Ezekiyele 42
42
Matala abili kwakwipi na Litala lya Nyambi
1Niho ou muntu antwalile ha munkanda wa shipango sha shinzanza na kuntwaminina ku litala lya ku ncelele kumbalila ya Litala lya Nyambi, kaliha kwakutali na litala lya ku mponci ya Litala lya Nyambi. 2Elye litala lyengile mamita makumi mutanu mu wutali na mamita makumi abili na mutanu muwipi. 3Kumbalila yimo ya tilaminine ku mwanya wakunkumo ya Litala lya Nyambi, yengile mamita likumi muwipi, lyamina lya tilaminine na nzila ya kulambulula ha kuyala mamanya, yekalile ha munkanda wa shipango. Yatendiwilile mu zimbalila zihatu, limo na limo lyayakiwile kunyima lili mu nceto yalyo. 4Kumbalila ya ku ncelele ya litala elye kwekalile nzila ya kupitila ya mamita mutanu muwipi na mamita makumi mutanu mu wutali na menginino kumbalila yayo. 5Tumpenci twa kuyilu twengile twatushe kupitakana tuyo twa hakati na twa ku nceto nitwo twayakiwile kunyima shikuma. 6Tumpenci tuhatu nimwato twekalile twakwezekela hamo twemanine ha limvu kami kaliha twashumine ha zimpangwa ngonehe matala amina amu shipango. 7Pe kuyo kwekalile kembi kunkumo ya tumpenci na kunkumo ya shipango ha munkanda hambili ya tumpenci, pe mu wutali walyo lyengile mamita makumi abili na mutanu. 8Otu tumpenci twekalile ha munkanda wa shipango twengile mamita 25 mu wutali, pe hambili ya Litala lya Nyambi ya Ngula yengile mamita 50. 9Ku mamaninino a tumpenci twa ku nceto kwekalile shipana ku mushamuko shakwinginina mu shipango, kufuma oku kembi katatikilile. 10Kumbalila yaku mabukubuku a Litala lya Nyambi, kwekalile litala lya kulifweka lyekalile hahepi na litala lya ku mponci kunkumo ya Litala lya Nyambi. 11Hambili ya tumpenci kwekalile nzila ngonehe yiyo ya kumbalila ya ku ncelele. Yengile ya kufwanikizila hamo na ntendelo yimo na mengino akulifweka. 12Kwekalile bipana kumbalila yaku mabukubuku, ku mushamuko kunkumo oku kwatatikilile limota.
13Niho uya muntu wambile kukwami ngayi, “Nimwawo matala awa abili anengi akuyela, omu bakankombela bakengina kuli Nyambi ya Ngula na ku lilako zintupu za kuyela shikuma. Bakankombela bakayakamo zintupu za kuyela, zintupu za mpeka, zinkombela za kutupuliwa ha wubi hinge za kulyambwilila, ndaba mwanya wa kuyela. 14Oho bakankombela banekala mu Litala lya Nyambi ya Ngula, pe bakushinga kuya ha munkanda wa shipango, banafwanini ku shiya bivwalo banaliyavwishinga ha kutenda milimo kuli Nyambi ya Ngula. Banafwanini kuvwala bivwalo byashenge oho shilolo baye ha munkanda kumbalila oku banakungulukili bantu.”
Kufwanikiziwa kwa mwanya wa Litala lya Nyambi
15Oho ou muntu amanishile kufwanikiza mwanya wa mukati ka Litala lya Nyambi, wantwalile ha munkanda mu kututikila ku shipana sha ku lipangati lya ku mushamuko pe niho afwanikizile mwanya wa ha munkanda. 16Niye washimbile muwana wendi wakupimisha na kufwanikiza mbalila yimo yaku mushamuko, yengile mamita 250. 17Niho kami akapimine kumbalila yaku ncelele, wapimineko mamita 250. 18Niho afutukile na kupima kami kumbalila yaku mabukubuku, wapimineko mamita 250. 19Niho afutukilile na kupima kami kumbalila yaku mponci, wapimineko mamita 250. 20Nohobene wafwanikizile zimbalila nimwazo zinaa, pe kwekalile kembi kazingulukileko, nimwako kengile mamita 250 muwipi na mu wutali. Nibo bafwako kutapulula mukati ka nebye binengi bya kuyela na nebye bya kubula kuyela.
Currently Selected:
Ezekiyele 42: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
