Ezekiyele 43
43
Nyambi ya Ngula ukubokela ku Litala lyendi
1Kunyima yanebye nimwabyo ou muntu wantwalile ku lipangati elye lyapenzele ku mushamuko. 2Kuyo nakamonene wuwahe wa Nyambi wa Ishalela ufuminina ku mushamuko, lizu lya Nyambi lya vumine ngonehe kuyunga kwa liwate na kaye kabyazimine na wuwahe wendi. 3Eshe shimono namonene shengile ngonehe shiya namonene oho Nyambi ezile mu kulobesha Yelushalema na shamina namonene ku mushinzi wa Kemba. Niho nawile kukinka lupala hanci. 4Wuwahe wa Nyambi wapitile mu lipangati lya ku mushamuko na kwingina mu Litala lya Nyambi ya Ngula.
5Moyo wa Nyambi wankatwilile muyilu na kuntwala mukati ka shinzanza sha shipango, oku namonene wuwahe wa Nyambi ya Ngula unenzala mu Litala lyendi. 6Oho uya mulume wemanine kunkumo yami, pe nayuvwile muntu wamina wambilenga kukwami kufuminina mu Litala lya Nyambi ngayi, 7“Mwana muntu, lino nilyo litanda lyami, mwanya ou nikulyatila mawulu wami, oku nikekala hakati ka bantu baishalela mwaya myaka. Baishalela hinge bamyene babo bafwako kami kukahandula lizina lyami lya kuyela, mu kulemesha banyambi bashenge hinge kufunda bamyene babo ku myanya ya kulemeshela. 8Bamyene batendele bihala bya kubipana na bikwiliti bya ku musheke wabo kwakwipi na bihala bya kubipana na bikwiliti bya ku litala lyami, nohobene kwekalile tuhu kembi mukatiketu. Nibo bahandwile lizina lyami lya kuyela ku byuma nimwabyo bya wunyengwe, nohobene mu kupilama kwami nabalobeshele. 9Haya balehe kulemesha tunankishi, pe bafumishe mituntu ya bamyene babo, hinga yikala hahepi na nami ndi bakatenda noho pe ami nikekala mukati kabo mwaya myaka.”
10“Obe mwana muntu, tongweza baka Ishalela bya Litala lya Nyambi, eshe likumonekelamo naneshe lyatendiwililemo. Ubayuvwishe lisheni, ha wubi wabo ba kutenda. 11Niho ndi ba kuyuvwa lisheni hanebye banatende, batontwelele bya Litala lya Nyambi, kufundiziza kwalyo, menginino alyo na matutikilo, shifwekesha shalyo, osho byuma nimwabyo binawahishiwi na ndayano zalyo na biheka byalyo. Batikitile ebye nimwabyo ngayi bakamona shuma nimwasho eshe shinawahishiwi na kushimba ndayano nimwazo. 12Eze nizo ndayano za Litala lya Nyambi, mwanya nimwawo unalizinguluku hayilu ya lipili unengi wa kuyela shikuma.”
Kaala
13Oku niko kufwanikiza kwa kaala, kuliyavwisha bipimisho bimo ngonehe mu kufwanikiza Litala lya Nyambi. Nimwako kuzinguluka ku nceto ya kaala kwekalile liteke lya mashentimita 50 mu kunonka na mashentimita 50 muwipi na kantamba kunkumo ha munkanda kengile mashentimita 25 mu wutali. 14Kaala katendiwile mu zimbalila zihatu, mbalila ya ku nceto shikuma yengile mita yimo kwiza hayilu, ya wubili wengile wa kunyima kufuma kunkumo kuzinguluka nimwako kwengile mashentimita 50 pe yengile mamita abili kuya muyilu. Mbalila ya wuhatu yafuminine kunyima kunkumo kuzinguluka nimwako. 15Mwanya ou uli hayilu, haya ha kuhokeshela zinkombela, engile mamita abili mu wutali. Biya byahongomoka biya byekalile mu zimbango zinaa byengile byabitali shikuma kupitakana hayilu nimwaho. 16Hayilu ya kaala hengile ha kulyezekela mu zinkomi nimwazo, engile mamita mutanu na yimo kumbalila na kumbalila. 17Mwanya wa mukati walyezekele zimbalila nimwazo, engile mamita mutanu na abili mbalila na mbalila na nisho shayakiwile kunyima shengile sha mashentimita 25 mu wutali wa hayilu. Liteke lya kupitishila mukeza elye bayakileko lyengile mashentimita 50 mu wutali. Tukandamisho twa kukandamina ha kuya kuyilu ya kaala twekalile kumbalila ya ku mushamuko.
Kuzilika Kaala
18Nyambi ya Ngula wambile kukwami ngayi, “Mwana muntu, eze nizo ndayano za ha kaala. Kaala oho kakuzikiwa, obe ukukazilika ha kuhokeshela zintupu na kumyanzila mukeza wa batuyamana baya banakombelele. 19Bakankombela ba ku mushobo wa Levi, bazukulya Zandoki nibo bakeza hambili yami mu kuntendela milimo, Ami nili Nyambi ya Ngula nalaya ebye. Ukapana bakankombela nkunzi wamushe wakutupula kwinga ntupu ya ha wubi. 20Ukashimbe mukeza wamina na kuyakawo mu zinkomi za hayilu ya kaala na ha zinkomi za kumbalila ya hakati ka kaala na kuzingwilisha kuzinkumo zasho nimwazo. Muntendelo eye ukayelesha kaala na kukazilika. 21Ukashimbe nkunzi uya unatupuliwi kwinga ntupu ya ha wubi na kumuhokeshela ku mwanya unamoneshiwi ha munkanda wa Litala lya Nyambi. 22Pe kwakasha ukashimbe mpongo wa shikungwe uya wakubula nyanco na ku mutupula kwinga ntupu ya ha wubi. Yelesha kaala na mukeza wanou kayamana ngonehe eshe watendele na uya nkunzi. 23Wakamanisha kutenda noho, ukatupule nkunzi na mwana mbelele nimwabo bakubula nyanco. 24Ukabitupule kuli Nyambi ya Ngula, pe bakankombela bakakubeho mushele na kubahokesha kwinga nkombela kukwami. 25Ha mutena ha mutena, ha matena mutanu na abili ukatupule mpongo, nkunzi na shikungwe wa mbelele kwinga ntupu ya ha wubi, nimwabo banafwanini kwinga bakubula nyanco. 26Ha matena ayo mutanu na abili bakankombela bakazilika kaala na kukawahisha ha kutendeshako. 27Oho matena mutanu na abili anamana, bakankombela bakatatike kutupula ntupu ha kaala, ntupu ya kuhokesha na ntupu ya kulilumikila na bantu. Niho ami nikawahilila nanenu nimwenu, eshe nisho nikwamba Ami Nyambi ya Ngula.”
Currently Selected:
Ezekiyele 43: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
