Yelemiya 39
39
Kuwa kwa Yelushalema
1Mu mwaka wa mutanu na yinaa mu ngonda wawulikumi, oho Zendekiya engile mwene wamu Yunda, mwene Nembukandineza waku Mbambiloni na bakanzita bendi bazingulukile kuyaka Yelushalema mukati. 2Mu mwaka wawulikumi na umo wakulela kwa mwene Zendekiya mu ngonda ya wunaa ha mutena wa mutanu na anaa, twimbi twa lukena twatubuliwile nimwato. 3Yelushalema oho akwatiwile, babilolo babalemu bamwene waku Mbambiloni bezile mukwikala mu lipangati lya hakati. Bengile Nelingale Sheleza na Shamunga mukulwane wa bakanzita na Shalashekima na mukulwane wa babilolo na Nelingale Sheleza wamina na babilolo nimwabo bamwene wa Mbambiloni. 4Oho mwene Zendekiya wa Yunda na bakanzita bendi nimwabo babamonene, bashilile mu lukena wushiku, bapitile na nzila yaku mfuba ya mwene, batutikilile haliwanina twimbi tubili niho batininine kumbalila ya mukulo wa Yondana. 5Ngoboni bakanzita ba Bambambilona ya bakonkele, bakakwatile Zendekiya mu zimbuwa za Yeliko. Bamushimbile na kumutwala kuli Nembukandineza mwene wa Mbambiloni ou wekalile ku Limbula mu litunga lya Hamati, kuyo niko bakaketula shambo. 6Mwene waku Mbambiloni wazihile bana ba mwene Zendekiya babalume, oho Zendekiya hamonako.Wazihile kami babilolo nimwabo bamu Yunda. 7Niho atibile meho a Zendekiya na kumumanga mawenge a lubemba na kumutwala ku Mbambiloni. 8Baka Mbambiloni bahokeshele musheke na matala a bantu na kuwisha kembi ka Yelushalema. 9Nembuzalandani, mukakutwaminina bakakulama banzita, watwalile bantu bashalile mu lukena mu wuntapwa ku Mbambiloni na baya balishishile kukwendi wabatwalile mu wuntapwa. 10Mu litunga lya Yunda washiyilemo tuhu bancepwe na bakubula shamina, niho abapanine mafuba a shinyanca na mafuba a zimbuto.
Yelemiya ukushobololiwa
11Mwene Nembukandineza wa Mbambiloni watongwezele Nembuzalandani bya Yelemiya ngayi, 12“Ukamushimbe na kumulama shiwahe, hinga ukamulemeka ukamutendele ebye nimwabyo akushinga.” 13Nembuzalandani, mukakutwaminina bakakulama banzita na Nembushazimbani mukulwane wa babilolo na Nelingale Sheleza na babilolo bamina bamwene wa Mbambiloni, 14batumine bantu na kushimba Yelemiya mu shipango sha bakakulama musheke, bamuyakile mu ngovu za Ngendaliya, mwana Ahikama, ou wengile mwana Shafwani. Bamutongwezele ngayi alame Yelemiya shiwahe na kukamukumisha ku munzi. Niho Yelemiya akekalile mukati ka bantu ba mukoka wendi.
Shikulupisho sha Ebendimeleki
15Yelemiya oho ekalile mu tolongo ya mu shipango sha bakakulama ku musheke, Nyambi ya Ngula wambile kukwendi ngayi, 16“Yanga ukatongweze Ebendimeleki wa Kaetopya ngayi Nyambi wa Makunge, Nyambi wa Ishalela unakwamba ngayi, ‘Wuluno nitende ebye nambile bya kuleta makando ha luno lukena, nifwako kukaleta wuwahe, hashikati shiyo ukamona ebye bikatendiwa. 17Nyambi ya Ngula unakwamba ngayi, hashikati shiyo ukakulamwina, kami wufwako kukayakiwa mu ngovu za bantu aba watina. 18Nikakulamwina, kukafwa kunzita wufwako. Ukapanza na wumi wobe, ndaba unakinki mutima mumwami.’ ” Eshe nisho anamba Nyambi ya Ngula.
Currently Selected:
Yelemiya 39: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
