Yoshuwa 6
6
Kuwa kwa Yeliko
1Mapangati a Yeliko ashinkiwile shikuma na kulamiwa kukanisha Baishalela ngayi hinga bengina. Kowa muntu watweshele kwingina hinge kufuma mu lukena. 2Nyambi ya Ngula wambile kuli Yoshuwa ngayi, “Mona, nili na kupana Yeliko na mwene wamo na banzita bamo ba kukanca mu maboko wobe. 3Obe na banzita bobe mukaya na kuwuluta na kuzinguluka lukena kamo ha mutena ha matena mutanu na umo. 4Bakankombela mutanu na babili umo na umo ukashimba mpandula, pe bakaya kumbili ya Likwati lya Kulimama. Ha mutena wa mutanu na abili, bakankombela bakashibanga zimpandula. 5Oho bakakulukilamo na ku shiba mufumbo. Mwayuvwako tuhu, bantu nimwabo bakabilikiza, pe kembi ka lukena kakawila hanci.” Niho nzita nimwayo yikalulumana mu lukena.
6Nohobene Yoshuwa mwana Nune wehanine bakankombela na kubatongweza ngayi, “Katulenu Likwati lya Kulimama, pe bakankombela mutanu na babili baye kumbili yalyo, hinga bashimba zimpandula.” 7Niho atongwezele bantu bendi ngayi, “Katukenu mubalike kuya na kuwuluta na kuzinguluka lukena, hamo na banzita bakakulama baye kumbili ya Likwati lya Kulimama kwa Nyambi ya Ngula.”
8Nohobene ngonehe shiya Yoshuwa abatongwezele, bakakulama batwaminine kumbili ya bakankombela mutanu na babili aba bashimbilenga zimpandula. Pe munyima ya nobo mwayile bakankombela bashimbilenga Likwati lya Kulimama kwa Nyambi ya Ngula. 9Kami munyima yabo mwakonkele bakakulama likwati, pe zimpandula zayilenga na kutendoka shikati eshe nimwasho. 10Ngoboni Yoshuwa watongwezele bantu ngayi, “Hinga mwinga miyoyo, hinge tuhu kwamba lizu, hantu namitongweze.” 11Niho watumine bakankombela hamo na Likwati lya Kulimama kwa Nyambi ya Ngula kuzinguluka lukena kamo. Niho babokele ku munkungwa na kulala wushiku umo.
12Oho kwashile lumenemene Yoshuwa walimenekele kupinduka, pe bakankombela bakatwile Likwati lya Kulimama, 13niho bakankombela mutanu na babili bashibilenga zimpandula za mashengo a bikungwe, kumbili ya bakankombela bashimbilenga Likwati lya Kulimama kwa Nyambi ya Ngula. Niho ba kukumininako, bakakulama kunyima. Pe zimpandula zayilenga na kutendoka shikati eshe nimwasho. 14Kami, ha mutena ou wawubili bayile na kuwuluta kuzinguluka lukena shikati shimo, pe babokele ku munkungwa. Pe batendele eshe matena mutanu na umo.
15Ha mutena wa mutanu na abili bapindukile ha kututika kwa mutena, pe bendele na kuwuluta kuzinguluka lukena bikati mutanu na kabili mu nzila yimo. Uya niwo tuhu mutena uya bayile na kuwuluta na kuzinguluka lukena bikati mutanu na kabili. 16Shikati sha mutanu na kabili sha kuzinguluka, bakankombela oho bashibakale zimpandula, Yoshuwa wambile ku bantu ngayi, “Bilikizenu! Nyambi ya Ngula unapaniki lukena kukwenu. 17Lukena na byuma nimwabyo bilimo bikafunguliwile kwinga nkombela kuli Nyambi ya Ngula. Ndele tuhu Lahambu mbuyama walwiholwiho na ba litala lyendi nibo bakashalaho, ndaba waholekele bantumwana betu. 18Ngoboni enu hinga mukatolaho shuma kunebye byafunguliwila kuli Nyambi ya Ngula. Ndi mukatenda noho, pe mukaleta wukalu na kuloba ha munkungwa wa Baishalela. 19Ngoboni byuma nimwabyo bya kufuliwa ha shiliva, hinge ngolinde, hinge lubemba, hinge shondo binabenguliwili kwinga bya Nyambi ya Ngula. Nibyo bikayakiwa mu mfuma ya Nyambi ya Ngula.”
20Nohobene bakankombela bashibile zimpandula. Oho bantu bayuvwileko tuhu, pe babilikizile na kutenda miyoyo shikuma, pe kembi kanyemukilile hanci nyemwaa. Niho bantu nimwabo bayile na kukankalala mu lukena, pe balukomene. 21Bazihile bantu nimwabo mu lukena na mikwale yabo, balume na bambuyama, batwanuke na bakulwane. Bazihile kami zingombe na bambelele na bambongolo.
22Yoshuwa watongwezele balume babili aba batumiwile kuya na kuhokela ngayi, “Yenunga ku litala lya Lahambu mbuyama walwiholwiho, mukatutwishe ba lupashi lwendi ha munkanda wa lukena, ngonehe mwamukulupishile.” 23Nohobene bayile mu kututwisha Lahambu ha munkanda wa lukena, hamo na batatiyendi na bamandiyendi na bayayizendi na ba lupashi lwendi nimwalwo. Bayile nabo nimwabo, ba lupashi na bandungo zendi nimwabo, pe babayakile hahepi na munkungwa wa Baishalela ngayi bapuluke. 24Niho bahokeshele lukena na byuma biya byekalilemo, ndele tuhu byuma biya byafuliwile ha ngolinde na shiliva na lubemba na byondo, ebye bashiyileho na kubiyaka mu mfuma ya Litala lya Nyambi ya Ngula. 25#Bah 11:31. Ngoboni Yoshuwa wapulwishile wumi wa mbuyama walwiholwiho Lahambu na ba lupashi lwendi nimwalwo, ndaba waholekele balume baya atumine mu kuhokela lukena lwa Yeliko. Bazukulyendi bashili kuzika mu Ishalela kuleta naku mutena walelo.
26 #
1Bya 16:34. Ku shikati shiyo Yoshuwa wababezelele na kuhaha ngayi, “Muntu nimwendi wakutendulula luno lukena lwa Yeliko, ukenga wakukutiwa ku meho a Nyambi ya Ngula.
Muntu nimwendi wakuyala mwimbi,
ukayawa mwanendi wa mulume wa mweli.
Muntu nimwendi wakuzika mapangati,
ukayawa mwanendi wa mukaala.”
27Nohobene Nyambi ya Ngula wekalile hamo na Yoshuwa, pe watumbalalile mu litunga nimwalyo.
Libuka Lya Kuyela © Bible Society of Zambia, 2020.