Zincimpi 4
4
Zincuungu Zawaniwanga mu Ngana
1Bana bami, yuvwililenu ebye tatiyenu akumilongesha,
yuvwililenu shiwahe ngayi mwanga muyuvwishishe.
2Ndaba nikumilongesha byabiwahe,
hinga muvulama ku longesha kwami.
3Oho nekalile na batate,
nishili ndumbana wamushe,
hinga nenga mwana umo wakuyamiziziwa kuli bamawa,
4batate bandongeshelenga ngayi,
“Ombatala mazu wami na mutima wobe nimwawo,
lama ndayano zami ngayi mwanga uyoye.
5Hinga uvulama hinge kufutamina mazu wami,
yikala na ngana na ku yuvwishisha byuma.
6Hinga ukana ngana zikakulama.
Zihake, pe zikakukobelela.
7Kwikala na ngana, shinengi shuma shashinene unafwanini,
kukobelela ku byuma nimwabyo ukwikala nabyo,
yikala na ku yuvwishisha byuma.
8Haka ngana, pe zikakutangamisha.
Zibumbatile pe zikakwingisha wa maleema.
9Ngana zikakuvwika munana ku mutwe,
kami unengi munana wawuwahe.”
10Mwanami, yuvwilila ebye nikwamba, tambula mazu wami,
ngayi mwanga uyoye myaka yayingi.
11Nakulongeshe zinzila za ngana,
ninakutwaminini mu zinzila za kwoloka.
12Kowa ebye bikakiyama mu zintambo zobe.
Hinge ndi ukwituka, kukalituntula wufwako.
13Anuka ebye banakulongeshe shikati nimwasho,
zilame shiwahe ndaba nizo wumi wobe.
14Hinga wenda mu zinzila za bakakuluwa,
kami hinga utenda biya ba kutenda.
15Benguka ku bya noho, hinga uhenyena ku byabibi,
fumako yanga mu nzila yobe.
16Bantu bakuluwa, kutwesha kulangana bafwako,
hantu banatende shuma sha shibi ku muntu wamina.
Bakushelengela wushiku nimwawo na kubula kulangana,
hantu banakoleshe muntu umo.
17Ndaba kutenda byabibi nibyo byakulya byabo,
kami mushunga nibyo bya kunwa byabo.
18Ngoboni zinzila za bantu bakulunga,
zikufweka ngonehe kubelangana kwa lumenemene,
oku kwahololanga liyeye lya mutena kutwala ha mutena muyilu.
19Nzila ya bakuluwa, ya ku shipa ngonehe mincimpwe.
Oho bapukalanga, kaliha balimukanga eshe shinabapukalishi.
20Mwanami, yuvwishisha mazu wami,
bengwila matu wobe kunebye nikwamba.
21Hinga witabila ngayi awa mazu,
afume kukwobe, anukenga na kuwalama mu mutima wobe.
22Mazu awa apanikanga wumi,
na kunyongomanisha muntu nimwendi ukuwayuvwishisha.
23Lama mutima wobe,
ndaba niwo wenga kaheloke ka wumi wobe.
24Hinga wamba mahalo,
hinge kwamba mazu a kuluwisha.
25Meho apenze kumbili aha unalulumana,
hinga ulishetoka shetoka.
26 #
Bah 12:13. Enda na kukeya mu nzila ya kwoloka,
pe ebye nimwabyo ukatenda bikalubuluka.
27Hinga ushanukila ku shilyo hinge ku shimoho,
fuma ku byabibi nimwabyo.
Currently Selected:
Zincimpi 4: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.