas tah nuarin geijimia.
28Akumu jim atai nohumia aijaua vai ilpu atimi emesmas, um jim ati tah neuhri iramia aijaua: ek Ihova ainyak.
29Namu jim auahas inhalav atahig unyum aiek, um ika yi takata has aien; va eri jim ago ingeijid a nup uran pece, um lep ohua nedo has an pece.
30Akumu apos nadiat atumop unyak aijaua, um ago nedo ecen va neom itap unyak: ek Ihova ainyak.
31Akumu jim apan ehele ra sji igki aijaua era ahu intas ira ra a ilpu atmas, um jim ahilek ilpu atimi araces; va aki jim has aijaua vai ra: ek Atua unyimia ainyak Ihova.
32Namu atidai aiek an nuhup u natimi ahleuco, um ecen vai nesganimtai efatimi, um imiimtacimtac Atua unyum: ek Ihova ainyak.
33El et amen a natimi an taka pece ehelemia an pece unyimia, akumu jim auoh ohocred yin aijaua.
34Ja etmu idivaig tah eh apos yin iramia a natimi an taka pece, etmu aiyu inliinmopom aiek vai yin et idivaig naiyu u inliinmopom vai euc; akis idim ilpu atimi an taka pece aijaua an pece Ijipt: ek Atua unyimia ainyak Ihova.
35Akumu jim ago tah nedo acalacal an nalmaijidjid umyimia aijaua, etmu atoh nuarincai unyimia, im inhat, im nipjinitai, par asjaaicnaig itai iran.
36Etmu eteuc ehelemia niji itai asjaaicnaig atoh, im niji hat atoh, im niji ipjiitai atoh, nikavaig, ifa atoh, im hin atoh: ek Atua unyimia ainyak Ihova, kis iknipagki caua ainyak an pece Ijipt.
37Va nitai inigki akumu imiaiji intas asega unyak, im intas alep asega unyak aijaua, mika aki ago: ek Ihova ainyak.
Currently Selected:
Levitikus Nuarin-tas alupas 19.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)