Ezekiyele 14
14
Nyambi ukunyanca bakakulemesha tunankishi
1Bakulwane bamo ba baishalela bezile kukwami na kunyipula shifungo sha Nyambi. 2Niho Nyambi ya Ngula ambile kukwami ngayi, 3“Mwana muntu, aba bantu banatwala mitima yabo kutunankishi kami ba kuleha tunankishi ku batwaminina mu wubi. Kampe nibo bakuhanganika ngayi ami nikaba kumbula ngonehe bakushinga ndi?
4“Haya obe wambe kukwabo ukabatongweze ebye nikwamba kukwabo Ami Nyambi ya Ngula ngayi, ‘Kaishalela nimwendi ou ukezeka kulemesha tunankishi na kutuleha hitu mutwala mu wubi. Haya hakwiza kuli muluwe ngayi, niye ukawana kukumbula kwami. Nikwo kukenga kukumbula oku tunankishi twendi twatwingi tunashinginga. 5Otu tunankishi nimwato tunashanwishi baka Ishalela kubafumisha kukwami, ngoboni mu kukumbula kwami nikulumbeza kubwesha bamo kukwami.’
6“Nohobene, tongweza baka Ishalela ebye nikwamba Ami Nyambi ya Ngula ngayi, ‘Tengulukenu mushiye tunankishi twenu twa wunyengwe.’
7“Oho muntu nimwendi waku Baishalela hinge muntu waku bayeni ou wekalanga mu likunge lya Baishalela wafumu kukwami na kupukala kutenda wubi ha kulemesha tunankishi na kuya mu kushingishisha byami kuli muluwe, Ami Nyambi ya Ngula nikamukumbula. 8Pe nikamukanangana, nikatenda shihembwilizo hahendi. Nikamufumisha ha muhoko wa bantu bami, nohobene enu mukalimuka ngayi Ami nili Nyambi ya Ngula.
9“Haya ndi muluwe akushanuka mu kulubulula bya mahalo, ndaba Ami Nyambi ya Ngula namushanwishi. Nikamufumisha na kumushushula ku Baishalela. 10Nimwabo wubili wabo muluwe na muntu ou walyambashanine nendi bakawana kashushwilo kamo. 11Nikatenda eshe kukanisha baka Ishalela ngayi hinga batinanga kukwami na kulibipisha nibo bamwine na wubi wabo. Nibo bakenga bami na nami nikenga Nyambi yabo.” Eshe nisho anamba Nyambi ya Ngula.
Nowa na Ndanyele na Yobo
12Nyambi ya Ngula wambile kukwami ngayi, 13“Mwana muntu, ndi litunga likabipisha na kubula kukulupila kukwami, Ami nikatutika na kulobesha byakulya byabo. Nikatuma kapande na kuziha bantu na batuyamana nimwabo. 14Hinge ndi obo balume bahatu, ba Nowa na Ndanyele na Yobo bekalilenga kuyo ndaba ya kukulupila kwabo batweshele tuhu kulilamwina nibo bamwine,” Eshe nisho anamba Nyambi ya Ngula.
15“Hinge ndi nikatuma batuyamana ba lishaka mu kuziha bantu na kwingisha litunga malamo shikuma shinga kowa muntu wamina wakutwesha kwendamo, 16hinge ndi obo balume bahatu bekalile kuyo, mwa shikuma ami, Nyambi ya Ngula Ami nili Nyambi wakuyoya, nibo kutwesha kulamwina banababo bafwako. Nibo tuhu shinga balilamwina ngoboni litunga shinga lyafutukile lipembe.
17“Hinge ndi nikaleta nzita ku litunga liyo na kutumako bilwisho bya malwa bya kuketola bantu na batuyamana nimwato, 18hinge ndi shinga obo balume bahatu bekalilenga kuyo, mwa shikuma nehebene ami, Nyambi ya Ngula ami Nyambi wakuyoya, shinga bafwako kutwesha hinge kulamwina banababo, ngoboni shinga tuhu banalilamwini nibobene.
19“Hinge ndi nikutuma malweli akuliyambukila ku litunga liyo, mu kupilama kwami nikuziha myoyo yayingi ya bantu na tuyamana, 20hinge ndi Nowa, Ndanyele na Yobo bekalile kuyo, mwa shikuma nehe Ami Nyambi ya Ngula, nili Nyambi wakuyoya, shinga kaliha batweshele kulamwina bana babo. Kulunga kwabo shinga kwa lamwina tuhu nibo.”
21Eshe nisho anamba Nyambi ya Ngula ngayi, “Ami nikatuma tushushwilo twami tunaa ku Yelushalema, nzita na kapande na batuyamana ba lishaka na malweli, mu kulobesha bantu na batuyamana nimwabo. 22Nohobene ndi muntu wamina ukapuluka na kulamwina bana bendi, batilamine oho bakwiza kukwobe, kami ukakomoka ngayi kashushwilo kaya nikuleta mu Yelushalema kakupwisha. 23Obe ukakomoka oho ukamona wubi wabo, pe obe ukalimuka ngayi kuli shuma ukayuvwishisha shaleteshele kunebye natendele.” Eshe nisho anamba Nyambi ya Ngula.
Currently Selected:
Ezekiyele 14: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
