Yelemiya 38
38
Yelemiya ba kumuyumbila mu Lishima lya Kuyuma
1Shefwatiya mwana Matani na Ngendaliya mwana Pashiha na Yukalu mwana Shelemiya na Pashiha mwana Malikiya, bayuvwile Yelemiya hatongweza bantu 2ebye ambile Nyambi ya Ngula ngayi, “Nimwendi ukekala mu lukena ukafwa ku nzita hinge kukapande hinge ku wulweli wakuliyambwisha. Ngoboni nimwendi ukaya na kulishisha ku baka Mbambiloni kukazihiwa wufwako, ukalamwina wumi wendi. 3Nyambi ya Ngula unamba ngayi, mwa shikuma olu lukena nikalupana ku bakanzita ya baka Mbambiloni pe bakalukona.” 4Niho babilolo bambile kuli mwene ngayi, “Ou Yelemiya unafwanini kuzihiwa, ndaba ebye anakwamba binakupopesha bakanzita muno mu munzi na bantu nimwabo balimo. Kami kuyavwa bantu ufwako, ngoboni unakubayuvwisha kukola ku mitima.” 5Mwene Zendekiya niho akumbwile ngayi, “Shashiwahe, mutendenu nimwabyo ebye mukushinga, kumi kanisha nifwako.” 6Niho bakwatile Yelemiya, bamuyumbilile mu lishima lya Malikiya mwana mwene, lishima lyekalile ha mbanza ya shipango sha bakakulama musheke. Baliyavwishile nyimbwa ha kumunyenzumwishila mu lishima muya mwabulukile mema, ngoboni mwekalile tuhu ntiti, niho ambwataminemo. 7Ebendimeleki waku Kushi, shilolo wa mu litala lya mwene, wayuvwile ngayi Yelemiya ba na muyaka mu lishima. Hashikati shiyo mwene wekalile mu lipangati lya Mbenjamani. 8Ebendimeleki wafumine mu musheke wayile na kwamba na mwene ngayi, 9“Obe mwene hekulyami, aba bantu banatende byabibi kuli muluwe Yelemiya, ha kumuyumbila mu lishima muya akafwila ku nzala, ndaba mu lukena byakulya byamanakale.” 10Niho mwene atongwezele Ebendimeleki wa Kaetopya ngayi, “Shimba balume makumi ahatu uye nabo mu kukoka muluwe Yelemiya mu lishima oho shilolo afwe.” 11Ebendimeleki niho ashimbile bantu wayile nabo ku litala lya mwene ku shishete sha ku musheke na kushimbako bincancolo bya ku nceto ya shishete na makwiza a mwaka, wabimangile ku nyimbwa na kunyenzumwishilabyo Yelemiya mu lishima. 12Ebendimeleki wa Kaetopya wambile kuli Yelemiya ngayi, “Yaka ebye bincancolo mukati ka nyimbwa na zinkwapa zobe, Yelemiya watendele noho. 13Niho bamukokele na nyimbwa kumufumisha mu lishima niho Yelemiya bamuyakile mu shipango sha bakakulama.”
Zendekiya ukunyepa Kubela kwa Yelemiya
14Zendekiya watumine mazu ngayi bamulete kukwendi, pe waliwanine nendi ku menginino a wuhatu a Litala lya Nyambi ya Ngula. Mwene wambile kuli muluwe Yelemiya ngayi, “Nikushinga kukwipula liyipu, kami nikushinga ngayi untongweze bya kupwisha.” 15Yelemiya wakumbwile Zendekiya ngayi, “Nakukutongweza bya kupwisha kati kunziha wufwako ndi? Kami hinge ndi nikukubela ukanyuvwilila ndi?” 16Mwene Zendekiya niho alibezele kuli Yelemiya mbeza za kuwi. Mwene Zendekiya wambile ngayi, “Ngonehe Nyambi ya Ngula ou watupanine wumi ayoya, kuka kuziha nifwako, kami nifwako kuka kupanika mu maboko a bantu aba bakushinga kukuziha.” 17Yelemiya watongwezele mwene Zendekiya ngayi Nyambi wa Makunge, Nyambi wa Ishalela, Unamba ngayi, “Ndi ukalishisha ku babilolo ba mwene waku Mbambiloni, pe wumi wobe ukashalaho na lukena luno kukahokeshiwa lufwako. Nimwenu na bana bobe mukashalaho. 18Ngoboni ndi kulishisha wufwako ku babilolo ba mwene waku Mbambiloni, pe lukena luno lukapanikiwa mu maboko a baka Mbambiloni, nibo bakaluhokesha, kami kukapanza kukwabo mufwako.” 19Mwene Zendekiya wambile kuli Yelemiya ngayi, “Nili na bowa na Bayunda aba banayi ku baka Mbambiloni, ndaba bakampana ku maboko abo ngayi banyandishe.”
20Yelemiya wamukumbwile ngayi, “Bafwako kuka kupanika ku maboko abo, obe ombatala Nyambi ya Ngula mukutenda ebye nikukutongweza, pe byuma nimwabyo bikenda shiwahe kukwobe, kami wufwako kukazihiwa. 21Ngoboni Nyambi ya Ngula nantongweze na ku monesha ebye eze bikatendiwe ndi ukukana kulishisha kukwendi. 22Bambuyama nimwabo banashala mu lukena lwa mwene wa Yunda bakaletiwa ku babilolo ba mwene wa Mbambiloni, obo bambuyama hibamba kukwobe ngayi,
“‘Bahoni bobe wakulupila banakwongeze,
kami banakutweshe,
haya mawulu wobe atapilakale muntiti,
nibo banakufutamini.’”
23Bakazenu hamo na bana benu bakatwaliwa ku Mbambiloni. “Enu mufwako kukapanza ku maboko wabo, ngoboni mukakoniwa na mwene wa Mbambiloni, kami lukena luno lukahokeshiwa.”
24Zendekiya wambile kuli Yelemiya ngayi, “Hinga witabila muntu hinge umo ngayi alimuke eze ngambolo, ndelewa ba kukuziha. 25Ndi babilolo ba kuyuvwako ngayi nambolonga nobe, kami ndi bakwiza kukwobe na kwamba ngayi, ‘Tutongweze ebye watongweze mwene nanebye mwene anamba kukwobe hinga utulimbila, ndelewa tukakuziha,’ 26ukabatongweze ngayi, ‘Ninalambililinga mwene ngayi hinga ambwesha ku litala lya Yonatana ngayi nikafwileko.’” 27Babilolo nimwabo bezile kuli Yelemiya na kumwipula, niho abatongwezele ngonehe amutongwezele mwene. Kami kaliha bambile shuma shamina kukwendi, ndaba kowa hinge umo wayuvwile ngambolo zendi na mwene. 28Yelemiya wekalilenga ku musheke kutwala ha mutena uyo lukena lwa Yelushalema lwakoniwile.
Currently Selected:
Yelemiya 38: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
