Loma 4
4
Apalahama ikiye wakutalilaho
1Kaha jino, natwamba ngwetu ou kakuluka yetu Apalahama, mwaya chisemwa chamujimba, nawanyinaho ika?
2Mwomwo nge Apalahama vamuvulukile kupwa wakwoloka havilinga vyenyi, kachi ali nahakulisashila vene. Olozenyi, keshi ngochoko kumeso aKalunga.
3Mwomwo kuMazu-vasoneka-ajila vamba ngwavo ika? Ngwavo,
Apalahama afwelelele Kalunga, kaha vamulavilileho kupwa wakwoloka.
4Jino kuli muka-kuzata, yize fweto yenyi kaveshi kuyilava nge wana wakulikojiko, oloze yamutela.
5Jino ou ázeneka kuzata, oloze afwelela Ou avuluka vaka-kumuzamukila kupwa vakwoloka, kufwelela chenyi chamulingisa vamulavileho kupwa wakwoloka,
6ngana omu Ndavichi nawa avuluka kutokwa chamutu návalavila kupwa wakwoloka kuli Kalunga chakuzeneka vilinga, ngwenyi,
7 Vatokwa ava vanakonekela vilinga vyavo vyaupapwoki, vanafwikila milonga yavo yashili.
8Atokwa lunga ou kaveshi kulavila shiliko kuli MWATA.
9Kaha jino, echi kutokwa kana chili hali vangalami kaha tahi, nyi navijiji nawa? Mwomwo ngwetu,
Kufwelela chaApalahama vamulavilileho kupwa wakwoloka.
10Mujila muka vamulavilileho ngocho? Hakupwa muungalami tahi nyi muujiji? Kapwile muungalamiko, oloze muujiji.
11Kaha atambwile chinjikizo chakujihana, chikiko katachikijilo kakwoloka kana átambwile hakufwelela shimbu apwile áchili muujiji. Mangana ngwavo, apwenga sevo yavaka-kufwelela vosena, chakuzeneka kuvajihana, mangana chize kupwa vakwoloka vakavalavileho navakiko nawa.
12Kaha nawa, apwenga sevo yavangalami, vaze kavapwa vakujihana kahako, shina vaze veji kutambukanga nawa mujitambo jakufwelela kana chakakuluka yetu Apalahama, chize ápwile nacho shimbu kanda vamujihane.
Ocho vashika navachimwena hakufwelela
13Mwomwo kushika chize vamushikile Apalahama navana venyi chakumuvuluka kupwa swana walifuchi lyahamavu, kachejililile muJishimbiko, shina mukwoloka kana chahakufwelela.
14Mwomwo nge ava vakuJishimbi vapwa vaswana, kaha kufwelela vanachilingisa kupwa chamokomoko, kaha lushiko vanaluhonesa.
15Mwomwo Jishimbi jakoka utenu, oloze kuze kakwatwama lushimbiko, kavamona kuhengesa chavo nge kuzomboka lushimbiko.
16Hakiko lushiko lwazaminyina hakufwelela, mangana lupwenga lwahalikoji kaha, lupwenga chijikilo chavana venyi vosena, keshi kuli uze álama Jishimbi kahako, oloze nakuli uze átambulako kulufwelelo lwaApalahama, ou apwa setu tuvosena.
17(Nge muze vasoneka ngwavo,
Ngunakulingisa kupwa usevo yavaka-mafuchi amavulu.)
Apwa setu kumeso aUze áfwelelele, Ivene Kalunga, Ou éji kuyoyesanga vafu, éji kulingisanga vize vyazeneka kupwako ngwenyi vipwengako.
18Apalahama chipwe kamwene naaha hakutalililako, oloze mulutalililo lwenyi afwelelele ngwenyi mwakapwa sevo yavaka-mafuchi amavulu, nge muze vamulwezele ngwavo,
Omu mukiko navakapwa vana vove.
19Ikiye kazeyele mulufweleloko, chipwe amwene mujimba wenyi nge wafwa lyehi — mwomwo apwile namyaka kafwe likulukaji (100), chipwe Sala nawa achinyikile.
20Oloze hakwanuka lushiko lwaKalunga, kakakasanyine nakuhona kufwelelako, oloze atwalililileho kukwata ngolo mukufwelela chenyi, kaha alishile Kalunga haupahu wenyi,
21hakufwelela chikupu ngwenyi, Omu nángushiki Kalunga, mwahasa kulingamo nawa.
22Shikaho,
Vamulavilileho kupwa wakwoloka.
23Omu vamulavilileho ngocho, kavachisonekelele ikiye kahako,
24oloze nayetu nawa navatulavilaho, etu twafwelela Uze asangwile Yesu Mwata wetu muvafu,
25 Ou vasuwile kukufwa hakuhingika chetu, Ou vásangula mangana vatuvuluke kupwa tuvakwoloka muli Ikiye.
Currently Selected:
Loma 4: LUE
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
