Zincimpi 13
13
1Mwana wangana wayuvwanga ebye akumutongweza tatiyendi,
ngoboni wa wuncengwe kaliha wayuvwanga ebye a kumwambila.
2Muntu wa muwahe walyanga byabiwahe ku mikabo yaku kanwa kendi,
ngoboni bihanganiko bya wa mahalo byaletanga mushunga.
3Ou ukulama kanwa kendi ukukoweza wumi wendi,
ngoboni ou ukwamba na kulokomoka ukaloba.
4Muvwa walishozanga, kami kowa ebye awananga,
ngoboni muntu wakukalamana wawananga byabingi.
5Wakulunga wazimba bya mahalo,
ngoboni wakuluwa watendanga bya kuleta lisheni na ku shampuliwa.
6Kulunga kwalamanga uya ukwenda mu nzila ya kupwisha,
ngoboni wubi walobeshanga wakuluwa.
7Muntu umo ukulingisha ngo wakuheta, kati wabulanga nihani.
Wamina ukulingisha ngo ncepwe, kati uli na wuheti wawingi.
8Muntu wakuheta ukutwesha kukuliza wumi wendi,
ngoboni ncepwe kutwesha kulilamwina wufwako.
9Liyeye lya wakulunga lya banganga shikuma,
ngoboni lumuni lwa wakuluwa lwazimanga.
10Kuliyemeza kwaletanga mangunga,
ngoboni ngana zili kukwabo bakwitabila ku batengulula.
11Wuheti wakuwana mu nzila ya mahalo, ukupanzana kanikani,
ngoboni ou ukutolatola kanikani ukekala na byabingi.
12Kulumbeza shuma sha kubula ku mona sha koleshanga ku mutima,
ngoboni eshe alishozanga ndi shinawaniwi shinengi mutondo wa wumi.
13Ou ukulimbulula lizu ukuliletela kunonga hahendi niyemwine,
ngoboni ou ukutina ndayano ukapanikiwa ncuungu.
14Bilongesha bya muntu wangana byenga kaheloke ka wumi,
byafumishanga muntu mu lunyimbwa lwa lufu.
15Muntu waku yuvwishisha wayemeziwanga,
ngoboni nzila ya bantu bakuluwa yinengi kuloba kwabo.
16Mu byuma nimwabyo muntu wangana watendanga na kalimukisho,
ngoboni shileya wahololanga bya wuleya.
17Ntumwana wakuluwa waletanga wukalu,
ngoboni uya wa kupwisha waletanga ku nyongomana.
18Wuncempwe na ku shampuliwa byezanga ku muntu ukulimbulula ku longesha,
ngoboni ou ukwitabila kumutengulula ukalemeekiwa.
19Kuwana shiya walishozanga shikuleta wuwahe mu mutima,
ngoboni bileya bya kananga kufuma ku byabibi.
20Ou ukutenda wuhoni na bantu bangana ukafutuka wangana,
ngoboni muka kulilama na bileya ukayanda.
21Kutamwa kwa konka bababi,
ngoboni bya kutangamisha bikuya ku wakulunga.
22Muntu wamuwahe washiyanga likona ku bazukulyendi,
ngoboni wuheti wa mukawubi bakawushimba kuli ba kupwisha.
23Mfuba ya wakuyanda yayimanga byakulya byabingi,
ngoboni bakubula kupwisha babipanzanishanga.
24Ou ukubula kuzipola mwanendi lunyanzi ndi unabipishi wamu zimba,
ngoboni ou wamuhaka ukumukeyesha na kumuzipola.
25Wakulunga ukulya na kwikuta shikuma,
ngoboni mavumo a bakuluwa akakefwangila na nzala.
Libuka Lya Kuyela © Bible Society of Zambia, 2020.