Yelemiya 33
33
Shikulupisho shamina Sha kulumbeza
1Nyambi ya Ngula wambile kami kuli Yelemiya oho ekalile mu shipango sha bakakulama ngayi, 2Ami Nyambi ya Ngula ou walengele hano hanci, ou wayakile mwimbi na kuwu shumisha, Nyambi ya Ngula nilyo lizina lyami nikwamba ngayi, 3“Nyihane pe nika kukumbula, nikakutongweza byuma bya kukomokesha nebye bya kuholeka wabula kulimuka. 4Nyambi ya Ngula, Nyambi wa Ishalela ukwamba ha matala a Yelushalema na ha matala a bamyene bamu Yunda owo anyemukile ngayi, banashiwulu matala ngayi batendeshe twimbi twatuwahe kutinisha bakakubalwisha, 5mu kulwisha baka Mbambiloni. Ngayi, matala wabo akenzala na mituntu ya bantu obo nazihile mu wukali na kupilama kwami. Nikaholeka lupala lwami ku lukena olu ndaba ya wubi ou banatende.”
6Ngoboni nikanyongomanisha luno lukena na kulubwesha mukwikala shiwahe. 7Nikalubula Yunda na Ishalela kubafumisha mu wuntapwa, kami nikabazikisha ngonehe bekalile mwaka. 8Nikabayelesha ku wubi wabo nimwawo banatende kukwami, kami nikabayatila ku wubi wabo nimwawo banatende wakumfutulukila. 9Yelushalema ukandetela ku wahilila na kuyemeziwa na maleema, pe matunga nimwawo a hano hanci owo akayuvwa mpupo ya byuma byabiwahe ebye na batendela, bakekala na bowa na kukanka ndaba ya kubapana ku mwena na kutangama shikuma.
10Nyambi ya Ngula ukwamba ngayi, “Enu mukwamba ha luno lukena ngayi, lwengakale mapembe, mwakubula bantu hinge batuyamana. Minzi ya Yunda na mikwakwa ya Yelushalema yinashiyiwi kwakubula bantu hinge batuyamana, ngoboni mu mwanya uno mukayuvwanika kami, 11miyoyo ya ku wahilila na kutangala kwa bantu bakakuyeka na bakakuyekiwa na mazu a bakakuleta zintupu za kukambilila ku Litala lya Nyambi ya Ngula hibamba ngayi,
‘Kambililenu kuli Nyambi wa Makunge,
ndaba Nyambi ya Ngula wenga wamuwahe
nceshe zendi za mwaya myaka.’ Ndaba nikabweshela bitandalisho bya lino litunga ngonehe byekalile ku mwaka. Eshe nisho anamba Nyambi ya Ngula.”
12Nyambi wa Makunge ukwamba ha litunga elye linafutuku mapembe, mwakubula bantu hinge batuyamana, kami likenga lya kubuyishila omo balishani bakabuyishila bambelele babo. 13Mu minzi ya litunga lya binkanda namu minzi ya mu Shefwela namu minzi yamu Nengembu namu litunga lya Mbenjamani na zintandila zazinguluka Yelushalema namu minzi ya mu litunga lya Yunda, matanga a bimuna akekala mu ngovu zanowo wawalamanga, eshe nisho anamba Nyambi ya Ngula.
14Nyambi ya Ngula ukwamba ngayi, “Shikati shikeza oho nikenzalisha bikulupisho byami obyo natendele na baka litala lya Ishalela na Yunda.
15Mu matena owo na shikati osho, nikahata mwene wakwoloka ku bazukulya Ndavita.
Uya mwene ukalela na ngana,
ukatenda byabiwahe na bya kupwisha mu litunga.
16Bantu bamu Yunda bakapuluka
kami baka Yelushalema bakekala mu ku mwena.
Pe lukena lwa Yelushalema bakalutumba ngayi,
‘Nyambi ya Ngula niye kupuluka kwetu.’ ”
17Nyambi ya Ngula ukukulupisha ngayi, “Shikati nimwasho kukekala muzukulya Ndavita kwinga mwene wa Ishalela. 18Shikati nimwasho kukekala bakankombela ba ku mushobo wa Balevi baya bakantendela mulimo wa ku kombelela nkombela ya kuhokesha na ntupu za zimpeka na zinkombela zamina.”
19Nyambi ya Ngula wambile kuli Yelemiya ngayi, 20“Ndi mu kumanisha kulimama kwami na mwaana na wushiku, pe mwaana na wushiku kukeza ha shikati shabyo byamonekanga bifwako, 21niho kami kulimama kwami na mukamulimo wami Ndavita kukatendiwa noho pe ukabula mwana wa mulume wakumushwana ha litanda lyendi, shikenga noho kami na kulimama kwami na bakankombela ba ku mushobo wa Balevi aba ba kutenda mulimo wami. 22Nikavulisha bazukulya mukamulimo wami Ndavita na bakankombela ba ku mushobo wa balevi aba bantendelanga mulimo, kowa muntu wakutwesha kubalaba, bakafweka ngonehe nyenye hinge ngonehe lihekelela lya ku shibumbo sha liwate.”
23Nyambi ya Ngula wambile kuli Yelemiya ngayi, 24“Kati kutosha ebye bali na kwamba aba bantu ngayi, Ami nakana Ishalela na Yunda, ba lupashi babili baya nahatile wufwako ndi? Nehe nisho banankana bantu bami, ku bahanganika kwinga litunga ku meho wami nifwako. 25Ngoboni Ami Nyambi ya Ngula nalimamine na mwaana na wushiku, kami natendele ndayano za kwendesha liyilu na kaye. 26Nohobene nikalama kulimama kwami na bazukulya Yakobo na Ndavita mukamulimo wami, nikahata umo ku bazukulyendi ngayi bakalele bazukulya Abulahama na Ishaki na Yakoba. Nikabwesha bantu babo, kami nikaholola nceshe kukwabo.”
Currently Selected:
Yelemiya 33: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
