Ilpu Atimi Tas Alep Nuarin-tas alupas 1.
Nuarin-tas alupas 1.
1 Niji auritai u ilpu mapoi Juta im ilpu mapoi Simeon. 4 Neruvaig atoh ira Atoni-bisek. 8 Eh atoraliak Jerusalem, 11 Et leh Aksa a Odniel ehgan va natoraliak Tibir vaig o un. 16 Era amen ehele ilpu mapoi Juta a ilpu mapoi Kinai. 17 Eh atoraliak Horma, im Cesa, im Askelon, im Ekron. 21 Niji auritai u ilpu mapoi Benjamin. 22 U ilpu mapoi Josef, era atoraliak Bedel ara. 30 U ilpu mapoi Sebulun. 31 U ilpu mapoi Eser. 33 U ilpu mapoi Naftalai. 34 U ilpu mapoi Tan.
1IS wat ti pan itac inmas u Josua, era ahodai Ihova a nup Isreel, um ika, Erupu uhup a di um aridjai, um ati nedoa vai cama, um aat irai up u Kenan?
2Is ika a Ihova, Erumu aridjai a ilpu mapoi Juta: ek mun idim atcijaig inpece irai ikmara ainyak.
3Eris ika a ilpu mapoi Juta ehele ilpu mapoi Simeon ilpu etwara, Akumu atau irama aijaua an nahaijin pece unyima, mika ti ehraati nedoa akaija vai nup u Kenan; ecrupu lep atau caua aijama an nahaijin pece unyimia. Eris ahced ra a ilpu mapoi Simeon.
4Eris aridjai a ilpu mapoi Juta; is atcijaig nup u Kenan im nup u Piris a Ihova irai ikmara: eris atgei atimi is ten dausant ara Bisek.
5Eris ecet Atoni-bisek ara Bisek: eris aat iran ara, eris lep atgei nup u Kenan im nup u Piris ara.
6Ja is aha a Atoni-bisek; eris lep apitac yin ara, um arop iran, um auud yi amud nupsikman inmeto is ero im nupseduon inmeto is ero.
7Is ika a Atoni-bisek, Eris asjapicnaig nitai caig incara ithan nitai hag unyak a ilpu atimarid is sevente, eris auud yi amud nupsikmam inmeto is ero im nupseduora inmeto is ero: et mun aru irak a Atua et idivaig nedo unyak. Eris imiapan yin Jerusalem ara, is mas eahki aien,
8Eris aat an maliyum Jerusalem a ilpu mapoi Juta, um atoraliak um atgei atimi iran an nedoa, um atnamud inmaliyum.
9Ja eris par apitac a ilpu mapoi Juta, um asuol, mika eri ati nedoa vai nup u Kenan iji ig eris amen an nedoon ara, im inuarin inig et ahes nuritoga iran, im niskanse.
10Eris apan a ilpu mapoi Juta, um aat irai up u Kenan iji ig eris amen Hibron ara: (is idai Hibron itu Kirjad-arba:) eris atgei Seseai ara, im Ahaiman, im Talmeai.
11Eris ahes eahki ara, um aat irai up u Tibir: is idai Tibir itu Kirjad-sifer:
12is ika a Keleb, Aien et aat irai Kirjad-sifer aien, um atoraliak, ekpu alupai yin Aksa inhalav atahig unyak ainyak ehgan.
13Is atoraliak a Odniel inhal u Kinas, etwai Keleb inharei: is alupai yin Aksa inhalav atahig o un aien ehgan.
14Is wat yetpan iran aien, is ika ehele Odniel aien, Etmu upene iram mika ki ugyi etmak ainyak vai inuarin nobohtan: is asuol irai togke o un aien; is ika ehelen a Keleb, Ak inhal unyak, na merit inhe aiek?
15Is ika ehelen aien, Alupai nyak tah naiheuc aiek: na mun alupai nyak inuarin nobohtan mese aiek; namu lep alupai nyak niji wai ahlau ohua jai aiek. Is alupai yin niji imtan wai jipagko im lep niji imtan wai sepamki a Keleb.
16Eris ahes an maliyum irai eaig a ilpu mapoi Hobab, nup u Kinai, natimi ehpan irai Moses, um ahced ilpu mapoi Juta an namasacen Juta, an nahaijin Erat inig et ahes nuritoga iran; eris apan ara um amen ehele atimi.
17Eris apan a ilpu mapoi Juta, um atau ilpu mapoi Simeon ilpu etwara, um atgei nup u Kenan iji ig eris amen Sifad ara, um auahas ehni. Eris anvi nidai inmaliyum iyehki par ika Horma.
18Eris atoraliak inmaliyum Cesa im niji uari pece iran a ilpu mapoi Juta, im inmaliyum Askelon im niji uari pece iran, im inmaliyum Ekron im niji uari pece iran.
19Is atau irai ilpu mapoi Juta a Ihova; eris ahlo pan nup urai edoon ara; ja eris eti apan ara mika eri ahlo pan nup urai iskanse, vaig inig nikavaig, is eteuc ira ra niji jariot aiurn.
20Eris alupai Keleb Hibron ara, is idivaig intas o Moses: is ahlo pan eahki ehtaij inhalav atamaig is eseij u Enak aien.
21Eris eti ahlo pan nup u Jibus iji ig eris amen Jerusalem ara a ilpu mapoi Benjamin; era amen Jerusalem a nup u Jibus ehele ilpu mapoi Benjamin um imihum pam an nopan inig.
22Eris aridjai a ilpu mapoi Josef, um aat irai up u Bedel: is atau ira ra a Ihova.
23Eris abra atimi a ilpu mapoi Josef mika eri ahilek inmaliyum Bedel ara. (Is idai inmaliyum iyehki itu Lus).
24Eris ecet natimi is ethi a ilpu atimi ahilek inpece is ahes inmaliyum aien, eris ika ehelen ara, Ecra ugyi euc aijama, mika an ehvaig cama nefalaig inig et yetpan anliin maliyum, ecrupu lep aiheuc vai euc aijama.
25Eris wat ehvaig ehele ra aien nefalaig iyehki is yetpan anliin maliyum, eris ati nedoa ara vai nup uran maliyum, um atgei ra; ja eris atcijaig natimi iyehki ara im nup u nimnim o un asega.
26Ja is apan a natimi iyehki an pece u nup u Hed, um actaig inmaliyum is ethi, um anvi nidan par ika Lus: nidan nigki um imihum pam an nopan inig.
27Eris eti ahlo pan nup u Bed-sian im niji maliyum haklin iran a ilpu mapoi Manasi, ka nup u Teanak im niji maliyum haklin iran, ka nup u Tor im niji maliyum haklin iran, ka nup u Ibleam im niji maliyum haklin iran, ka nup u Mecitto im niji maliyum haklin iran: ja eris imiisjis a nup u Kenan mika eri amen an pece iyehki ara.
28Ja eris wat emda a nup Isreel, eris ika ara eri alupai ra nimtan a nup u Kenan, jam eti ahlo pan ra.
29Eris eti ahlo pan nup u Kenan iji ig eris amen Ciser ara a ilpu mapoi Ifreem; ja eris amen Ciser ehele ra a nup u Kenan.
30Eris eti ahlo pan nup u Kitron a ilpu mapoi Sebulun, ka nup u Neehalol; ja eris amen ehele ra a nup u Kenan, um alupai ra nimtan.
31Eris eti ahlo pan nup Ako a ilpu mapoi Eser, ka nup u Saiton, ka nup Alab, ka nup Aksib, ka nup u Helba, ka nup Efik, ka nup u Rihob:
32ja eris amen a mapoi Eser ehele nup uran pece, nup u Kenan marom: eris eti ahlo pan ra ara.
33Eris eti ahlo pan nup u Bed-simes a ilpu mapoi Naftalai, ka nup u Bed-enad; ja eris amen ara ehele nup uran pece iyehki, nup u Kenan marom: ja eris apitac a nup u Bed-simes im nup u Bed-enad um alupai ra nimtan.
34Eris emda a nup Emor, um atapnes ilpu mapoi Tan an nedoon: eris idim ika ara eri jim asuol ara an niskanse:
35ja eris ika a nup Emor eri amen ara an nedoon Hires, im lep an maliyum Ajalon, im lep an maliyum Sealbim: ja eris par apitac a ilpu mapoi Josef, um esjilid ira ra, um ika eri alupai ra nimtan.
36Is ahes an nefalaig inig et yetpan Akrabim nehni inpece u nup Emor, is lep ahes an hehteuc iyehki um aridjipan.
Currently Selected:
Ilpu Atimi Tas Alep Nuarin-tas alupas 1.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)