Zincimpi 3
3
Kulongesha Batwanuke
1Mwanami, hinga uvulama ebye nikuku longesha,
ngoboni ulame mazu wami bikati nimwabyo.
2Ndaba, ndi ukutenda noho, bikakuyavwa kuyoya myaka yayingi,
bikakuletesha kuyoya mu ku mwena.
3Hinga witabila ngayi shishemo na kwoloka bifume kukwobe.
Likolekebyo mu ncingo na kubitikita ha litapa lya mu mutima wobe.
4Ndi ukutenda noho,
Nyambi na bantu bakakuyemeza pe ukekala na lizina lyaliwahe.
5Kukulupila muli Nyambi ya Ngula na mutima wobe nimwawo,
pe hinga uzengamina ku bihanganiko byobe.
6Bikati nimwabyo anuka Nyambi ya Ngula,
pe ukakutwaminina mu nzila ya kupwisha.
7Hinga ulimona ngana obemwine,
yuvwila Nyambi ya Ngula bowa na kukana wubi.
8Nohobene, lutu lwobe lukekala shiwahe,
namu bifupa byobe mukekala minconco.
9Lemeeka Nyambi ya Ngula na wuheti wobe,
hamo na mbuto yobe ya kutatika kuteza.
10Pe bishete byobe bikenzala nimwabyo,
na bizongelo byenu bikahumpoka, na waine
11Mwanami, hinga upilama oho Nyambi ya Ngula akukushuza,
hinge kukana ebye akukwambila.
12Ndaba Nyambi wa shuzanga baya ahaka,
ngonehe hemi ya muntu ashinga mwanendi ou wa mu wahililishanga.
13Uli na mfuywezi muntu uya ukuwana ngana,
uya ukushinga ku yuvwishisha.
14Ndaba ndando ya ngana, yinapitakana ndando ya shiliva,
ngana zenga za kuyavwa shikuma kupitakana ngolinde.
15Ngana zaziwahe shikuma kupitakana mamanya a kulelema,
a ndando yayinene, nimwabyo ebye wahaka,
kutwesha kulyezeka na ngana bifwako.
16Ngana zikuyoyesha myaka yayingi,
zekala mu liboko lyazo za shilyo,
kami wuheti na maleema byekala mu liboko zalyo, lya shimoho.
17Ngana zikutwesha kukuwahililisha mu kuyoya kwobe,
kami zinzila zobe nimwazo zenga za ku mwena.
18Ngana zenga ngonehe mutondo wawumi ku nimwabo ba kuzizundamina,
uli na mfuywezi muntu nimwendi ukuzibumbatila.
19Nyambi ya Ngula na ngana zendi walengele kaye,
na ku yuvwishisha kwendi walengele mayilu.
20Na ngana zendi, waholwele mampunga,
pe makumbi alokeshele mvula.
21Mwanami, lama eze ngana,
hinga witabila ngayi zifume mumwobe.
22Zikenga wumi wa moyo wobe,
na mukali wa nceshe mu ncingo yobe.
23Pe ukenda shiwahe mu nzila,
kukalituntula wufwako.
24Oho ukalangana kukayuvwa bowa wufwako,
kami ukalala mutulo twatuwahe.
25Hinga ukalikekula oho makalikiza akakubazumuna,
hinge nkuli yikalobesha bakuluwa.
26Ndaba Nyambi ya Ngula ukakulama,
afwako kuka kuleha ngayi wuwile mu linkwina.
27Hinga uleha kutenda wuwahe,
kunobo bashinga kubatendela wuwahe,
oho bili mu ngovu zobe za kutenda noho.
28Hinga wamba ku nowo wazika nendi hamo ngayi,
“Boka taha, nzona wakeza niho nikakupanike,”
oho shuma akushinga hinga wekala nasho.
29Hinga uhanganika kutenda byabibi ku muntu wazika nendi,
ou wekala nendi shiwahe kami wakukulupila.
30Hinga ulikanangana na muntu oho kunabulu shuma shinatendiwi,
ndi niye kukubipishila afwako.
31Hinga ulishozela muntu wa mangunga,
hinge kutenda ebye atendanga.
32Ndaba Nyambi ya Ngula wazimba mukakutenda byabibi,
ngoboni wahaka muntu wakwoloka.
33Shikuto sha Nyambi ya Ngula,
shekala mu litala lya muntu wakuluwa,
ngoboni wafuywelanga minzi ya bakulunga.
34Nyambi ya Ngula wahepanga bakakukendula baminabo,
ngoboni wawahililanga na bakakulilimbwilisha.
35Bakangana ba kuwana maleema,
ngoboni bakuyeba bakayuvwa lisheni.
Currently Selected:
Zincimpi 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.