Mika 1
1
1 #
2Bamy 15:32—16:20; 18:1—20:21; 2Bya 27:1-7; 28:1—32:33. Nyambi ya Ngula wambile kuli Mika waku munzi wa Molesheti, mu matena akulela kwa kulishiyashiya kwa Yotamu na Ahazi na Hezekiya bamyene ba ku Yunda. Nyambi ya Ngula ebye amoneshele Mika bya Shamaliya na Yelushalema.
Kushushula ha Shamaliya na Yelushalema
2Enu bakamatunga, yuvwenu eshe.
Yuvwililenu ku neshe, enu matunga nimwenu mwekala hano hanci.
Nyambi mwene yami, ukapaka kumi lwisha.
Yuvwililenu, uli na kwamba hinga ekala muyilu mu Litala lyendi lya kuyela.
3Monenu, Nyambi ya Ngula uli na kufuminina mu mwanya wendi,
ukeza hanci na kwenda hayilu ya mapili.
4Niho mapili akanyongotoka mu nceto yendi,
ngonehe shela ya nyongotoka ku mundilo.
Bakabayitila mu mikulo ngonehe mema akukunkula ku
ncezumuko ya shinkanda.
5Ebye nimwabyo bikatendiwa ndaba ya wubi wa bantu ba Ishalela banatende na kufutulukila Nyambi ya Ngula. Kati kuluwa kwa Ishalela kwezile nahiti? Kaliha kwafumine ku Shamaliya ndi? Kami kati wubi wakulemesha ba nyambi bashenge mu litala lya Yunda wezile nahiti? Kaliha kwafumine ku Yelushalema ndi? 6Nyambi ya Ngula wambile ngayi, “Nikatenda Shamaliya kwinga mushiinzi wa bya mazilo uli mu mfuba, mwanya wakukuna tuhu mikolobozi ya shinyanca. Nikayitila mazilo a lukena mu mukulo na ku monesha mwimbi walo. 7Tunankishi twendi tukacancoliwa, wuheti nimwawo ukahokeshiwa na mundilo, pe tunankishi twabo nimwato nikatulobesha, Shamaliya wahetele ebye mu nzila ya wunjenge. Bamalamo bakabishimba kuya na kuyumba wunjenge kwashenge.”
8Mika niho ambile ngayi, “Ndaba ya shuma eshe nikalila na kutuwa mbingo, nikenda mawuluwulu ku monesha muhelengwa wami. Nikalila ngonehe babozanga bamimbwe na kulila ngonehe bahwizokanga bampye. 9Shamaliya bitombo byendi bya wubi kutwesheka kupangiwa bifwako, binakukuma naku Yunda, binakukuma ku lipangati lya Yelushalema oku kwekala bantu bami.”
Bamalamo ba kulalabila Yelushalema
10Hinga mutongweza bamalamo betu bali mu Ngati,
kami hinga bamimona hi mulila.
Bantu bamu Mbeti Lefwala
moneshenu kulihohoma kwenu livumbanyenu mu lukungu.
11Enu mwazika mu Shafwila,
yenu mu wuntapwa na lisheni na kwenda muhelengwa.
Obo bazika mu Zaanani hinga mututikamo,
oho mu kuyuvwa bantu bamu Mbeti Ezela balila,
mukalimukanga ngayi kowa kwa kutinina.
12Bantu bamu Maloti ba kutatilila ku bayavwa,
ngoboni makando amanene anafumu kuli Nyambi ya Ngula,
anakumu naku mapangati a Yelushalema.
13Enu mwazika mu Lakishi,
mangililenu bambishi benu ku makoloyi.
Enu mwahembwizikile ba Ishalela kutenda wubi,
niho mwaleteshele Ziyoni Kubipisha.
14Haya, bantu bamu Yunda ba kushalisha ngayi, “Shalenuho”
baka lukena lwa Molesheti Ngati.
Bamyene ba Ishalela bafwako kukatambula zintupu ku munzi wa Akizimbi.
15Enu mwazika mu Malesha,
Nyambi ya Ngula ukamipana mu maboko a kamalamo wenu, ou ukakoma munzi wenu.
Bantwamina ba Ishalela bakaya mu kuliholeka mu
linzolongoma lya ku Andulama.
16Enu bantu ba Yunda, lishehenu huki ku monesha ngayi mu kulila banabenu mwa haka.
Tewulenu mitwe yenu mwinge ngonehe mitwe ya makubi,
ndaba bana benu bakamiyangulabo, bakaya mu wuntapwa.
Currently Selected:
Mika 1: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
