Baloma 4

Kuhembwiliza Abulahama

1Niho tukamba bishini bya tatiyetu Abulahama? Unawana bishini ku wuntu? 2Ndaba ndi Abulahama waolokeshiwile na milimo atendelenga, shinga uli na shuma sha kuliyemeza. Ngoboni ku meho a Nyambi wufwako kuliyemeza. 3#Shit 15:6; Nga 3:6. Ndaba kwatikitiwa ngayi, “Abulahama wakulupilile Nyambi ya Ngula, pe ndaba ya kukulupila, Nyambi ya Ngula wamutambwile kwinga wakulunga.” 4Muntu atenda milimo ukuhola. Kuhola kwamba tufwako ngayi nisho shishemo, ngoboni tukwamba biya muntu afwanini kuhola ku milimo anatende. 5Ngoboni wakubula kutenda milimo, a kukulupila tuhu Nyambi ou ukwolokesha bakawubi, kukulupila kwendi kukulabiwa ngayi wakwoloka. 6Ndavita wambile kami ngayi uli na mfuywezi muntu ou Nyambi aku mona ngayi wakwoloka kwakubula milimo. Ndavita wambile ngayi,

7 # Nyi 32:1-2. “Bali na mfuywezi aba Nyambi akuyatila milandu yabo,

aba wubi wabo unafwikiwi!

8Uli na mfuywezi muntu ou Nyambi ya Ngula a kubula ku labila wubi wendi.”

9Kati mfuywezi za bakamukanda tuhu ndi? Kati kaliha za bakakubula kuya ku mukanda kami ndi? Mfuywezi zabo kami nabo babula kuya ku mukanda, ndaba kwatikitiwa ngayi, “Abulahama wakulupilile Nyambi, pe ndaba ya kukulupila, Nyambi wamutambwile kwinga wakulunga.” 10Kati byatendiwile mutena ngani? Kati hinga aya ku mukanda ndi wufwako? Kaliha hinga aya ku mukanda, ngoboni oho shilolo ayeko. 11#Shit 17:10. Watambwile shilimukisho sha mukanda, shengile limango lya kwoloka kwa kukulupila ekalile nakwo oho shilolo aye ku mukanda. Ngayi Abulahama enge tata nimwabo bakakukulupila muli Nyambi, kami Nyambi unabatambulu ngayi bakulunga, hinge ndi banabulu kuya ku mukanda. 12Kami nengi tata nimwabo bakamukanda, kaliha bakamukanda tuhu, ngoboni nanaba bali na kwenda mu ntambo za kukulupila oku kwa tatiyetu Abulahama oku ekalile nakwo oho shilolo aye ku mukanda.

Bikulupisho bya Nyambi bikutambuliwa kupitila mu kukulupila

13 # Shit 17:4-6; 22:17-18; Nga 3:29. Abulahama na bazukulyendi batambwile kuli Nyambi shikulupisho sha kaye ngayi kakenga kabo. Watambwile shikulupisho eshe kaliha ndaba ya kulama ndayano, ngoboni ndaba ya kwoloka kwa kukulupila. 14#Nga 3:18. Ndaba shinga ebye a kulupishile Nyambi bikapanikiwa aba ba kulama ndayano, pe kukulupila kwa muntu kowa ebye shikutontoloka, kami na shikulupisho sha Nyambi, pe kuyavwa shifwako. 15Ndayano zikuleta wukali wa Nyambi, ndaba kwabula ndayano, kowa kukiluka ndayano kami.

16 # Nga 3:7. Nohobene, shikulupisho shezanga na kukulupila, ngayi shinge shishemo shikufuma kuli Nyambi, ngayi shikulupisho bakashitambule bana ba Abulahama, kaliha tuhu bayo ba kulama Ndayano za Moshesha, ngoboni ku baya nimwabo bakukulupila nehi Abulahama. Niye tatiyetu nimwetu. 17Nehi kwatikitiwa ngayi, “Nakwingi tata matunga.” Shikulupisho eshe Abulahama washitambwile kuli Nyambi ou akulupilile. Nyambi washangulanga bafu na kulenga byuma. 18#Shit 15:5. Nyambi wambile ngayi, “Banabobe bakavula.” Hinga ngayi ebye byengile bya kubula kulumbeza, Abulahama wakulupilile ngayi ukenga tata matunga. 19#Shit 17:17. Abulahama wekalile na myaka ya kushinga kukuma ku mwanda, kami wahanganikile ngayi lutu lwendi lwengile ngo lwa kufwa na mukazendi Shala kukekala na bana wufwako. 20Kaliha wekalile na nkani na shikulupisho sha Nyambi. Kukulupila kwendi kwamu shumankanishile kami wayemezele Nyambi. 21Hinga akulupila ngayi Nyambi ukatenda ebye a kulupishile, 22ndaba ya kukulupila, “Nyambi ya Ngula wamutambwile kwinga wakulunga.” 23Mazu atikitiwa ngayi, “Nyambi wamumonene ngayi wakwoloka,” kaliha atikitiwile kukwendi tuhu, 24ngoboni akwamba na kukwetu tukuwaniwa kwinga bakwoloka ndi tukukulupila muli Nyambi, ou washangwile Yeshu Mwene wetu ku bafu. 25#Isha 53:4-5. Yeshu wapanikiwile ngayi afwe ndaba ya wubi wetu, pe washangukile ku bafu ngayi twinge bakwoloka mumwendi.

Currently Selected:

Baloma 4: LLK

Highlight

Compare

Copy