Kulaba 8
8
Bya mimuni
1Nyambi ya Ngula wambile kuli Moshesha ngayi, 2“Tongweza Aloni oho akuyaka zimuni mutanu na zibili ha lyeyeko lya zimuni, uku fwanina kuzimunika ngayi mwanga zitweshe ku monesha liyeye kumbili.” 3Aloni wombatalile, pe wayakile mimuni ha lyeyeko ngayi zitweshe ku monesha liyeye kumbili. Ngonehe Nyambi atongwezele Moshesha. 4Kufuma hayilu kutwala ku nceto, lyeyeko lyatendiwile ha ngolinde wakufula na shikoma, ngonehe shifwanikizo shiya Nyambi ya Ngula amoneshele Moshesha.
Kuyeleshiwa na kufunguliwa kwa Balevi
5Nyambi ya Ngula wambile kuli Moshesha ngayi, 6“Utapulule Balevi ku bantu nimwabo ba Ishalela, pe ubayeleshe. 7Mu nzila eye, bamyanzile na mema a kuyeleshesha, pe bashehe zinyutu zabo nimwazo na kuyowesha bivwalo byabo ngayi bakenge ba kuyela. 8Niho bakashimba mwana nkunzi na ntupu ya mpeka yashingiwanga ya muhunga wakuvuba na mazi a olive, kami mukashimba nkunzi wawubili wa ntupu ya ha wubi. 9Niho, mukungule shikungulukilo nimwasho sha ba Ishalela, pe wimike Balevi kumbili ya ntanda yaku meho wami. 10Bantu ba Ishalela bakakambika maboko wabo ha mitwe ya Balevi, 11niho boni Aloni ukafungwila Balevi kukwami kwinga nkombela yakuyengayengesha yaku Baishalela, ngayi mwanga bakatende mulimo wami. 12Balevi bakakambika maboko wabo ha mitwe ya bankunzi babili, umo ukwinga wakupanikiwa kwinga ntupu ya ha wubi na wamina ukwinga nkombela yakuhokesha, ngayi mwanga kutendiwe shimbo sha kwambwililisha Balevi.
13“Mfungwile Balevi, kami yimika Aloni na bana bendi ngayi babatwamininenga. Balevi bakwinga nkombela yakuyengayengesha kukwami. 14Eye niyo nzila ukatapulule Balevi ku Baishalela nimwabo, nohobene ngayi mwanga bakenge bami.
15“Kunyima yakubayelesha na kubafungula balevi, kwinga nkombela yakuyengayengesha, nihoboni bakenge bakakutwesha kutenda mulimo mu ntanda ya shikungulukilo. 16Na yakamo Balevi mu mwanya wa bana ba bamyeli babalume nimwabo ba Baishalela, pe bakenga bami. 17#Kut 13:2.Oho nazihile bamyeli nimwabo mu Engepita nazilikile mwana wa mweli wa lupashi lwa Kaishalela na Kaishalela, shimuna na shimuna wakutatika kuhemuwa ukwinga wami. 18Haya nili na kushimba Balevi mu mwanya wa bamyeli nimwabo ba Baishalela, 19kami nili na kubapanika kuli Aloni naku bana bendi kwinga shishemo sha Baishalela, kutendela milimo bantu ba Ishalela mu ntanda ya shikungulukilo, kutenda shimbo sha kulyambwililisha sha kukoweza Baishalela ku makando aya akushinga kubezilila, ndi bakahenyena kwakwipi shikuma na mwanya wakuzila.”
20Nohobene Moshesha na Aloni na bantu nimwabo ba Ishalela bafungwile Balevi, ngonehe Nyambi ya Ngula atongwezele Moshesha. 21Balevi baliyeleshele nibo bamwine, pe bayoweshele bivwalo byabo, pe Aloni wabafungwile kwinga nkombela yakuyengayengesha kuli Nyambi ya Ngula Kami watendele shimbo sha kulyambwililisha kwabo. 22Bantu batendelele byuma nimwabyo biya Nyambi ya Ngula atongwezele Moshesha. Balevi batatikile kutenda milimo mu ntanda ya shikungulukilo, kumbili ya Aloni na bana bendi.
23Nyambi ya Ngula wambile kuli Moshesha ngayi, 24“Ku balika ku myaka 25, Kalevi nimwendi ukabalika kutenda milimo yendi mu ntanda ya shikungulukilo, 25pe kukuma ku myaka makumi mutanu ukaleha. 26Ku balika haya ukayavwa baminendi Balevi mukutenda milimo mu ntanda ya shikungulukilo, ngoboni ku fwanina kutenda milimo ninkayendi ufwako. Eshe nisho ukemika ndayano za milimo ya Balevi.”
Currently Selected:
Kulaba 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.