Loma 5

Kutokwa chahakutuvuluka kupwa vakwoloka

1Ngocho, mwomwo vanatuvuluka kupwa vakwoloka hakufwelela, shikaho mukachi ketu naKalunga muli kuunda hali Mwata wetu Yesu Kulishitu.

2Hali Ikiye hakiko tunawanyina nawa kupandama chetu halikoji eli túlimo hakufwelela, kaha tweji kulisambilanga mukutalilila upahu waKalunga.

3Kaha keshi ngocho kahako, oloze tweji kulisambilanga namuluyando lwetu nawa, mwomwo hakutachikiza ngwetu, luyando nalusema kukakachila,

4kaha kukakachila nachineha kwalisa, kaha kwalisa#5:4 Mokomoko ngwenyi, Mutu wakwalisa. kana nachineha lutalililo,

5kaha lutalililo kana kalweshi kutwivwisa sonyiko, mwomwo zangi yaKalunga vanayihingunwina mumichima yetu kuli Shipilitu Wajila Ou vatuhana.

6Mwomwo shimbu twapwile tuchili tuvakuhehela, hangonde yakutamo Kulishitu afwilile vaka-kuzamukila Kalunga.

7Mwomwo kufwila muka-kwoloka chapwa chachikalu. Olozenyi, pamo mutu umwe mwahasuka kufwila wamwenemwene.

8Oloze Kalunga asolola zangi yenyi yakutuzanga ngana: shimbu twapwile tuvaka-shili, Kulishitu atufwilile.

9Shikaho, omu vanatuvuluka kupwa vakwoloka hamanyinga enyi, nachihambakananyi chikuma jino kutulwilila muli Ikiye kuutenu waKalunga.

10Mwomwo nge shimbu twapwilenga tuvaka-kole, vatuwanyishile naKalunga hakufwa chaMwanenyi, kaha omu vanatuwanyisa lyehi, kumana nachihambakananyi chikuma jino kutulwila hamwono wenyi.

11Kaha kuhambakana aha, tweji kulisambilanga nawa muli Kalunga hali Mwata wetu Yesu Kulishitu — Ou túnatambwilaho jino kutuwanyisa naKalunga.

Alama naKulishitu

12Shikaho nge muze shili yejile hakaye muli mutu umwe, kaha kufwa chalondolokele hashili, ngocho kufwa nawa chaheta kuli vatu vosena, mwomwo vosena vavulumwine.

13Mwomwo haze japwile Jishimbi kanda jipwengako, shili kuyapwilenga hakaye, oloze shili kavayilava kupwa mulongako chakuzeneka Jishimbi.

14Chipwe ngocho, kufwa chapwilenga nawata kufuma kuli Alama nakuheta kuli Mose, chipwe hali vaze kavavulumwine nge muze azombokele Alama lushimbiko, ou vafwanyisa Uze apwile nakwiza.

15Oloze wana wakulikoji kawalifwana nakuhingika kanako. Mwomwo nge vavavulu vafwile hakuhingika chauze mutu umwe, hakiko nahahambakanyina likoji lyaKalunga nawana walikoji wakufuma kulikoji lyaUze Mutu umwe, Yesu Kulishitu, kumbwambumukila vavavulu.

16Kaha uze wana kana kawalifwana navize vyákavasanyine hakuvulumuna chauze mutu umweko. Mwomwo kuhisa chize chákavasanyine hakuvulumuna chimwe chanehele kuzangamisa, oloze wana wakulikoji, ou wákavasanyine hakuhingika chetu chachivulu, unanehela vatu kuvavuluka kupwa vakwoloka.

17Nge hakuhingika chauze mutu umwe, kufwa chapwile nawata mwomwo wauze umwe, ava navatambula likoji lyakumbwambumuka nawana wakwoloka, navahambakana chikumanyi kupwanga nakuyula mukuyoya, hali Ou Umwe kaha, Yesu Kulishitu.

18Shikaho ngana omu kuhingika kamwe kaha chatwalile kukuhya chavatu vosena namulonga, ngocho nawa mulimo umwe wakwoloka watwala kukuvuluka vatu vosena kupwa vakwoloka chakutwala kukutambula mwono.

19Mwomwo ngana omu kulikanga chauze mutu umwe chalingishile vavavulu kupwa vaka-shili, ngocho nawa kwononoka chaUze Mutu Umwe, nachilingisa vavavulu kuvavuluka kupwa vakwoloka.

20Jino Jishimbi jejile mangana jivulise kuhingika, oloze kuze kwavulilile shili, kukiko kwambwambumukilile chikuma likoji.

21Mangana ngana omu yapwilenga shili nawata mukufwa, ngocho nalikoji nawa lipwenga nawata mukwoloka, nakutwala kukutambula mwono wázeneka kukuma muli Yesu Kulishitu Mwata wetu.

Currently Selected:

Loma 5: LUE

Highlight

Copy

Compare