Loma 16

Mwameneka vakwavo

1Ndumbwetu wapwevo Fwivi ngunamujimbula kuli enu, apwa muka-kuzachila liuka lyakuKenekeleya,

2ngwami, mumutambula muli Mwata ngana omu mwatela kuli vaka-kujila, kaha ngwami, mumukafweko mweshomwo nakalikijila. Mwomwo naikiye nawa muka-kukafwa vavavulu. Kaha nangukafweko nayami nawa.

3Ngumenekelenu Pilishila naAkwila, vakiko vakwetu mutwazachila hamwe muli Kulishitu Yesu.

4Vakiko valyonene#16:4 Nge ngwavo, vetavile kufwa. MuchiHelase ngwavo, valyonene myono yavo. hali ami, shikaho ngweji kuvasakwililanga, keshi ami kahako oloze namauka avaka-mafuchi nawa.

5Ngumenekelenu nawa naliuka lyeji kukungulukilanga muzuvo yavo. Ngumenekelenu mukwetu ngwazanga Epenetu, ikiye napu mihako yaKulishitu yakulivanga kuAja.

6Ngumenekelenu Maliya, uze apwile nakukilikita hali enu.

7Ngumenekelenu vausoko wami Andolonyiku naYunya, vakwetu mutwatwaminyinenga muufunge, ava vánafumakana kuli vaposetolo, vakiko nawa valivangile kupwa muli Kulishitu shimbu ngwapwile ami kanda ngufwelele.

8Ngumenekelenu Apilyatu, mukwetu ngwazanga muli Mwata.

9Ngumenekelenu Uluvanu, ikiye mukwetu mutwazachila hamwe muli Kulishitu, namukwetu ngwazanga Satake.

10Ngumenekelenu Apele, ou vasangejeka muli Kulishitu. Ngumenekelenu vaze vakuzuvo yaAlishitovulu.

11Ngumenekelenu kausoko kami Helochone. Ngumenekelenu vaze vakuzuvo yaNalashisu vaze vali muli Mwata.

12Ngumenekelenu Tulufwina naTulufwosa, vakiko veji kukilikitanga muli Mwata. Ngumenekelenu Pelese ou vazanga, ikiye akilikichilenga muli Mwata.

13Ngumenekelenu Lufuse, vasakula muli Mwata, nanaye nawa, ikiye napunga mama kuli ami nawa.

14Ngumenekelenu Asukulitu naFwelengone naHelemese naPatolova naHelemase navandumbwetu vaze vali navo hamwe.

15Ngumenekelenu Fwilolongu naYulya naNeleya nandumbwenyi wapwevo naOlumupa navaka-kujila vosena vaze vali navo.

16 Limenekenu navakwenu mukujila#16:16 MuchiHelase ngwavo limenekenu nakulisweswenya chajila.. Mauka aKulishitu osena anamimeneka.

17Kaha jino, enu vandumbwami, ngunamilembelela chikuma ngwami, zangamenu navaze veji kunehanga kuhelangana navimbunji hakuneha kunangula cheka chakulisepasana namuze twaminangwile, vasosolokenu.

18Mwomwo vatu vangocho kavazachila Mwata wetu Yesu Kulishituko, oloze majimo avo vavene kaha. Kaha vakiko hakuhanjika mazu akukokweza naawa akulambisa nawa, veji kwonganga vipumbu-mwitavila.

19Mwomwo kwononoka chenu chinayi lyehi puho kuli vatu vosena, shikaho ngunawahilila hali enu, oloze ngwazanga ngwami, mupwenga namangana akutachikiza vize vyamwenemwene, muvakuzeneka kuhaka mangana kuvize vyavipi.

20Kaha Kalunga Mwenya-kuunda linwomu achike Satana mwishi yamahinji enu. Uselewa waMwata wetu Yesu Kulishitu upwenga nayenu.

21Mukwetu mutwazachila Chimoteu namimeneka, navausoko wami Lushiu naYasone naSosepate nawa.

22Yami Telechiu ngúnamusonekelako mukanda uno, ngunamimeneka muli Mwata.

23 Ngayu namimeneka, ikiye muka-kunguzumbula nakuzumbula liuka lyosena nawa. Elasatu, muka-kulama jimbongo jalimbo lino lyakembwe namimeneka, nandumbwetu Kwalatu nawa.

24[Uselewa waMwata wetu Yesu Kulishitu upwenga nayenu muvosena. Amene.]

Paulu mwakumisa nakwalisa Kalunga

25 Kaha jino, Ou nahase kumizamisanga nge kutesa namujimbu wami wamwaza nakwambulula kana chakwambulula Yesu Kulishitu, nge omu chaya kusolola kana chakusolola mangana apwile akusweka, awa valaminenga muuholela kufuma kushikulu,

26oloze vanachilumbununa makumbi ano, kaha vanavajimbwilawo vaka-mafuchi osena muMazu-vasoneka-ajila avapolofweto nge omu lwaya lushimbi lwaKalunga Ou ápwa lika, mangana ngwenyi, avalingise vononoke mujimbu wamwaza hakufwelela;

27Ou apwa Ikiye uka wenyi kaha Kalunga Mwenya-mangana, vamwalisenga haupahu wenyi muli Yesu Kulishitu kujingonde jazeneka kukuma! Amene.

Currently Selected:

Loma 16: LUE

Highlight

Copy

Compare