Zincimpi 7
7
1Mwanami, yuvwilila kunebye nikwamba,
hinga uvulama ebye nikukutongweza.
2Lama mazu wami pe ukayoya,
ulame ku longesha kwami ngonehe walamanga wuheti wa ndando yayinene shikuma.
3Ayake mu mutima wobe bikati nimwabyo ngonehe kambalamunwe kobe,
pe atikite ha litapa lya ha mutima wobe.
4Wambe ku ngana ngayi, “uli mpanzami,”
kami toya ku yuvwishisha ngayi hilanyobe.
5Zikakulama kuli mukaza muntu wa wumambe,
naku nyambilo yendi ya kutekenyesha.
Bya Mukazi Walwiholwiho
6Mutena wamina napenzelele mu limpananga lya litala lyami,
ha munkanda,
7namonene bandumbana babengi bakuyeba,
mukati ka bandumbana
natosheleho ndumbana umo wakubula ngana.
8Wayilenga mu mukwakwa wa hahepi na noku ekala uya mbuyama walwiholwiho,
wendelenga mu nzila yikulumba ku litala lyendi.
9Ha shikati sha kulela kwa mutena,
ha kaboko bwii.
10Niho mu litala mwatutikile mbuyama na kumushimbawila,
wavwalile bivwalo ngonehe walwiholwiho, wengile walikeyelela.
11Ou mbuyama wengile tenkuma,
mukakuheheza lutu lwendi kami kaliha wekalishilenga ha litala lyendi.
12Aha ukuwaniwa mu mikwakwa,
aha ukuwaniwa mu myanya ya kulandishila,
wonzelanga kuholazama ku zinkomi nimwazo.
13Pe uya mbuyama wavumbatilile uya ndumbana naku mu zupeza,
na lupala lwa kubula lisheni wambile kukwendi ngayi,
14“Lelo ninakombelele nkombela,
ya kulilumikila haya nikutenda ebye nalibezele.
15Nohobene ninezi ngayi nilimone nobe,
nekalile naku ku shingashinga haya nakuwanakale.
16Nayala wulili wami,
na makwiza a mishombela amawahe akulelema aku Engepita.
17Namyanzili ha wulili wami na lukumba lwa kunuka shiwahe,
lwa miila na lilambwe na shinamoni.
18Yeka, haya twikale hamo wushiku nimwawo,
tulitekenyeshe na kulihaka.
19Mukokwami kowa ku litala,
unayi mukala wawutali.
20Unashimbi mali amengi mushikwama,
pe ukaboka munyima ya zishunda zibili.”
21Nohobene uya mbuyama wabengezekele uya ndumbana,
kami wamutweshele na mazu akumutekenyesha.
22Hohobene wakonkele uya mbuyama,
ngonehe ngombe ukuya mu kuzihiwa,
hinge ngonehe lusha wunafu mu linkambwila,
23kukuma ha kuyahiwa muvwi ku litima.
Ndumbana nafweke ngonehe kayoni kakwitukila mu kapeto,
kubula kulimuka ngayi ukaleyekamo wumi wendi.
24Haya, enu bana bami yuvwililenu,
tengekenu matu wenu kunebye nikwamba.
25Hinga mwitabila mbuyama wanoho ngayi amitengulule ku zinzila zendi,
hinga mu konkezeka.
26Ndaba ou mbuyama unapukalishi balume bangovu,
kami naleyekemo bantu babengi shikuma.
27Litala lyendi unengi mukwakwa,
uku kunkulukila ku kalunga ka bafu.
Currently Selected:
Zincimpi 7: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.