Balevi 14
14
Kuliyelesha ku wulweli wakuliyambwisha
1Nyambi ya Ngula wambile kuli Moshesha ngayi, 2#Mat 8:4; Mako 1:44; Luka 5:14; 17:14. “Kufundiziza oku kwa kuzilulula muntu unapolo ku wulweli waha shikonde wakuliyambwisha ngayi, ha mutena wakumuzilulula ukaletiwa kuli mukankombela. 3Mukankombela ukaya ha munkanda wa munkungwa, pe uya muntu bakamutwala kuli mukankombela kuya bakamuhengola. Ndi wulweli unapolo, 4pe mukankombela ukamba ngayi kukaletiwe tuyoni tubili twa kuyela, hamo na shimbimbitwa sha mutondo wa Shinda na lunyimbwa lwa kufubila na mwahi wawushe wa hishopu.#14:4 Mwila wamu lishaka wakufweka ngonehe munyingo, baliyavwishilengawo ha bikungulukilo bya wunyambi ha kumyanzila mema na mukeza. 5Mukankombela ukamba ngayi kayoni kamo ha tuyoni kakazihiwile ha lulonga lwa lima muli mema amawahe aku kaheloke. 6Ukakwata kayoni kamina na kukazubika, hamo na mutondo wa shinda na lunyimbwa lwa kufubila na mwahi wawushe wa hishopu mu mukeza wa kayoni kaya kana zihiwi. 7Ukamyanzila mukeza bikati mutanu na bibili ha muntu ou ukuzilululiwa ku wulweli wendi wakuliyambwisha, pe ukaziluluka. Ukaleha kayoni kakomi ngayi katukile mu mbuwa. 8Muntu ukayowesha bivwalo byendi na ku sheha huki zendi nimwazo na ku yowela pe ukaziluluka. Ukatwesha kwingina mu munkungwa, ngoboni ukafwanina kwikala ha munkanda wa ntanda yendi matena mutanu na abili. 9Ha mutena wa wu mutanu na abili ukashehiwa ku mutwe na mulevu na bikuku byendi nimwabyo na wambo waha lutu lwendi nimwawo. Ukayowesha bivwalo byendi na kuyowela, pe ukaziluluka.
10“Ha mutena wa wu mutanu na ahatu ukaleta babikungwe babili ba bana ba bambelele na mwana mbelele wa mwaka umo wa shitole, baya bakubula muhendo, hamo na muhunga ukupimiwa makilo ahatu, waku vwela na mazi a olive na shitika sha lita sha mazi a olive. 11Mukankombela ukatwala muntu ku menginino a Ntanda ya Shikungulukilo hamo na neye nkombela. 12Niho mukankombela ukashimbaho umo ha babikungwe ba bana babambelele na ku mu tupula ngo ntupu ya kukuliza hamo na shitika sha lita sha mazi. Ukabiyengayengesha kwinga nkombela ya ku yengayengesha kuli Nyambi ya Ngula kwinga ya mukankombela. 13Pe ukaziha mwana mbelele mu mwanya wa shizila omu bazihilanga babimuna ba zintupu zaha kuliyelesha na zintupu za kuhokesha. Uku fwanina kutenda eshe ndaba ntupu ya kukuliza ya fweka ngo ntupu yaha wubi, yikwinga ya mukankombela kami yinengi ya kuyela shikuma. 14Mukankombela ukashimbaho mukeza umo wa mwana mbelele na ku wu yaka ku litu lyendi lya shilyo naha shala sha ku liboko lya shilyo naha linyenca lya ku liwulu lya muntu uya ukazilululiwa. 15Niho mukankombela ukashimba mazi amo a olive na kuwayitila mu liboko lyendi mwine lya shimoho, 16pe ukashonkamo munwe wendi waku liboko lyendi lya shilyo na ku myanzila umo kubikati mutanu na bibili kuyo ku meho a Nyambi ya Ngula. 17Mukankombela ukashimbaho kami mazi amo aya ashala mu liboko lyendi na ku wayaka kunkumo ya litu lya shilyo naha shala sha liboko lya shilyo naku linyenca lyalinene lya ku liwulu lyendi lya shilyo hayilu ya mukeza wa ntupu ya ku yelesha. 18Pe ukayaka mazi aya akushala mu liboko lyendi ha mutwe wa uya muntu. Mu ntendelo eye uka mu kuliza ku meho a Nyambi, pe ukaziluluka.
19“Niho mukankombela ukakombelela ntupu ya ha wubi wa uya muntu ku mu yelesha, ha kumanisha pe ukaziha shimuna wa nkombela ya kuhokesha, 20na kuyikombelela na ntupu ya mpeka ha kaala. Muntendelo eye mukankombela uka mu kuliza, pe uya muntu ukaziluluka.
21“Ndi muntu wenga waku shepwa na kubula kuwana byuma ebye, ha kulizilulula kwendi ukaleta shikungwe sha mwana mbelele umo kwinga nkombela ya kukuliza yiya yikayengayengeshiwa ya kumwambwililisha kuli Nyambi ya Ngula kwinga ya mukankombela. Ukaleta tuhu kilo yimo kami ya muhunga waku vwela na mazi a olive ha ntupu ya mpeka na shitika sha mazi a olive sha lita yimo, 22kami ukaleta matela abili hinge bankilimba babili, umo waha ntupu ya ha wubi na wamina waha nkombela ya kuhokesha. 23Ha mutena wa mutanu na ahatu wakulizilulula kwendi, ukabileta kuli mukankombela ku menginino a Ntanda ya Shikungulukilo. 24Mukankombela ukashimba mwana mbelele na mazi a olive naku biyengayengesha kwinga nkombela yaku yengayengesha kuli Nyambi ya Ngula kwinga ya mukankombela. 25Ukaziha mwana mbelele naku shimbaho mukeza umo na kuwulamba kunkumo ya litu lya uya ukushinga kuyeleshiwa lya shilyo naha shala sha ku liboko lyendi lya shilyo naha linyenca lyalinene lya ku liwulu lyendi lya shilyo. 26Niho mukankombela ukayitila mazi amo mu liboko lyendi niyemwine lya shimoho, 27kami ukamyanzilaho mazi amo na munwe wendi waku liboko lyendi lya shilyo ku meho a Nyambi ya Ngula bikati mutanu na abili. 28Kami mukankombela ukayaka mazi amo ha zimbalila zimo nehe ayaka mukeza wa mwana mbelele ha nkumo ya litu lya uya ukushinga kuyeleshiwa lya shilyo naha shala sha ku liboko lyendi lya shilyo naha linyenca lyalinene lya ku liwulu lyendi lya shilyo. 29Wingi wa mazi anashala mu liboko lya mukankombela ukawayaka ha mutwe wa uya muntu uya ukushinga ku yeleshiwa, mu ntendelo eye kami ukamwambwililisha ku meho a Nyambi ya Ngula. 30Pe ukakombelela kamo ha matela hinge ha bankilimba, 31kwinga ntupu ya ha wubi na yamina kwinga nkombela ya kuhokesha, hamo na ntupu ya mpeka. Muntendelo eye mukankombela uya ukushinga ku yeleshiwa ukamukuliza ku meho a Nyambi ya Ngula.”
32Eze nizo ndayano ku muntu uli na wulweli wakuliyambwisha, ngoboni ukukwanga kuwana nkombela shiwahe yikushingiwa ha kumuzilulula.
Mbundu Mbundu ya mu matala
33Nyambi ya Ngula wambile kuli Moshesha na Aloni ngayi, 34“Tongweza Baishalela oho benginakale mu litunga lya Kenaani elye nikabapana kwinga likona lyabo. Ndi nikayaka wulweli wa mbundu-mbundu mu litala lya mu litunga liyo, 35pe mwine litala ukafwanina kuya na kutongwezako mukankombela ngayi, ‘Shiku moneka ngayi kuli wulweli mu litala lyami.’ 36Pe mukankombela ukamba ha byuma nimwabyo bya mu litala ngayi bitutwishiwe ha munkanda oho shilolo aye na kuhengola mbundu-mbundu, ndelewa byuma nimwabyo bya mu litala bikabilikiwa ngayi binabipi. Nihoboni akaye ku litala, 37na kuhengola mbundu-mbundu. Ndi niyo yikwinga ya nkololobya hinge ya mabala a kufubila, aya aku moneka kulya limota lya litala, 38pe mukankombela ukashiya litala na kulipata matena mutanu na abili. 39Ha mutena wa mutanu na abili ukaboka na kulihengola kami. Ndi mbundu-mbundu yiya yinanenehe, 40mukankombela ukamba ngayi mamanya akawaniwa na mbundu-mbundu yifumishiwe na kuwayumbila ku lilala ha munkanda wa munzi. 41Pe ukabatongweza ngayi bapale limota haya ha limota nimwalyo na kuyumbila ndoba ku lilala ha munkanda wa munzi. 42Niho bakahingishamo mamanya amina akatendeshiwa kubweshelamo mu mamanya aya afumishiwa na ku mataho ngayi limota lya litala likalambululiwe.
43“Ndi oho bafumishakale mamanya na kupala limota lya litala na kuli lambulula, pe mbundu-mbundu hiyikututika kami mu litala, 44niho mukankombela ukaya na ku mona. Ndi mbundu-mbundu yinahanya, pe litala lika zilikiwa. 45Nilyo litala liku fwanina kunyemuniwa, kami mamanya walyo na bitondo na ndoba yalyo nimwabyo bishimbiwe na kubitutwishila ha munkanda wa munzi ku lilala. 46Muntu nimwendi ou wakwingina mu litala oho lya kupata ukabipa kukuma naku mazolo. 47Muntu nimwendi wakulala mu liya litala hinge ku lila mu liya litala uku fwanina kuyowesha bivwalo byendi.
48“Ngoboni ndi mukankombela unezi na kuhengola litala kami, mbundu-mbundu ku moneka yifwako oho litala linalambululiwi, ukazilulula litala ngayi linaziluluku, pe mukankombela ukamba ngayi, ‘Liyele.’ 49Ha kuzilulula liya litala ukashimba tuyoni tubili na bitondo bimo bya shinda na lunyimbwa lwa kufubila na mwahi wawushe wa hishopu. 50Pe ha tuya tuyoni ukazihilaho kamo ha lulonga luli na mema amawahe aku kaheloke. 51Niho ukashimba bitondo bya shinda na hishopu na lunyimbwa lwa kufubila na kayoni kakomi na kubizubika mu mukeza wa kayoni kaya kazihiwa na mema amawahe aku kaheloke. Pe ukawumyanzila ha litala bikati mutanu na bibili. 52Pe niye ukazilulula liya litala na mukeza wa kayoni na mema amawahe aku kaheloke na kayoni kakomi na bitondo bya shinda na hishopu na lunyimbwa lwa kufubila. 53Niho ukaleha kayoni kakomi ngayi kafume mu lukena katukile mu mbuwa, pe ukambwililisha litala, pe nilyo likaziluluka.”
54Eze nizo ndayano zaha malweli akuliyambwisha nimwawo a wulweli wa luyuwila, 55hinge mbundu-mbundu yaha shivwalo hinge yamu litala, 56hinge lizimbwazimbwa, hinge wulweli wa matutwa, hinge libala. 57Ndayano eze ziku monesha byuma binazilikiwi oho kami binazilululiwi.
Eze nizo ndayano zaha malweli akuliyambwisha nimwawo.
Currently Selected:
Balevi 14: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
