Zincimpi 6
6
Mazu Amina Akushiwulula
1Mwanami, hinge ndi wakulupishile kwimanina mukuli wa muntu wamina,
ou una kwanga kuyumba mukuli wendi.
2Niho unafumo mukapeto,
ka bikulupisho byobe.
3Mwanami, ndi unatende noho,
pe uli mu maboko a uya ndambo yobe, haya tenda ebye, ngayi ulishobolemo.
Yanga kukwendi, lishishe na kulomba ngayi akuyatile.
4Unafwanini kutenda ebye shilolokale
ulale hinge kuya mutulo.
5Lilamwine obemwine, ngonehe kayoni ka kutina mukakubebula,
hinge ngonehe kapunza ukutina shibinda.
6Obe muvwa, hanganika nyinkalo ya mashenze,
ngayi ulilongesheho mwanga wikale na ngana.
7Niwo kaliha ekala na mwene,
hinge ntwamina, hinge kalela,
8ngoboni akungulanga byakulya ha shikati sha kuteza,
kuliwahishila byakulya bya mayinza.
9Ukalangana shikati sha kukuma hati obe muvwa?
Kati ukapinduka shikati ngani mutulo?
10 #
Zinc 24:33-34. Ukwamba ngayi, “Nishulubaleko taha,
nikatulukeko shashishe.”
11Oho muvwa ashili kulangana, wuncepwe ukamushintikiza,
ngonehe mwizi uli na bilwisho.
12Shileya, hinge muntu wakuluwa
wakulankanyanga haya na kwamba mazu a mahalo.
13Wanyantizanga na meho na kuhobweza na mawulu,
na kulabiza na minwe.
14Bikati nimwabyo ukuyongola kutenda byabibi,
mukakuleta mishunga nimwako oku akuya.
15Nohobene, malwa akamushintikiza,
pe wanguwangu ukaloba, kami wufwako kukamoneka.
16Kwekala byuma mutanu na shimo ebye Nyambi azimba,
hinge mutanu na bibili byenga bya wunyengwe kukwendi.
17Wazimba muntu wakuliyemeza, muntu wa mahalo,
kuziha muntu wakubula mulandu,
18mutima wabihanganiko byabibi,
muntu ukwitukila mukutenda byabibi.
19Muntu ukupaka mahalo,
na muntu ukuleta mushunga mukati ka bawushinda wendi.
Mazu Akukanisha habya Wumambe
20Mwanami, lama mazu a tatiyobe,
kami hinga ukana ebye mandiyobe akukulongesha.
21Lama awa mazu shikati nimwasho,
amangilile mu ncingo yobe.
22Oho ukwenda aka kutwaminina,
oho ukulangana aka kulama, oho ukupinduka aka kwambila.
23Ndaba mazu enga lumuni, na bilongesha byenga liyeye.
Pe kami mazu akushiwulula muntu, enga nzila ya wumi.
24Aka kulamwina kuli mbuyama walwiholwiho,
naku mazu akwongeza, a mukaza minobe.
25Hinga ulishoza ha wuwahe wendi,
hinga ukokiwa na meho wendi.
26Ndaba mbuyama walwiholwiho,
mulume ukutwesha kutenda nendi wumambe ha ndando ya linkende.
Ngoboni kutenda wumambe na mukaza muntu,
ukutwesha kulobesha wumi wobe.
27Kati muntu ukutwesha kushimba mundilo,
ha kapumpo ha bivwalo byendi, na kubula kuhoka ndi?
28Kati muntu ukutwesha kwenda ha mashanga a mundilo
na kubula kuhoka mu mawulu ndi?
29Nohobene, nimwendi ukutenda wumambe na mukaza muntu,
unafwanini ku shushuliwa.
30Bantu kaliha bahandulanga mwizi,
uya ukuyiba na kulya oho ndi uli na nzala.
31Ngoboni ndi unakwatiwi,#6:31 Unakwatiwi:Hinge ndi libuka lifwako kwamba oku mwizi akukwatiwa, mu shihemwa shetu, muntu ndi nakwatiwi halya makamba mu mfuba ya muntu wamina kowa wukalu, ngoboni ndi ba kumuwana ha munkanda wa mfuba na shaka hinge mpamba ya makamba pe himwizi nafwanini kuyumba. ayumbe uya mulandu bikati mutanu na bibili,
pe bakamuyangula byuma byendi nimwabyo bya mu litala.
32Muntu nimwendi ukutenda wumambe wufwazo ngana,
uli na kulilobesha niyemwine.
33Muntu wanoho walifumishanga maleema.
Kami lisheni kaliha likamumana.
34Ndaba mwine mukazi lihungu lya koleshanga shikuma,
pe kutwesha kuyuvwila nceshe uya unamubipishili wufwako.
35Kukatambula ebye bakamuyumbila wufwako,
kowa ndando yiya yikutwesha kumanisha kupilama kwendi.
Currently Selected:
Zincimpi 6: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.