Loma 15

1Kaha jino, chatela kuli etu tunakulu lyehi mulufwelelo kukafwangako vaze kanda vakole mulufwelelo mukuhona chavo hakuvatalijiza mukuunda, keshi kulivwisanga etu vavene kuwahako.

2Tuvosena mutu himutu alingenga mwakusuulwisa mukwavo chakutwala kukumuwahisa nakumutunga.

3Mwomwo naKulishitu nawa kalisuulwishile Iveneko, oloze ngana muze vasoneka ngwavo,

Chize kutoleka chavaze veji kukutolekanga, chinaholokela hali ami.

4Mwomwo vyeshovyo vasonekele kumwaka vavisonekelele kutunangula, mangana etu hakutalijiza mukuunda nahakutuzamikisa naMazu-vasoneka-ajila#15:4 Mazu-vasoneka-ajila, akiko Mazu ajila aMukanda waKalunga., tupwenga nalutalililo.

5Kaha jino, Kalunga Mwenya-kutalijiza mukuunda nakuzamikisa, amihane kutwamanga namuchima umwe navakwenu mwaya muchima waKulishitu Yesu,

6mangana enu muvosena hamwe, nalizu limwe, mwalisenga Kalunga haupahu wenyi, Ikiye Kalunga kaMwata wetu Yesu Kulishitu, Ikiye Ise nawa.

7Shikaho litambulenu navakwenu mukusuuluka, ngana omu Kulishitu atutambwile etu nawa, mangana upahu waKalunga usoloke.

Mujimbu wamwaza kuli vaka-mafuchi navaIsalele

8Mwomwo nangumilweza ngwami, Kulishitu alilingishile kupwa Muka-kuzachila vangalami hamuchano waKalunga, mangana jishiko jize vavashikile vakakuluka, ajizamise mbe,

9kaha mangana vaka-mafuchi valishilenga Kalunga haupahu wenyi, nahakutetela chenyi, ngana muze vasoneka ngwavo,

Shikaho nangukwalisanga muli vaka-mafuchi,

Nangwimbanga myaso yakulemesa lijina lyove.

10Kaha cheka nawa amba ngwenyi,

Wahililenu enu vaka-mafuchi, navatu jenyi hamwe.

11Kaha cheka nawa,

Enu vaka-mafuchi muvosena, alisenunga MWATA,

Kaha vatu veka naveka vosena vamwalisenga.

12Kaha cheka nawa Isaya amba ngwenyi,

Nakukapwa Chikota#15:12 MuchiHelase ngwavo, Mwiji waNdavichi. chaYese,

Uze mwakakatuka nakuyula vaka-mafuchi,

Ikiye navakatalilila vaka-mafuchi.

13Kaha jino Kalunga Mwenyalutalililo amizalise nakuwahilila chosena nakuunda mukufwelela, mangana mutwamenga nalutalililo lwakumbwambumuka mungolo jaShipilitu Wajila.

14Kaha, enu vandumbwami, ami ivene ngunakunyuka hali enu ngwami, nayenu vavene nawa munazale lyehi nakuwaha, munazale lyehi nachinyingi chosena, munahase nawa kulinangula navakwenu.

15Oloze havyuma vimwe, ngunamisonekela nakumika chikuma, nakumyanukisa mwomwo hawana wakulikoji ánguhana Kalunga,

16 wakupwa ngungamba yaKulishitu Yesu muli vaka-mafuchi, nguzatenga milimo yaupilishitu yakusolola mujimbu wamwaza waKalunga, mangana hakumuhana vaka-mafuchi, akavetavile nge hiwana wakulumba wakujilika kuli Shipilitu Wajila.

17Shikaho nguli nahakulisashila muli Kulishitu Yesu muvyuma vyaKalunga.

18Mwomwo kangweshi kuzamuka kuvuluka vyuma vyekako shina evi kaha nazate Kulishitu muli ami nakuneha vaka-mafuchi kukwononoka — hamazu nahavilinga,

19 nangolo javinjikizo navyakukomwesa, mungolo jaShipilitu yaKalunga — hakulinga ngocho, kufuma kuYelusalema nakunyengumuka mbwe nakuIlulikume, ngunatesamo mwosena mwaya mujimbu wamwaza waKulishitu.

20Shikaho ngunajiki muchima wami kukwambulula mujimbu wamwaza, keshi kuze vatachikiza lyehi Kulishituko, kuchina nangutungila hachihela chambala.

21Oloze ngana muze vasoneka ngwavo,

Vaze kanda vavambulilengaho lyehi vyakumuvuluka, navakamona,

Kaha vaze kanda vevwengaho lyehi, nachikavalumbunukila.

Paulu mwashika kuya kuLoma

22Chikiko vene changuhungikile kakavulu numba nguhone kwiza kuli enu.

23Oloze oholili, kujingalila jino kakwasalile kumwe ngunazeneka kuyako, kaha hakufwila chikuma kwiza kuli enu myaka yosena eyi,

24hakiko ngunasakila kumimona heshoho nangukahita nakuya kuSipenya, mangana mukangukafweko mujila yami yakuya kuze, hakuvangila kutwama nakuwahilila tando yayindende nayenu.

25Oloze oholili, nguli nakuya kuYelusalema ngukakafweko vaka-kujila.

26Mwomwo vaka-Masetonya navaka-Akaya vanasuuluka kutuma wana wakusolola kulikata navaka-kujila vanakalikiza váli kuYelusalema.

27Chavasuulwishile vene, mwomwo vapwa lyehi vaka-mukuli wavo. Mwomwo nge vaka-mafuchi vanavalingisa kutambwila hohamwe kuvyuma vyavaka-Yelusalema vyaushipilitu, kaha chatela navakiko nawa kuvazachila hakuhana vakwavo vyuma vyakumujimba.

28Shikaho, omu nangumanyisa milimo eyi yakuhetesa kanawa mihako eyi, numbanyi nguhichile okwo kuli enu nakuya kuSipenya.

29Kaha ngunatachikiza ngwami, omu nangukeza kuli enu, namukazalilila nakisu yaKulishitu.

30Kaha jino, enu vandumbwami, ngunamilembelela hali Mwata Yesu Kulishitu nahazangi yaShipilitu ngwami, hundanganenunga nayami hamwe mukungulombela kuli Kalunga,

31mangana akanguyovole kuli vaze vakana kufwelela váli kuYuleya, numba milimo yami yakuzachila vaka-Yelusalema vakayitavile kanawa kuli vaka-kujila,

32mangana ngukeze kuli enu nakuwahilila, nge mwaya muchima waKalunga, kaha ngukahizumukile hamwe nayenu.

33Kaha jino, Kalunga Mwenya-kuunda atwamenga nayenu muvosena hamwe. Amene.

Currently Selected:

Loma 15: LUE

Highlight

Copy

Compare