Milimo 20

Paulu ukuya ku Mashendoniya na Akaya

1Oho mushunga wamanine, Paulu wehanine bandongesha, wambile mazu akubashumisha, niho abashalishile, pe wayile ku Mashendoniya. 2Wapitile mu litunga liyo, hamba mazu amengi akushumisha bantu, niho akumine mu litunga lya Ngilishi. 3Muyo Paulu wekalilemo zingonda zihatu. Oho aliwahishilenga bya kuya ku Shiliya, wayuvwile Bayunda bayongwelenga bya kushinga kumubeba, pe wahanganikile kuboka kupitila nzila ya Mashendoniya. 4Shopatele mwana Pilihashi waku Mbeliya wayile nendi na Alishitakashi na Shekundoshi ba ku Teshalonika na Ngayushi wa mu Ndeliba na Tikikashi na Tolofwimashi ba mu litunga lya Esha na Timoteo, bayile na Paulu. 5Aba bantu batwaminengaho, pe bakatutatilile ku Tolowashi. 6Twafumine mu Fwilipu na wato, munyima ya Shimbo sha Mankende A kubula Mumena, oho kwapitile matena mutanu, twakalifungilile nabo mu Tolowashi, muyo twekalile matena mutanu na abili.

Kuzingula kwa Paulu kwa mamaninino ku Tolowashi

7Ha mutena wakutatika mu Shunda, oho twakungulukile hamo na kupabula mankende, Paulu washimikilile ku bantu, wazaminine kwamba kukuma na hakati ka wushiku, ndaba wekalile na mukala ha mutena wakushako. 8Kwekalile zilambi zazingi mu kampenci litala liyo lya kuyilu muya twa kungulukilile. 9Ndumbana wa lizina lya Yutikashi wekalile mu limpananga hinga alangana shikuma mu tulo, ndaba Paulu washimikilile shikati shashitali. Pe oho alalile tulo shikuma, wawilile hanci kufuma ku litala lya kuyilu lya wuhatu. Pe bamukatwile hinga afwa. 10Ngoboni Paulu wahulukile, wezile kukwendi, wamubumbatilile, wambile ngayi, “Hinga mutina, wushili kuyoya!” 11Niho akandamine kami, pe wapabwile mankende, walile. Wambile kami shikati shashitali, kutwala ku kutabula kwa mutena, niho ayile. 12Batwalile ndumbana ku munzi hayoya, pe nimwabo bawahililile shikuma.

Paulu ukufuma ku Tolowashi kuya ku Miletashi

13Twenginine mu wato, twayile ku Ashoshi na bihanganiko bya kushimba Paulu kuyo. Ndaba nisho atulayile, ngayi niye ukenda ha lukandwa. 14Oho atuwanine mu Ashoshi, twamushimbile, niho twayile ku Mitilene. 15Oho twafumine kuyo, twakumine ku Kiyoshi, pe oho kwashile, twakumine ku Shamoshi. Mutena wakulundaminako twakumine ku Miletashi. 16Paulu wekalile na bihanganiko bya kubula kupita ku Efweshe, ndaba kaliha washingile kwihala mu litunga lya Esha. Wanyankupilenga, ndaba washingile ngayi ndi shikutwesheka, akekale mu Yelushalema, ha mutena wa Pentekoshita.

Mazu a Paulu akushalisha bakulwane ba ku Efweshe

17Oho ekalile mu Miletashi, watumine lizu ku Efweshe kwihana bakulwane ba litengo. 18Oho bakumine kukwendi, wambile kukwabo ngayi, “Mukulimuka eshi ninekalanga nenu shikati nimwasho kufuma ha mutena wakutatika oho nezile mu litunga lya Esha. 19Bayunda bamo banyandishile, pe bandeteshele byezeko. Ngoboni ninatendele milimo Mwene na kulilimbwilisha na mihozi. 20Mukulimuka ngayi kaliha nalimbile shuma sha kumiyavwa, oho na shimikililenga na kumi longesha mwaanancanana na mu matala wenu. 21Napakile ku Bayunda na ku Bakamatunga, bya kutengulukila kuli Nyambi na bya kukulupila muli Yeshu Kilishitu Mwene wetu. 22Wuluno monenu, nikuya ku Yelushalema, ninaombatala Moyo wa Kuyela na kubula kulimuka ebye bikatendiwa hahami kuyo. 23Nikulimuka tuhu ngayi, mu munzi nimwawo, Moyo wa Kuyela unantongweze ngayi tolongo na makalikiza bili na kuntatilila. 24#2Tim 4:7. Hinge noho, kulaba wumi wami ngayi shinengi shuma shashinene kukwami nifwako, ngoboni nikushinga kumanisha mukala wami na mulimo ou ampanine Mwene Yeshu ngayi niwutende. Mulimo wa ku shimikila ncango zaziwahe za shishemo sha Nyambi.

25“Napitilenga mukati kenu hinishimikila bya Wene wa Nyambi, haya kukamona kami mufwako. 26Nohobene nikumitongweza kupwisha lelo ngayi, ndi umo hakati kenu ukuyongala, ami kukekala na mulandu nifwako. 27Ndaba kaliha nalimbile kumishimikila shifungo sha Nyambi nimwasho. 28Nohobene lilamenu enu bamwine, kami lamenu litanga nimwalyo, elye Moyo wa Kuyela anamingi bakakulama. Lishenu litengo lya Nyambi, elye awanine na mukeza wa Mwanendi. 29Nikulimuka ngayi ami naya, kukeza bambinzi babakali mukati kenu, baya bakabula ku shiya litanga. 30Kami mukati kenu bantu bakakatuka na kwamba bya kutengama ngayi bakawane bandongesha baya bakabakonka. 31Nohobene tonenu! Anukenu ngayi mu myaka yihatu, mwaana na wushiku nalongeshelenga muntu nimwendi na mihozi.

32“Ngoboni wuluno bawushinda, nikumifungwila kuli Nyambi na ku lizu lya nceshe zendi, elye likutwesha kumi kulisha na kumipanika mfuywezi ziya Nyambi anatentekele bantu bendi nimwabo. 33Kaliha nalishozele shiliva hinge ngolinde hinge bivwalo bya muntu. 34Enu himulimuka ngayi na maboko wami natendelenga milimo ngayi niwane bya kunyoyesha hamo na bya kuyoyesha baya nekalilenga nabo. 35Biya natendele nimwabyo namimoneshele ngayi na kutenda shikuma milimo yanehe, tukutwesha kuyavwa ba kupopa na kwanuka mazu a Mwene Yeshu, oho ambile ngayi, ‘Muli mfuywezi shikuma mu kupanika kupitakana mu kutambula.’ ”

36Oho Paulu ambile ebye, wafunkamine hamo nabo, pe walombelele. 37Nimwabo balilile shikuma, babumbatilile Paulu na kumuzupeza. 38Bayenene shikuma ndaba ya mazu ambile kukwabo ngayi, nibo kukamumona kami bafwako. Niho bamushindikizile kuwato.

Currently Selected:

Milimo 20: LLK

Highlight

Compare

Copy