Ezekiyele 26
26
Kulubulula bya munzi wa Tile
1 #
Isha 23:1-18; Yowe 3:4-8; Amos 1:9-10; Zaka 9:1-4; Mat 11:21-22; Luka 10:13-14. Ha mutena wakutatika wa ngonda mu mwaka wa likumi na umo Nyambi ya Ngula wambile kukwami ngayi, 2“Obe mwana muntu, eshe nisho baliyemezele ba mu Tile. Nibo bambile ngayi, ‘Yelushalema ou munzi wa mikwebo unashiwuku. Mapangati wendi anashinkuluku kukwetu, kami kukomiwa kwendi kukatuhetesha.”
3Nyambi ya Ngula unakwamba ngayi, “Ami na kukushushula obe munzi wa Tile. Ami nikaleta matunga amengi mu kukulwisha, akeza ngonehe mankanyi amu liwate. 4Nibo bakalobesha twimbi twa Tile na kuwishila tupeshi twobe hanci. Niho nikakomba ndoba nimwayo na ku shiya limanya ha nahiya. 5Bakakuziha zinci bakayanikangaho tunyanzi haya ha limanya hakati ka liwate.” Eshe nisho na kwamba Ami Nyambi ya Ngula.
“Matunga akapukula Tile, 6kami bantu bamu minzi yendi ya ku lukandwa bakazihiwa na mikwale. Niho bantu ba ku Tile bakalimuka ngayi Ami nili Nyambi ya Ngula.”
7Nyambi ya Ngula unakwamba ngayi, “Nikaleta mwene wakukangana ku nimwabo, mwene Nembukandineza wa Mbambiloni mu kulwisha Tile. Niye ukafuminina ku ncelele na bakanzita babengi na bambishi na makoloyi na bakanzita bakakukandama ha bambishi. 8Niye ukaziha bantu baya bali ha lukandwa na mikwale. Mukankole wobe ukakaba mateke na kubumba mishimino na kutenda limota lya makebo akumikinga. 9Nibo bakatwa mu twimbi twenu na mitondo. Bakashiwulula tutambo twenu na mikambo ya byondo. 10Lukungu lukakatuka na bambishi bendi lukamifwika. Oho bakatubula mapangati na kwingina mu lukena, miyoyo ya bambishi bendi bakakoka makoloyi akakoka makoloyi amanene na wamashe akakankisha twimbi twobe. 11Bantu babo bakakukandama ha bambishi bakawuluta ha kupita mu mikwakwa yobe, nibo bakaziha bantu bobe na mikwale. Bishimi bya kushumisha twimbi twobe bikashiwukila hanci. 12Bakankole benu bakabipisha wuheti wenu na zindando. Kami bakawisha twimbi na kucancola matala wenu amawahe. Nibo bakashimba mamanya na bitondo na byuma nimwabyo bya kucancoka kubiyumbila mu liwate. 13Ami nikamanisha nyimbo zenu nimwazo na kumwenesha mushumina wa tuhanzi twenu. 14Nikamitenda ngo hayilu ya limanya oho bakakuziha zinci bakayanikangaho tunyanzi twabo. Lukena lufwako kami kukatendululiwa.” Eshe nisho ninamba Ami Nyambi ya Ngula.
15Nyambi ya Ngula unakwamba ku lukena lwa Tile ngayi, “Enu oho mukakoniwa, bantu aba bekala ha shibumbo sha liwate bakatinishiwa ku kushunga kwenu oho mukapondiwa. 16#Kuh 18:9-10. Bamyene nimwabo ba ku mawate bakafuma ha matanda wabo. Bakafumisha maponda wabo na kuvwula bivwalo byabo bya kubalanga na kwikala hanci hibakanka. Bakatina na kukanka, bakalikomokela shikuma hahobe. 17Bakembila lwimbo lwa malila ngayi,
‘Lukena lwa mpupo lunanongeshiwi,
wato wawo unafumishiwi ku liwate.
Bantu ba mu lukena olwe bengile ba kushuma mu mawate,
na kutinisha bantu nimwabo aba bekalilenga ha shibumbo sha liwate.
18Ha mutena waku wa kwobe bikuli bikakanka,
na bantu babo bakakanka ha kunonga kwobe.”
19Nyambi ya Ngula unakwamba ngayi, “Ami nikamilobesha mukenga ngonehe mapembe a kubula kwikala muntu. Nikamikupula na mema a mampunga a liwate. 20Ami nikamitandila ku litunga lya bafu mukaliwane na bantu aba bekalilengako babikati bya kunyima. Nikakwikalisha mu kalunga ka bafu hakati ka mapembe, mukalama makunge a bafu. Kuyo mufwako kami kukaboka na kushimba mwanya wenu mu litunga lya babomi. 21#Kuh 18:21.Ami nikamitenda kwinga shimonekesho sha kutinisha, pe akenga mamaninino wenu. Bantu bakamishinga, ngoboni enu mufwako kukawaniwa.” Eshe nisho anamba Nyambi ya Ngula.
Currently Selected:
Ezekiyele 26: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
