Hoshiya 10
10
1Ishalela mukolobozi ukuyima shikuma mikabo ya shinyanca. Oho yikavulisha kuzika tuula, oho litunga lyendi likutangama, pe niye kami ukuvulisha kulitendela tunankishi. 2Mitima yabo yikwinga ya mahalo ku meho a Nyambi. Haya bali na mulandu Nyambi ya Ngula ukamungozola tuula twabo na kulobesha mamanya abo akulemeshela anemana.
3Haya nehe bakamba ngayi, “Tufwaye mwene ndaba kaliha tukutina Nyambi ya Ngula pe mwene ukututendela bishini?” 4Bakwamba mazu owa na kulibeza bya mahalo oho ba kulimama, pe haya kuyatiwa kukeza hahabo kukenga ngo nyawe ya kalowa mu mafuba abo.
5Bantu ba Shamaliya ba kukanka, oho kanankishi ka namani ya ngombe kaku Mbeti Abeni kakabipishiwa. Bantu bendi bakalila, kami bakankombela babo bakakulemesha tunankishi bakalila ha banyambi babo, ndaba maleema wendi nimwawo anamana. 6Aka kanankishi bakakatwala ku Ashiliya kwinga ntupu ya mwene wamunene. Efulemu ukayuvwa lisheni na Ishalela ukayeneshiwa, ndaba ya kubela kwa mahalo akukonka. 7Mwene wa Shamaliya ukakukulukila kwakutali ngo katondo kali ha mema. 8#Luka 23:13; Kuh 6:16. Tuula twa kulemeshelaho banyambi bowa bya Baishalela ba kubipishilaho bikalobeshiwa. Mihongela na nyawe yikamena ha tuula twabo. Bantu bakamba ku mapili ngayi, “Tufwikenu,” naku twina ngayi, “Wilenu hahetu.”
Nyambi ya Ngula ukuyata Ishalela
9Nyambi ya Ngula ngayi, “Baishalela shilolo bashiye wubi kufuma ku matena a Ngimbiya. Nohobene nzita yikabawana ku Ngimbiya. 10Nikalwisha aba bantu baka wubi na kubashushula, pe matunga akalikungulula na kubalwisha, kami bakashushuliwa ndaba ya wubi wabo wawingi shikuma.
11“Efulemu wengile ngo mwana ngombe wafundishiwile mwa kupumpwila loto. Ha ncingo yendi yayiwahe na yakaho mpongoho ngayi atende mulimo wawulemu shikuma. Nikushinga ngayi Yunda alimenga, Yakobo aye na kupumpulula mashinde. 12Lishangilenu kwoloka, pe mukateza mfuywezi zami za shishemo sha kubula kumana. Shendekenu mafuba wenu a nteme amu mitima ndaba shikati sha kushingashinga Nyambi ya Ngula shinakumu. Shingashingenu Nyambi ya Ngula hantu nezi na kumi lokeshela mvula wakupulwisha. 13Ngoboni munashanga wubi, pe munateze bya kubula kwoloka, munali mikabo ya mahalo.
“Muna kulupili mu makoloyi enu na mu wingi wa bantu benu bangovu. 14Nohobene mishunga ya nzita yikeza mukati ka bantu benu, pe bipata byenu nimwabyo bikawa, nehi Shalumani anyemwine munzi wa Mbeti Alibele ha mutena wa nzita. Bamandizabo bazihiwile kumo na bana babo. 15Eshe nisho shikatendiwe kukwenu bantu ba ku Mbetele ndaba ya wubi wenu wawingi. Nzita yikatatika lumenemene, na mwene waku Ishalela ukazihiwa.”
Currently Selected:
Hoshiya 10: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
