Yelemiya 34
34
Yelemiya ukushiwulula Zendekiya
1Nyambi ya Ngula wambile kuli Yelemiya, oho mwene Nembukandineza wa Mbambiloni na banzita bendi na wene nimwawo wa hanci uya wekalile mu maboko wendi hamo na mikoka nimwayo, yalwishilenga Yelushalema na minzi yekalile kwakwipi. 2Nyambi ya Ngula, Nyambi wa Ishalela ukwamba ngayi, “Yanga ukatongweze Zendekiya mwene wa Yunda ngayi, ‘Nyambi ya Ngula ukwamba ngayi, mona nikapana lukena olu kuli mwene wa Mbambiloni pe ukaluhokesha. 3Kukapanza ku liboko lyendi wufwako, ngoboni ukakwatiwa na kupanikiwa ku liboko lyendi, ukamumona lupala na lupala, kami ukamba nendi meho na meho, niho ukaya ku Mbambiloni.’ 4Haya obe Zendekiya mwene wa Yunda yuvwilila kunebye akwamba Nyambi ya Ngula kukwobe, kukazihiwa mu nzita wufwako. 5Ukafwa mu ku mwena kami ngonehe bantu bahokeshelanga incence ha malila a batatizobe, baya bengile bamyene kunyima yobe, pe bantu bakahokeshela incence ha malila wobe, niho ha kwimbila nyimbo za malila bakamba ngayi, ‘Tawee hekulyetu.’” Eshe nisho anamba Nyambi ya Ngula.
6Niho muluwe Yelemiya atongwezele mazu awa nimwawo Zendekiya mwene wamu Yunda mu Yelushalema, 7oho banzita ba mwene waku Mbambiloni balwishilenga lukena lwa Yelushalema na minzi nimwayo ya Yunda, Lakishi na Azeka, ku minzi yekalile mu shipata niyo tuhu ya shilile mu Yunda.
Bantu bakwikalika Bandungo na Shilala
8Nyambi ya Ngula wambile kuli Yelemiya, kunyima ya kulimama kwa mwene Zendekiya na bantu nimwabo bamu Yelushalema ngayi babilike lukuwa lwa kulubula, 9bandungo zabo ba Bahebelu, ndungo wa mulume hinge wa mbuyama, ngayi kubule muntu wakuheta minendi ka Yunda. 10Bantu nimwabo hamo na bakakutwaminina babo betabilile ku shobolola bandungo zabo na kuliyuvwashana ngayi kowa muntu eze akahete ndungo kami. Niho nimwabo babalubwile. 11Ngoboni oho kwapitile matena, bafutwile bihanganiko byabo, bababweshele na kubakandikiza kwinga bandungo kami. 12Hohobene lizu lya Nyambi ya Ngula lyezile kuli Yelemiya, 13Nyambi wa Ishalela niho antongwezele kwamba ku bantu ngayi, “Nalimamine na bankakazenu oho nabafumishile mu Engepita na ku bashobolola mu wulungo. Nabatongwezele ngayi, 14#Kut 21:2; Nday 15:12. ‘Mu myaka nimwayo ya mutanu na yibili, bakalubule bandungo zabo ba Shihebelu baya banabatendele milimo mu myaka mutanu na umo.’ Ngoboni bankakazenu bakanine kunyombatala, kaliha batengekele matu wabo kukwami. 15Matena tuhu amashe anapitimo munafutulu bihanganiko byenu na kutenda ku meho wami bya kungwahililisha. Nimwenu mwaliyuvwashanine kulubula bawushindawenu ba Ishalela kubafumisha mu wulungo, kami mwalimamine ku meho wami mu Litala likutumbiwa na lizina lyami. 16Ngoboni mwafutwile bihanganiko kami na kubula kumpana maleema. Enu nimwenu mwabweshele baya bandungo mwalubwile kwinga bandungo benu kami. 17Nohobene, Ami Nyambi ya Ngula, nili na kwamba ngayi, kunyombatala mufwako, ndaba shilolo mupane bawushindawenu Baishalela ku shoboloka kwabo. Shashiwahe Ami haya nikamipana ku shoboloka, kwa kufwila mu nzita, ku wulweli wakubula kupangiwa na kapande. Nikaletesha matunga nimwawo mu kaye kulikomokela hanebye bya wunyengwe nikatenda hahenu. 18Bantu aba banatende shibi ha kulimama kwami, kaliha balamine mwayila kulimama kwabo na nami, nikabatenda ngo mwana ngombe banatabulu hakati. 19Bakakutwaminina mu Yunda namu Yelushalema na babilolo bamu zinkuta na bakankombela hamo na bantu nimwabo bamu litunga balimamine na nami mukwenda mukati ka bimamo bibili bya uyo mwana ngombe batabwile hakati. 20Nikabapana mu maboko a bamalamo babo obo bakushinga ku baziha. Mituntu yabo yikenga byakulya bya batuyoni na batuyamana. 21#Yel 37:5-11.Nikafungwila Zendekiya mwene wa Yunda hamo na babilolo bendi ku maboko a bamalamo babo baya bakushinga ku baziha, ku banzita ba mwene waku Mbambiloni, obo balehele kumi lwisha. 22Nyambi ya Ngula nabiliki ngayi, nikapana ndayano pe nikababwesha kami ku lukena luno. Bakalulwisha na kulukona na kuluhokesha. Kami nikafutula mapembe minzi yamu Yunda ngayi kukabule hinge muntu umo wakwikalamo.”
Currently Selected:
Yelemiya 34: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
