Zincimpi 2
2
Ncuungu ya Ngana
1Mwanami, lilongeshe ebye nikukutongweza,
lama mazu wami.
2Tengekela matu wobe kubya ngana,
twalako mutima na ku yuvwishisha.
3Mwa shikuma, lomba ngana,
lambilila kulimuka byuma.
4Shingashinga ngana ngonehe shiliva,
na kubifwatula ngonehe wuheti wakuholama.
5Ukalimuka kuyuvwila Nyambi ya Ngula bowa,
kami ukawana ngana za kulimuka Nyambi.
6Ndaba Nyambi ya Ngula wapanikanga ngana,
pe mukanwa kendi mwafumanga kalimukisho na ku yuvwishisha.
7Waholwelanga ngana ku bakakulunga,
niye likebo lya bakakwoloka.
8Walamanga zinzila za bantu ba kupwisha,
na kulama zinzila za bakakwoloka.
9Nohobene ndi ukunyuvwilila, pe ukalimuka byakwoloka na bya kupwisha, na byabiwahe.
Kami ukalimuka ebye unafwanini kutenda.
10Ukekala na ngana,
kami kalimukisho kakakuwahililisha.
11Ngana na ku yuvwishisha kwa byuma kuka kulama.
12Ngana zikakulamwina ku zinzila za bakakuluwa,
naku bantu ba mahalo,
13na bakakufuma mu zinzila za kwoloka,
na kwenda mu zinzila za mincimpwe.
14Aba ba ku wahilila mukutenda wubi,
ba kutangalala mu byuma byabibi.
15Zinzila zabo za kuluwa,
nantendelo yabo ya mazilo.
16Ngana zikakubengula kuli mbuyama walwiholwiho,
oho akezeka kukubengezeka na mazu amawahe.
17Mukazi wakubula kukulupiliwa kuli mukokwendi,
navulama kulimama alimamine na mukokwendi kumbili ya Nyambi, ha mutena baliyekele.
18Ndaba ndi ukuya ku litala lyendi,
ukulitwala ku lufu ndi ukumukonka, ukulitwala ku kalunga ka bafu.
19Kowa ukuya kukwendi,
ukutwesha kuboka na wumi.
20Nohobene, enda mu zinzila za bantu ba kupwisha,
na kwenda mu zinzila za bakakwoloka.
21Ndaba bantu ba kupwisha,
bakubula shihepwa bakekala mu litunga lino.
22Ngoboni bakakuluwa,
bakafumishiwa mu litunga na bakawubi bakalobeshiwa.
Currently Selected:
Zincimpi 2: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.