Balevi 15
15
Bya ha kuvwa mukeza
1Nyambi ya Ngula wambile kuli Moshesha na Aloni ngayi, 2“Amba ku bantu ba ishalela ngayi, oho mulume ukuvwa ku lutu lwendi, kuvwa oku kunengi kwa kubula kuyela, 3hinge lutu lushili kuvwa hinge lunemana unabulu kuyela. 4Pe wulili nimwawo ou akwikala hinge kulala unabulu kuyela. 5Muntu nimwendi ukukwata wulili wendi, 6hinge kwikala ha shuma shiya hekala uya mulume uku fwanina kuyowesha bivwalo byendi na kuyowela, pe ukekala hinga abula kuyela kukuma naku mazolo. 7Muntu nimwendi ukukwata lutu lwa nou ushili kuvwa uku fwanina kuyowesha bivwalo byendi na kuyowela, pe ukekala hinga abipa kukuma naku mazolo. 8Ndi muntu wakuvwa ukufwizila muntu wa nzimba, uya muntu uku fwanina kuyowesha bivwalo byendi na kuyowela, pe ukekala hinga abula kuyela kukuma naku mazolo. 9Shipona nimwasho sha ha mongo wa kayamana hinge shipona showa aha akwikala uya muntu wakuvwa shinabulu kuyela. 10Muntu nimwendi wakukwata ha shuma eshe ekala uya muntu wakuvwa ukekala hinga abula kuyela hantu naku mazolo. Muntu nimwendi waku shimba shuma shimo eshe ekalanga muntu wakuvwa uku fwanina kuyowesha bivwalo byendi na kuyowela, pe ukekala hinga abula kuyela kukuma na ku mazolo. 11Ndi muntu wakuvwa ukukwata muntu umo na kubula kutatika kuyowela ku maboko wendi, uya muntu uku fwanina kuyowesha bivwalo byendi na kuyowela, pe ukekala hinga abula kuyela kukuma naku mazolo. 12Nyungu nimwayo ya lima iya akukwata uya muntu wakuvwa mukeza yiku fwanina kucancoliwa, kami lulonga nimwalwo lwa shitondo luya akukwata lu ku fwanina kuyoweshiwa.
13“Oho muntu wapolakale ku wulweli wendi wakuvwa, uku fwanina kutatilila matena mutanu na abili, niho kami ayoweshe bivwalo byendi na kuyowela mu mema amawahe a kaheloke, pe ukenga wakuziluluka. 14Ha mutena wa mutanu na ahatu ukatwala matela abili hinge bankilimba babili ku menginino a Ntanda ya Shikungulukilo na kubipana kuli mukankombela. 15Mukankombela ukakombelelaho kayoni kamo kwinga ntupu ya ha wubi, kami kamina kakwinga nkombela yaha kuhokesha. Mu ntendelo eye uka mu kuliza ku meho a Nyambi ya Ngula ku wulweli wendi wakuvwa.
16“Oho mulume ukuvwa mukeza, uku fwanina kuyowela lutu nimwalwo, pe ukekala hinga abula kuyela kukuma naku mazolo. 17Byuma nimwabyo bya kutunga bya ha likwiza hinge bya shitembe aha hanavwili mukeza wa mulume biku fwanina kuyoweshiwa, kami shikekala hinga shabula kuyela kukuma na ku mazolo. 18Ndi mulume na mbuyama bakalilala, ha kumanisha ba ku fwanina kuyowela, pe bakekala hinga babula kuyela kukuma naku mazolo.
19“Oho ndi mbuyama unatini mundilo, ukazila ha matena mutanu na abili. Muntu nimwendi waku mukwata ukekala hinga abula kuyela kukuma naku mazolo. 20Nimwasho shuma akwikala hinge akulangana oho unatini mundilo shikenga sha kubula kuyela. 21Muntu nimwendi ukukwata wulili wendi uku fwanina kuyowesha bivwalo byendi na kuyowela, pe ukekala hinga abula kuyela kukuma naku mazolo. 22Muntu nimwendi ukukwata shuma nimwasho ekalanga uku fwanina kuyowesha bivwalo byendi na kuyowela, pe ukekala hinga abula kuyela kukuma naku mazolo. 23Ndi shinengi wulili wendi akukwata, hinge shumangani ekalanga shikekala hinga shabula kuyela kukuma naku mazolo. 24Ndi mulume ukulala na mbuyama wakutina mundilo unabipi na kukutina mundilo kwendi, pe ukwikala hinga abipa ku matena mutanu na abili, kami wulili nimwawo akulala unabipi.
25“Oho mbuyama unatini mundilo wakupitakanisha matena amengi kubula kuyakako matena atinanga mundilo, hinge ndi ukukakatila ku nciza ya munzi pe ukwikala hinga a zila shikati shashinene ngonehe shiya ekalanga oho unatini mundilo, pe unabulu kuyela. 26Wulili nimwawo ou akulala na shuma nimwasho eshe akwikala ha shikati eshe shinabulu kuyela, ngonehe ekalanga oho unatini mundilo. 27Muntu nimwendi ukubikwata unabulu kuyela, kami uku fwanina kuyowesha bivwalo byendi na kuyowela, ukekala hinga abula kuyela kukuma naku mazolo. 28Oho nafumu ku nciza ya munzi, uku fwanina kutatilila matena mutanu na abili, niho kami akenge wakuziluluka. 29Ha mutena wa mutanu na ahatu ukatwala matela abili hinge bankilimba babili kuli mukankombela ku menginino aku Ntanda ya Shikungulukilo. 30Mukankombela ukakombelela kayoni kamo kwinga ntupu ya ha wubi, kami kamina kwinga nkombela ya kuhokesha, pe muntendelo eye uka mu yelesha ku meho a Nyambi ya Ngula, ku wulweli wendi wakuvwa.”
31Nyambi ya Ngula watongwezele Moshesha kubela bantu ba Ishalela ha kubula kuyela kwabo ngayi, “Hinga bakazilulula Ntanda ya Shikungulukilo, eye yekala mukati ka munkungwa, kutina bafwa.”
32Oku niko kufundiziza ha muntu ou unabipi na wulweli wakuvwa ha lutu hinge ukuvwisha mukeza, 33na mbuyama wakutina mundilo, hinge ndi mulume ukalala na mbuyama wakutina mundilo unengi wa kubula kuyela.
Currently Selected:
Balevi 15: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
