Nahumi 3
3
1Makando ku lukena lu kuyita mukeza,
mwenzala mahalo na wizi,
kuleha lipuku bafwako.
2Kuvuma kwa zinyanzi,
na miyoyo ya mawili,
naku wuluta kwa bambishi,
na kukokola kwa makoloyi.
3Bambishi bakuya na lukuwa,
mikwale yikubesha na milinga yikubyazima,
bantu banazihiwi,
mituntu yina bungana.
Bantu ba kulituntula ha mituntu.
4Nimwabyo binezi, ndaba ya lwiholwiho lwa kubula kumana.
Wunjenge na manga amabi,
bikubeba matunga a bantu ndaba ya lwiholwiho,
na bantu na wulozi wendi.
5Nyambi wa Makunge ukwamba ngayi,
mona, nika kushushula obe Neniva,
kami nikayepula shivwalo shobe na ku kufwikasho ku mutwe,
pe nika lehelela matunga nimwawo ku shembuka lutu lwobe,
na ku monesha muhelengwa wobe ku wene nimwawo.
6Nikakulambalamba mazilo,
kami nika kuhandula na ku kuyaka ha kayelele,
ngayi bantu ba kukomokenga.
7Pe nimwabo baka ku mona bakakutina na kwamba ngayi,
Neniva nalobo, yani eze akamulile?
Kuti oku eze nikashingile bakakumubengezeka?
8Kati obe Neniva, ukupitakana lukena lwa Tembeshi
luyo lwekala ha mushinzi wa Nayilo,
lwazingulukiwa na mema ndi?
Mushinzi wa Nayilo wengile shipata shendi,
pe mema engile Kembi kendi.
9Litunga lya Etopya na Engepita niho hemana ngovu zendi,
Puta na Limbiya engile matunga amo amuyavwilenga.
10Ngoboni Tembeshi bamukwatile na kumutwala mu wuntapwa,
bana bendi babashebashe babancancwelele mu mukwakwa.
Babilolo bendi baba kuninine nyela,
pe bantu bendi babalemu nimwabo bamangiwile na mawenge.
11Obe kami Neniva ukakolwa,
pe ukaya na kuholama,
kutina bamalamo bobe.
12Bipata byobe bikenga ngo mitondo ya mikuyu,
iya yinayimi nkuyu za kutatika oho mitondo yikunyenkanishiwa,
nkuyu zikupulumukila mu tunwa twa bantu.
13Monenu, bakanzita bobe,
hi bambuyama mukati kenu,
mapangati a litunga lyobe anayahamini ku bamalamo bobe,
ndaba mundilo unahokeshe tupatisho twobe.
14Tekula mema shilumweza ngayi ubule ku shintikiziwa,
shumisha bipata byobe,
ingina mushitapo utape lima,
lilyatangile pe shimba kakombole utende shintina.
15Mundilo ukakuhokeshela muyo,
pe mukwale ukakuketozola,
mukwale ukamilobesha ngonehe mikumbi ya lyanga byakulya.
Likungululenu muvule nehe yavula mikumbi,
hanyenu nehe bahanya bambimba.
16Mwavulishile bakamikwebo benu kupitakana nyenye za muyilu.
Ngonehe mikumbi yakenyanga litunga hiyi kutuka na kuya.
17Bana ba bamyene bobe banengi ngo bambimba,
na babilolo bobe banengi ngo libimbe lya mikumbi yikutulila ha twimbi,
ha mutena wa mashika,
oho mutena ukututika yikutuka na kuya,
kowa wa limukanga oku yayanga.
18Balishani bobe bali mutulo,
obe mwene wa Ashiliya babilolo bobe ba kukunoka.
Bantu bobe banapanzanini ha mapili,
na kuluba wamina wakubawanika hamo.
19Kowa wanga wakupanga shitombo shobe,
wunalemana shikuma.
Nimwabo ba kuyuvwa mbuzi za kuwa kwobe ba kukambilila,
ndaba kowa muntu watweshele ku shila kukuluwa kwobe?
Currently Selected:
Nahumi 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
