Tyuteronome Nuarin-tas alupas 26.
Nuarin-tas alupas 26.
1 Intas asuptecnaig u natimi inig et ahlap an hupnai itai aien. 12 Intas alaigaheui o un et alupai nuarin tend, u itai o un aien irai yier dirt. 16 Intas etipup u Atua im ilpu atimi o un.
1Nau wit yetpan aiek an pece inig et alupai euc a Ihova Atua unyum, mika an leh aiek um ohuun, um amen iran;
2namu leh inhupnai itai asega an nobohtan aiek, et ededel an pece inig et alupai euc a Ihova Atua unyum, um atohwaig an cat, um apan an maliyum iyehki etpu aniv a Ihova Atua unyum par ati nidan eahki.
3Namu lep apan aiek ehele natimi ahlap an nopan iyehki, um ika ehelen, Ek asaig ehele Ihova ainyak Atua unyum an nadiat inigki, mika ek mun ham ainyak an pece inig is upyi asaig a Ihova ehele ilpu retpoija, mika etpu alupai caija aien.
4Etpu leh incat an nikmam a natimi ahlap, um atise an nuhup u natau u Ihova Atua unyum.
5Namu tas aiek an nuhup u Ihova Atua unyum, um ika, Is up u Siria a etpok, um ubutpotet u inmas o un, is asuol an pece Ijipt aien im lep natimi eris eti elpat, ja eris esjilid ara, um emda, um ahinag eahki:
6ja eris ago nedo ipjin vai cama a nup Ijipt, um ehcerucai cama, um atijai nauritai ehka irama:
7ecris wat ahlaig aijama vai euc, ak Ihova Atua u ilpu retpoma, as atahaijeg nohrama aiek, ak Ihova, um almoi nohocred unyima, im nauritai unyima, im nehcerucai cama:
8ja as iknipagi cama aiek, ak Ihova, an nikmam emda, im nikmam atgeig yi apidi, im lep irai iji itai eris imtitaig vaig, im niji itai asjaaicnaig, im niji itai imiali:
9as imiapam cama an nuarin inig aiek, um alupai cama inpece inig, inpece et ohua nidenided im hune iran.
10Ek mun imiapam inhupnai itai an pece, as alupai nyak aiek, ak Ihova. Namu ikni aiek an nuhup u Ihova Atua unyum, um atpuse an nuhup u Ihova Atua unyum:
11namu lep cediaig aiek, va niji itai upene asega is alupai euc a Ihova Atua unyum, im lep ra an nimnim unyum; aiek, im ilpu mapoi Livai, im nup urai taka uarin ehelemia.
12Namu lucsei nuarin tend aiek irai iji itai asega unyum an mesese dirt, inmesese iyehki marom eri lucsei nuarin tend irai iji itai ura, um alupai ilpu mapoi Livai, im nup urai taka uarin, im ilpu umnij, im ilpu takata eris emesmas a ilpu atamnyura, vai erupu hag ara an nimnim unyum, um geije;
13um asaig an nuhup u Ihova Atua unyum, Kis iknipagki niji itai itap an neom unyak ainyak, um lep alupai ilpu mapoi Livai, im nup urai taka uarin, im ilpu umnij, im ilpu takata eris emesmas a ilpu atamnyura, et idivaig intas alep asega unyum as asaig aiek: kis eti imipalea intas alep unyum ainyak, um eti ahnag iran:
14kis eti caig tah nitai itap ainyak an nohocred unyak, um eti leh tah nuarin vaig tah nitai has, um eti alupaig tah nuarin vai ilpu atimi emesmas: ja kis atahaijeg intas unyum ainyak, ak Ihova Atua unyak, um ago nedo asega inig as asaig ehelek aiek.
15Namu eas sepam aiek an nuarin amen upene unyum an nohatag, um asan tas acis yi alwai nup Isreel unyum, im lep inpece as alupai cama aiek, et idivaig as asaig ehele ilpu retpoma aiek, inpece et ohua nidenided im hune iran.
16Et mun asaig a Ihova Atua unyum an nadiat inigki, mika an imiaiji intas alep iji igki aiek, um ago nedo inigki: namu apos aiek, um ago an liinmopom asega, im lep an nemda asega unyum.
17Na mun asaig aiek an nadiat inigki mika et Atua unyum a Ihova, napu lep ahced nefalaig o un aiek, um apos intas o un im intas alep o un, um ago nedo o un, um atahaijeg nohran:
18et mun lep asaig a Ihova an nadiat, inigki mika eka ilpu atimi o un aijaua, et idivaig is upyi asaig ehelemia aien, va akupu apos intas alep asega o un aijaua.
19Um ati caua mika aki esjilid acen aijaua irai up urai iji pece asega is ago aien, va nimiahpas caua, im nidamia, im natimi alupas unyimia; um lep mika aki ilpu atimi upene u Ihova Atua unyimia aijaua, et idivaig is asaig aien.
Currently Selected:
Tyuteronome Nuarin-tas alupas 26.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)