Baloma 5

Kwoloka muli Nyambi

1Nohobene, mu kukulupila tunawaniwi kwinga bakwoloka kuli Nyambi, tuli na ku mwena na Nyambi kupitila muli Mwene wetu Yeshu Kilishitu. 2Kilishitu niye unatushinkwilili nzila ngayi na kukulupila tutambule nceshe eze Nyambi akupana nahiya, ndi tukwikala mumwazo, kami tuku wahilila mu kulumbeza kwa wuwahe wa Nyambi. 3Kaliha noho tuhu, ngoboni tuku wahilila mu makalikiza wetu. Ndaba tukulimuka ngayi makalikiza alongeshanga muntu lunzewe, 4lunzewe lwaletanga biheka byabiwahe, pe biya biheka byaletanga kulumbeza. 5Kulumbeza kuyenesha muntu kufwako, ndaba shishemo sha Nyambi shinapanzana mu mitima yetu na Moyo wa Kuyela ou wapanikiwile kukwetu.

6Ha shikati shiya Nyambi ahatile, oho etu twekalile mu wulube, Kilishitu wafwilile etu bakawubi. 7Ndaba shashikalu muntu kulihupwiza wumi wendi ngayi afwile muntu wakwoloka, hinge ndi uya akufwila mukakwoloka, shashikalu ngayi atupule wumi wendi. 8Ngoboni Nyambi unatumoneshe wunene wa shishemo shendi ndaba oho twengile bakawubi, Kilishitu watufwililile. 9Wuluno tunaolokeshiwi na mukeza wendi, kami ukatupulwisha ku wukali wa Nyambi. 10Etu twengile bakankole ba Nyambi, ngoboni lufu lwa Kilishitu luna tu bokeshe kuli Nyambi. Shinene wumi wendi niwo ukatupulwisha. 11Kaliha noho tuhu, ngoboni tuku wahilila kuli Nyambi kupitila muli Mwene wetu Yeshu Kilishitu, ou tunatambulu kulyambwilila nendi.

Andama na Kilishitu

12 # Shit 3:6. Wubi wezile mu kaye ndaba ya muntu umo, pe wubi unalete lufu. Nahiyo kami lufu lwapitile ku bantu nimwabo, ndaba nimwabo batendele wubi. 13Wubi wekalile mu kaye oho Nyambi shilolo apane ndayano, pe oho kwabulile ndayano, muntu kaliha bamulabilile wubi wendi. 14Ngoboni kutatika ku shikati sha Andama kukuma kuli Moshesha, lufu lwekalile na ngovu ha bantu nimwabo. Lufu lwekalile na ngovu na ku bantu batendele wubi wakubula kulifweka na wubi atendele Andama.

Andama wengile shifwekesha sha Yeshu ou atoyele Nyambi ngayi ukeza. 15Ngoboni tufwako kufwekesha shishemo sha Nyambi na wubi wa Andama. Bantu babengi bafwile ndaba ya wubi wa muntu umo, ngoboni nceshe za Nyambi na shishemo shendi, binahanya ku bantu babengi ndaba ya nceshe za muntu umo uya Yeshu Kilishitu. 16Kami hali kutapuluka hakati ka shishemo sha Nyambi na wubi wa muntu umo. Ndaba munyima ya wubi umo mwezile kuyatiwa kwa wubi. Ngoboni munyima ya wubi wawingi, munezi shishemo shinalete kwoloka. 17Ndaba ya wubi wa muntu umo, ngovu za lufu zekalile ha bantu nimwabo. Haya tukonkenu ebye atendele uya muntu umo, Yeshu Kilishitu byabinene kupitakana. Ndaba aba nimwabo ba kutambula nceshe zazingi za Nyambi na kwoloka kwa shishemo shendi, bakekala na wumi kupitila muli Yeshu Kilishitu.

18Nohobene, nehi wubi unalete kuyatiwa kwa bantu nimwabo nahiyo kami milimo ya kwoloka yinalete ku shoboloka kwa bantu nimwabo, kami yinabaletele wumi. 19Ngonehi bantu babengi bengile bakawubi, ndaba ya kubula kwombatala kwa muntu umo, nohobene bantu babengi kami bakwinga bakwoloka ndaba ya kwombatala kwa muntu umo.

20Nyambi wapanikile ndayano ngayi bantu balimuke kuhanya kwa wubi wabo. Ngoboni wubi oho wahanyine, nceshe za Nyambi zahanyine na kupitakana. 21Nehi wubi wekalile na ngovu ha lufu, nohobene, nceshe za Nyambi zili na ngovu za kwolokesha bantu, ngayi bekale na wumi wa mwaya myaka muli Yeshu Kilishitu Mwene wetu.

Currently Selected:

Baloma 5: LLK

Highlight

Compare

Copy