Zincimpi 12
12
1Nimwendi wahaka ku shuziwa oho na bipishi wenga wangana,
ngoboni ou wazimba ku shiwululiwa wenga wakuyeba.
2Muntu wamuwahe wa wananga kuyamiziziwa kuli Nyambi ya Ngula,
ngoboni muntu wa biyongola byabibi ukawana mulandu.
3Muntu wufwako kutwesha ku shumishiwa na kutenda bya kuluwa,
ngoboni wakulunga wenga wakushuma ngonehe mutondo uli na mipishi yawo.
4Mukazi uli shiwahe wenga munana wa mukokwendi,
ngoboni mukazi ukuleta lisheni nafweke ngo wulweli ukubolesha bifupa byendi.
5Bihanganiko bya wakulunga byenga bya kupwisha,
ngoboni kubela kwa wakuluwa kwenga kwa kwongeza.
6Mazu a wakuluwa a belamina kuyita mukeza,
ngoboni kanwa ka wakulunga ka ku balamwina.
7Bakuluwa bakafumishiwa pe kukamoneka bafwako,
ngoboni litala lya wakulunga likemana.
8Muntu ukuyemeziwa ku ngana zendi zaziwahe,
ngoboni muntu wa mutima wakutengama ukashampuliwa.
9Shashiwahe ku muntu ou ukulishepesha, ngoboni haliwanina byendi,
kupitakana uli na mpupo ngoboni afwabyo byakulya.
10Muntu wakulunga ukalifulankana ha wumi wa shimuna shendi,
ngoboni nceshe za wakuluwa zenga za nguma.
11Ou ukulima mfuba yendi ukekala na byakulya byabingi,
ngoboni unengi wuleya Kubipisha shikati ha byuma byowa.
12Bakuluwa balishozanga lipuku lya bantu bababi,
ngoboni bakulunga benga ngo mitondo ya kuyima mikabo.
13Muntu wamubi walimanyikanga na bya kutengama bya mu kanwa kendi,
ngoboni wakulunga walifumishanga niye mwine mu wukalu.
14Muntu wekutanga byabiwahe ku mazu akufuma mu kanwa kendi,
kami mulimo wa maboko a muntu wabokanga kukwendi.
15Nzila ya shileya yenga yayiwahe ku meho wendi niyemwine,
ngoboni wangana wayuvwanga ebye ba kumubela.
16Shileya ndi napilama ukulimukiwa shawangu,
ngoboni muntu wangana walimbululanga bya matuka.
17Ou ukwamba bya kupwisha wahololanga wupaki wawuwahe,
ngoboni paki wa mahalo wambanga bya kwongeza.
18Kwali wambanga mazu a kulokomoka alemekanga ngo mpoko ya mukwale,
ngoboni lulimi lwa wangana lukutulisha mutima.
19Mivumbo ya kupwisha yikekala mwaya myaka,
ngoboni lulimi lwa kwongeza lwekalanga tuhu shikati shashishe.
20Kwongeza kuli mu mitima ya nobo ba kuyongola byabibi,
ngoboni obo bafunga byabiwahe bali na ku wahilila.
21Makando kukawila wakulunga afwako,
ngoboni bakuluwa benzala na byabikalu.
22Mivumbo ya kwongeza yinengi ya wunyengwe kuli Nyambi ya Ngula,
ngoboni bakulunga ba kumuwahililisha.
23Muntu wa kukeya ukulama kalimukisho,
ngoboni bileya babilikanga bya wuleya.
24Liboko lya wakukalamana likalela,
ngoboni liya lya wuvwa likayakiwa ku wulungo.
25Mahanganiko amu mutima wa muntu amuletelanga kuhomba,
ngoboni lizu lyaliwahe lya mutangalishanga.
26Muntu wakulunga wenga mwanza ku bahoni bendi,
ngoboni nzila ya muntu wakuluwa yikubayongesha.
27Muvwa kutwesha wufwako kuwana ebye akushinga,
ngoboni waku kalamana wukawana wuheti wawunene.
28Mu nzila ya kulunga mwekala wumi,
iya nzila kutwaminina ku lufu yifwako.
Libuka Lya Kuyela © Bible Society of Zambia, 2020.