Amoshi 8
8
Shimono sha shibondo sha mikabo
1Eshe nisho amoneshele Nyambi wa Makunge namonene shibondo sha mikabo ya mayinza. 2Wanyipwile ngayi, “Unaku mona bishini Amoshi?” Nakumbwile ngayi, “Shibondo sha mikabo ya mayinza.” Nyambi ya Ngula wambile kukwami ngayi mamaninino a bantu bami ba Ishalela anakumu, kuka bayatila kami nifwako. 3Ha mutena uyo nyimbo za mu Litala lya Nyambi, zikenga za mbingo, nimwamo mukakwalama mituntu ya kufwa, iya yikayumbiwila mu mwanya nimwamo hinga kwa mwena.
Kuloba kwa Ishalela
4Yuvwililenu eshe, enu mu kulyatilila bakakubula shamina na kukoma bancepwe bamu litunga, 5na kwamba ngayi, “Kutelama kwa ngonda wamupya kukamana mutena ngani ngayi tulandishe byakulya? Na Mutena Wakukatala ngayi mwanga tulandishe loto, ngayi tukashepeshe bya kulandishila na kunenehesha ndando, pe tukalandisha na kukeyela, 6ngayi mwanga tukalande bantu bakulunga banakwanga kuyumba mukuli na shiliva na ba kushepwa banakwanga kuyumba mukuli wa makatulo.”
7Nyambi ya Ngula nalibeze niyemwine, kuliyemeza kwa Yakobo ngayi, “Mwa shikuma kukavulama hinge shuma shimo kunebye batendele nifwako. 8Kati litunga kuka kanka ha shuma eshe lifwako, ngayi mwanga bantu nimwabo bekalamo bakalile ndi? Nimwalyo lika katuka ngonehe mema amu mushinzi wa Nayilo na kukwancanishiwa pe likunyomena kami ngonehe mushinzi wa Nayilo mu Engepita.”
9Nyambi wa Makunge ukwamba ngayi, “Ha mutena uyo nikalelesha mutena shikati sha mwana mukati ka mutwe na kuleta mincimpwe hanci shikati sha mwaanancanana. 10Nikafutula bimbo byenu kwinga malila na nyimbo zenu nimwazo zikenga mbingo. Nikamona ngayi nimwenu munavwala bincancolo, pe mukatewula mitwe yenu. Malila a mutena uyo nikawenga ngo muntu ukulila mwanendi wa mulume wa mweli umo tuhu, pe mamaninino wawo ukenga ngo mutena wawululu.
11“Nyambi wa Makunge ukwamba ngayi, matena akeza, oho nikaleta kapande mu litunga, kaliha kapande ka byakulya, hinge linyontwa lya mema, ngoboni kapande kakuyuvwa lizu lya Nyambi ya Ngula. 12Bantu bakaya na kuyambangila, kufuma ku liwate limo kuya ku liwate lyamina na kufuma ku ncelele kuya ku mushamuko. Bakayituka kufuma kumbalila yimo na kwitukila ku mbalila yamina, kuya na kushinga lizu lya Nyambi ya Ngula. Ngoboni kukaliwana bafwako.
13“Ha mutena uyo, batunkanga babawahe na bandumbana babawahe, bakalunguka ku linyontwa. 14Baya bakulibeza na wubi wa Ashima nyambi wa mbuyama waku Shamaliya na kwamba ngayi, ‘Ngonehe akuyoya nyambi wa Ndani, hinge eshi akuyoya nyambi wa Mbelishemba,’ bakawa, kami kukapinduka bafwako.”
Currently Selected:
Amoshi 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
