Yoshuwa 7
7
Wubi wa Akani
1Ngoboni Baishalela babulile kwinga bakwoloka kuli Nyambi ya Ngula, za kubakanisha kushimba shinge shumangani hinge shumangani mu Yeliko, shiya shafunguliwile kwinga nkombela kukwami. Nohobene wukali wa Nyambi ya Ngula wabambile ha bantu ba Ishalela, ndaba mulume watumbiwile ngayi Akani washimbile byuma bimo bya kufunguliwa. Akani wengile mwana Kalimi, muzukulya Zambindi wa ku livumo lya Zela, waku mushobo wa Yunda.
2Yoshuwa watumine balume bamo kufuma ku Yeliko kuya ku Ayi, lukena lwaku mushamuko wa Mbetele, hahepi na Mbeti Abeni. Wabatongwezele ngayi, “Yenu mu kuhokela litunga.” Nohobene balume bayile na kuhokela lukena lwa Ayi. 3Oho babokele mu kushimika kuli Yoshuwa bamutongwezele ngayi, “Kowa kami sha kuyila na bantu nimwabo mu kulwisha Ayi. Tumako tuhu bantu makulukazi abili hinge ahatu mu kulwisha Ayi. Hinga utuma banzita nimwabo kuya mu kulwa ndaba lukena kaliha lwalunene.”
4Niho Baishalela ba kukuma ha makulukazi ahatu bakatukile mutakwe, ngoboni babashintulwile. 5Balume ba ku Ayi babatandile kubafumisha ku lipangati kubakumisha na ku bitapo bimo bya mamanya, babazihile ha nzila yakunkuluka ku nceto ya lipili. Ha kukunkuluka bazihile Baishalela makumi ahatu na mutanu na umo. Baishalela batampwile pe batinine.
6Yoshuwa na bakulwane ba Ishalela batabwele bivwalo byabo mu wunginga, pe bawile na kukinka zimpala zabo hanci kumbili ya Likwati lya Kulimama kwa Nyambi ya Ngula. Pe babulumanine kuyo kukuma naku mazolo, pe balifukwelele limvu ku mitwe yabo ku monesha wunginga wabo. 7Pe Yoshuwa wambile kuli Nyambi ya Ngula ngayi, “Tawee! Nyambi ya Ngula, Shumangani watuzabwishile Mushinzi wa Yondana? Kati ngayi mwanga utupane ku Baamoli ngayi bakatulobeshe? Shumangani twabulile kwikala tuhu muya mu nciza ya Yondana? 8Nikutwesha kwamba nahiti, Obe Nyambi ya Ngula, haya mona Baishalela banakashintuluku ku bamalamo babo! 9Bakenaani na bantu nimwabo kami bazika mu litunga bakayuvwako, pe bakeza na kutulwisha hamo na kutuziha nimwetu na kulobesha mukoka wetu na lizina lyetu peluu! Pe haya Obe ukatenda nahiti ha kulemeeka lizina lyobe.”
10Nyambi ya Ngula wambile kuli Yoshuwa ngayi, “Pinduka! Shumangani ukufulumanina hanci nehe? 11Ishalela unabipishi! Banakiluku kulimama kwabo na nami kuya nabakulupishile ngayi kushume. Banashimbi ku byuma bimo biya byafunguliwile kwinga nkombela. Babiyiba na kwamba mahalo, pe banabitenteke hamo na byuma byabo. 12Eshe nisho shuma shiya Baishalela ba kubulila kutwesha kwimana ku bamalamo babo. Bakushintuluka ku bamalamo, ndaba nibo bamwine bayatiwile kukuloba! Kukekala nanenu nifwako hantu munalobeshe byuma biya mwatongweziwile ngayi mukabifungwile kwinga nkombela yanzimba kukwami. 13Katukenu! Muye mukayeleshe bantu baliwahishe kwiza kumbili yami. Batongwezenu baliwahishe nzona, ndaba Ami Nyambi ya Ngula, Nyambi wa Ishalela nikwamba eshe ngayi, ‘Enu Ishalela muli na byuma bimo biya namitongwezele ngayi mubifungwile kwinga nkombela kukwami! Kutwesha kwimana kubamalamo benu mufwako hantu munayumbu shishe mpuka zimilehe.’ 14Nohobene batongweze ngayi ku lumenemene bakaletiwa mushobo na mushobo kumbili. Mushobo uya nikashimbaho niwo haya ukeza kumbili ku lupashi na lupashi. Lupashi luya nikashimbaho likeza kumbili ku lupashi na lupashi. Lupashi luya nikashimbaho lukeza kumbili ku muntu na muntu. 15Muntu ou eze akawaniwe na byuma binafunguliwi ukahokeshiwa, hamo na ba lupashi lwendi na byuma nimwabyo aheta. Unalete lisheni lya kukomokesha ha Ishalela, kami unakiluku kulimama kwami.”
16Oho kwashile Yoshuwa wapindukile lumenemene, waletele Ishalela kumbili mushobo na mushobo, pe mushobo wa Yunda wahatiwileho. 17Waletele mushobo wa Yunda kami kumbili mu lupashi na lupashi, pe lupashi lwa Zela lwahatiwileho. Niho aletele kami lupashi lwa Zela kumbili lupashi na lupashi, pe lupashi lwa Zambindi lwahatiwileho. 18Niho aletele kami ba lupashi lwa Zambindi kumbili muntu na muntu, pe Akani mwana Kalimi, Kalimi mwana Zimili, Zimili mwana Zela waku mushobo wa Yunda. 19Pe Yoshuwa wambile kuli Akani ngayi, “Mwanami, shimika kupwisha na kulitabila ku meho a Nyambi ya Ngula, Nyambi wa Ishalela. Haya ntongweze ebye unatende, hinga wezeka kuholekela.”
20Akani wakumbwile ngayi, “Shinengi sha kupwisha nabipishili Nyambi ya Ngula, Nyambi wa Ishalela, pe eshe nisho natenda. 21Namonene lyambangubo lyaliwahe lya ku Mbambiloniya ha byuma ebye twapukwile na wulemu wa shiliva wa makilongilamu abili na mukambo wa ngolinde wakufwanikiza ha shipimo sha wulemu wa shitika sha kilo. Nabishinga shikuma niho nakabishimba. Ukabiwana hinga byavumbikiwa mukati ka ntanda yami na shiliva ku nceto.”
22Nohobene Yoshuwa watumine balume bamo kwitukila ku ntanda yendi, pe bakawanine ngayi mwa shikuma byavumbikiwile na shiliva ku nceto. 23Babifumishile mu ntanda na kubitwala kuli Yoshuwa naku Baishalela nimwabo, pe babiyakile hanci ku meho a Nyambi ya Ngula. 24Yoshuwa hamo na Baishalela nimwabo bakwatile Akani mwana Zela na shiliva na lyambangubo na mukambo wa ngolinde na bana bendi babalume na ba bambuyama na zingombe zendi na bambongolo na bambelele na byuma nimwabyo ekalile nabyo. Pe babitwalile ku mukulo watumbiwile ngayi, Mukulo wa Makando. 25Pe Yoshuwa wambile ngayi, “Shumangani unaletele makando hahetu! Nyambi ya Ngula haya ukaleta makando hahobe lelo.” Pe bantu nimwabo bazihile Akani na mamanya, bazihile kami ba lupashi lwendi na mamanya na kubahokesha hamo na wuheti wabo. 26Bayakile mushiinzi wa mamanya hahendi ou uliko naku mutena wa lelo. Shiya nisho shuma bashili kuwu tumbila ngayi Mukulo wa Makando.
Niho Nyambi ya Ngula atulumanine ku wukali wendi ha Baishalela.
Currently Selected:
Yoshuwa 7: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.