Milimo 19

Paulu mu Efweshe

1Oho Apoloshi ekalile mu Kolinte, Paulu wendelele matunga a hayilu wakumine ku Efweshe. Kuyo wakawanineko bandongesha bamina, 2pe wabepwile ngayi, “Kati munatambulu Moyo wa Kuyela oho mwengile bakakukulupila ndi?”

Bakumbwile ngayi, “Kaliha twayuvwile ngayi kuli Moyo wa Kuyela.”

3Paulu wabepwile ngayi, “Kati munazubilishiwi na kuzubilisha kwa nahiti?”

Bakumbwile ngayi, “Na kuzubilisha kwa Yowano.”

4 # Mat 3:11; Mako 1:4, 7-8; Luka 3:4, 16; Yowa 1:26-27. Paulu wambile ngayi, “Yowano wazubilishile bantu batengulukile, ngoboni wabatongwezelenga bantu ba Ishalela ngayi ba kulupile kuli ou wezilenga munyima yendi, niye Yeshu. 5Oho bayuvwile ebye, bazubilishiwile mu lizina lya Mwene Yeshu. 6Paulu oho abakambikile maboko, Moyo wa Kuyela wezile hahabo, bambile mu zindimi zashenge, pe balubulwile. 7Bantu aba nimwabo bengile likumi na babili.”

8Paulu wenginine mu shinangonge, pe mu zingonda zihatu ha shimikila na kukanca. Wambilenga na bantu bya Wene wa Nyambi na ku bakowamina. 9Ngoboni bamo bakaluhishile mitima yabo, bakanine kukulupila, banyancile Nzila ya Mwene hambili ya likunge. Paulu wafumine kukwabo, wayile na bandongesha, kami ha mutena ha mutena walongeshelenga mu shikolo sha muntu watumbiwile Tayilanashi. 10Watendele ebye mu myaka yibili, ngayi bantu nimwabo bazikile mu litunga lya Esha, Bayunda na Bakamatunga, bayuvwe lizu lya Mwene.

Bana ba Shikeva babalume

11Nyambi watendele bikomokesho na maboko a Paulu. 12Baletelenga ku bakakukola tutambala na makwiza aya Paulu aliyavwishilenga, bakambikilenga ha bakakukola, pe banyongomaninenga na mayimbwe afumine mumwabo.

13Bayunda bamo banyambangizi bakakwawula, bezekele kufumisha mayimbwe Mwene Yeshu, bambile ngayi, “Mu lizina lya Yeshu ou Paulu ashimikilenga, nikukulayelela ngayi ufume.” 14Batendelenga ebye bengile bana babalume ba mutanu na babili ba Shikeva, Mukulwane wa Bakankombela Nimwabo. 15Ngoboni Mayimbwe akumbwile ngayi, “Yeshu nimulimuka na Paulu nimulimuka, ngoboni enu mulibayani?”

16Niho muntu uyo mukamayimbwe wabakilukilile wabakwatile nimwabo, wabalwishile, pe batininine mu litala liyo muhelengwa kami wabalemekele. 17Bantu nimwabo bekalile ku Efweshe, Bayunda na ba Bakamatunga, oho bayuvwile ebye, batinine. Niho bayemezele lizina lya Mwene Yeshu. 18Bakakukulupila babengi bakungulukile na kulitabila, pe baholwele ntendelo yabo. 19Bantu bamo ku baya batendelenga malele baletele mabuka abo, pe bawahokeshele hambili ya bantu nimwabo. Balabile ndando yawo, bawanine ngayi mali a muwayawaya wa shiliva akushinga kulingana makulukazi makumi mutanu.

20Nohobene lizu lya Nyambi lyahanyine, pe lyashumine shikuma.

Mushunga mu Efweshe

21Munyima ya byuma ebye byatendiwile, Paulu wahanganikile bya kuya ku Yelushalema, kupita ku Mashendoniya na Akaya. Wambile ngayi, “Nakafuma kuyo, niku fwanina kukuma na ku Loma.” 22Niho atumine Timoteo na Elashitashi bakakumuyavwa babili ku Mashendoniya. Ngoboni niye washalile matena amina mu litunga lya Esha.

23Ha shikati shiyo, kwezile mushunga wawunene mu Efweshe ndaba ya Nzila ya Mwene. 24#2Tim 4:7. Mfuzi wamina wa shiliva lizina lyendi Ndemetiliyashi, niye watendele bihanda ha shiliva bya kulemeshelamo Alitemi nyambi wa mukazi, waheteshele shikuma bakamilimo bendi. 25Ndemetiliyashi wakungulwile bantu bendi, hamo na bamina ba mulimo ou, wambile ngayi, “Bawushinda, mu kulimuka ngayi uheti wetu ukufuma ku mulimo ou. 26Munamono na kuyuvwa ebye akutenda ou muntu Paulu. Niye ukwamba ngayi banyambi ba kutendiwa ku bantu kaliha banyambi. Unashanwishi bantu babengi, kami kaliha ku Efweshe tuhu ngoboni na litunga nimwalyo lya Esha. 27Nohobene, kuli wukalu, kaliha tuhu ngayi mulimo wetu ukubipa lizina, ngoboni kami litala lya kulemeshelamo Alitemi nyambi wamunene wa mukazi ukalimbululiwa na wuwahe wendi ukanonga, ou bantu nimwabo ba mu litunga lya Esha na bakakaye nimwabo bakulemesha.”

28Bantu aba oho bayuvwile mazu awa bapilamine shikuma, babilikizile ngayi, “Wamunene Alitemi wa mu Efweshe!” 29Pe munzi nimwawo mwekalile mushunga. Bantu bayo bakwatile Ngayushi na Alishitakashi, bantu ba ku Mashendoniya, bakakushindikiza Paulu, betukile nabo ku litala lya kukungulukila. 30Paulu washingile kwingina hakati ka baya bantu, ngoboni bandongesha bamukanishile. 31Babilolo bamo ba ku litunga lya Esha, obo bengile bahoni bendi, batumine kukwendi na kunyepa ngayi hinga engina mu litala lya kukungulukila. 32Bantu mu shikungulukilo babilikizile, bamo shuma shimo na bamina shuma shashenge. Muntu nimwendi wabulile kulimuka sha kutenda, wingi kukwabo kaliha balimukile ngayi ndabangani banakungulukili. 33Bamo mu likunge bafumishile Alekizanda ngayi uli na mazu akwamba, Bayunda bamunyakilile kumbili. Niho abalabizile na liboko ngayi bamwene, washingile kuliyawila ku bantu. 34Ngoboni oho baya bantu balimukile ngayi niye Kayunda, babilikizile nimwabo bikati bibili ngayi, “Wamunene Alitemi wa mu Efweshe!”

35Mukakutikita wa mu munzi wamweneshele bantu, wambile ngayi, “Enu bawushinda wami Bakaefweshe, yani ku bantu wakubula kulimuka ngayi munzi wa Efweshe niwo ukulama litala lya kulemeshelelamo Alitemi wamunene, kami ukulama limanya liya lyawile kuyilu? 36Ndaba ngayi kowa muntu ukutwesha kukana byuma ebye, pe mu ku fwanina ku mwena na kubula kuyitukila byuma. 37Enu munalete aba bantu kuno hinga banayibi bya mu litala lya nyambi yetu wa mukazi, hinga kuhandula. 38Nohobene ndi Ndemetiliyashi na bakawulongo aba bali nendi bali na shambo ku muntu wamina, kuwali matena akuyata, kami bakakuyata ku bali, baliyatishe umo na wamina. 39Ngoboni ndi ukushinga kwipula na shambo shashenge, shikayatiwa mu shikungulukilo sha nkuta nimwayo. 40Ndaba yanebye byatendiwi lelo tuli mu malamo akwihaniwa ngayi munalete mushunga. Ndaba kowa shuma tukatwesha kwamba ha nou mushunga.” 41Oho amanishile kwamba noho, wapanzanishile shikungulukilo.

Currently Selected:

Milimo 19: LLK

Highlight

Compare

Copy