Ezekiyele 25
25
Kuyata Kwa Nyambi Ha Matunga
25:1—32:32
Kulubulula bya Amoni
1 #
Yel 49:1-6; Ezek 21:28-32; Amos 1:13-15; Zefw 2:8-11. Nyambi ya Ngula wambile kukwami ngayi, 2“Obe mwana muntu, bilika ulubwilile bakalitunga lya Amoni. 3Tongweza Baamoni bayuvwilile kunebye nikwamba Ami Nyambi ya Ngula ngayi, enu mwawahililile ha ku mona litala lyami likuziluluka na ha ku mona litunga lya Ishalela linonga, ha ku mona baka Yunda hibatwaliwa mu wuntapwa. 4Nohobene niketabilisha bakufuma ku mushamuko ngayi bamikone. Nibo bakatunga minzi na kwikala mu litunga lyenu. Bakalya mikabo na kunwa mahwe biya byengilenga byenu. 5Ami nikafutula munzi wa Lamba kwinga mwanya wakubuyishila bakamela na litunga nimwalyo lya Amoni kwinga mwanya wakukongelanga bambelele. Niho mukalimuke ngayi Ami nili Nyambi ya Ngula.”
6“Eshe nisho na kwamba Ami Nyambi ya Ngula ngayi, ‘Enu mwakambililile mu maboko wenu na kukiloka ha ku wahilila na kuhandula litunga lya Ishalela. 7Ndaba yanebye mwatendele, ami nikamipanika ku matunga ngayi mwanga akamipukule. Nikaminongesha nimwenu nahiyo ngayi mwanga mukabule kukenga mukoka, hinga kukekala na litunga lyenu kami. Niho mukalimuke ngayi Ami nili Nyambi ya Ngula.’”
Kulubulula bya Mowambi
8 #
Isha 15:1—16:14; 25:10-12; Yel 48:1-47; Amos 2:1-3; Zefw 2:8-11. Nyambi ya Ngula unakwamba ngayi, “Litunga lya Mowambi linakwamba ngayi Yunda unengi ngonehe matunga amina nimwawo. 9Nohobene Ami niketabilisha minzi ya kinga nginza ya baka Mowambi ngayi yikalwishiwe, hamo na ziya zinkena zaziwahe, Mbeti Yeshimoti, Mbaalu Meyoni na Kiliyatayimu. 10Ami niketabilisha matunga aku libelelengwa lya ku mushamuko ngayi akakone Mowambi hamo na Amoni, ngayi Mowambi ukabule kwinga mukoka kami. 11Ami nikashushula baka Mowambi, nibo bakalimuka ngayi Ami nili Nyambi ya Ngula.”
Kulubulula bya Endoma
12 #
Isha 34:5-17; 63:1-6; Yel 49:7-22; Ezek 35:1-15; Amos 1:11-12; Omba 1-14; Mala 1:2-5. Nyambi ya Ngula unakwamba ngayi, “Bakalitunga lya Endoma babweshele nguma kuli Yunda, haya kubweshela kwabo kunalete mulandu wa wunene shikuma ku Endoma. 13Nohobene Nyambi ya Ngula unakwamba ngayi, ‘Nikashushula Endoma na kuziha bantu nimwabo na tuyamana tulimo. Ami nikabipisha liyo litunga na kulifutula mapembe, kubalikila munzi wa Temani kutwala ku munzi wa Ndendani. Nibo bakazihiwa na mukwale. 14Nikabweshela nguma ku Endoma, ndaba ya bantu bami baka Ishalela, kami bakayuvwisha Endoma kupilama kwami kwakunene. Endoma ukalimuka eshe shikutontoloka kubweshela kwami.” Eshe nisho anamba Nyambi ya Ngula.
Kulubulula bya Fwilishita
15 #
Isha 14:29-31; Yel 47:1-7; Yowa 3:4-8; Amos 1:6-8; Zefw 2:4-7; Zaka 9:5-7. Nyambi ya Ngula unakwamba ngayi, “Bakalitunga lya Fwilishitina banabweshele nguma ha bakankole babo ba mwaka na kubanongesha munzimbo. 16Nohobene Nyambi ya Ngula unakwamba ngayi, ‘Ami nikalwisha baka Fwilishita na kubanongesha. Nikanongesha bantu ba Keleta nimwabo muyo mumbuwa ya baka Fwilishitina. 17Ami nikabashushula shikuma na kubweshela nkole yayinene hahabo, kami bakayuvwa kupilama kwami. Niho bakalimuka ngayi ami nili Nyambi ya Ngula.’”
Currently Selected:
Ezekiyele 25: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
