Loma 11

VaIsalele ava vanasaleho

1Shikaho nanguhulisa ngwami, Kalunga nakane vatu jenyi numba? Chijilocho! Mwomwo nayami nawa ngumuka-tanga yaIsalele, ngumwanaApalahama, nguwakumuyachi waMbenjamine.

2 Kalunga kakanyine vatu jenyiko, ava átachikijilengaho lyehi. Nyi kamwatachikiza Mazu-vasoneka-ajilako tahi? Elija vamuvuluka ngwavo, emanyinyine vaIsalele hakulomba Kalunga ngwenyi,

3 Ove YEHOVA, vapolofweto jove vanavajihi-jihi, majiko ove akulumbila vanaasande-sande, kaha yami kaha ngunasaleho, kaha vali nakusaka ngwavo, vangujihe nayami nawa.

4Oloze Kalunga amukumbulwile ngwenyi ika? Ngwenyi,

Ngunaliswekela malunga makombakaji atanu naavali (7,000), vaze vanakane kufukamina Mbale.

5Mwomumwe nawa nahalwola luno, kuli chimbwa chavatu vásalaho vakusakula lyehi chakulikoji.

6Oloze nge chakulikoji, kaha kacheshi cheka chakuvilingako, mokomoko likoji kalyeshi kupwa cheka likojiko.

7Jino chihande echi chili ngachilihi? VaIsalele vahonene kuwana ocho vatondelenga. Oloze ava vásakwilengaho lyehi vachiwanyine, kaha vakwavo vosena vavakaluhwishile michima.

8Nge muze vasoneka ngwavo,

Kalunga navahane michima#11:8 MuchiHelase ngwavo, shipilitu yakuhungwila. yakuhungwila,

Nameso akuhona kumona,

Namatwitwi akuhona kwivwa,

Nakulikumbi lyalelo lino.

9Kaha Ndavichi nambe ngwenyi,

Mesa yavo yivalumukile kupwa muheto, nachiliva, nachimbunji, nafweto yakuvazangamisa.

10Meso avo vawelavise wi-i mangana vahone kumona,

Kaha vavazembenga lika jinyima javo.

Kulwila vaka-mafuchi

11Shikaho nangwamba ngwami, Vahukanyine mangana valimbuke chakuzeneka kukahinduka tahi? Chijilocho! Oloze kukuhingika chavo kukiko kunejila ulwilo kuli vaka-mafuchi, mangana chivevwise vakiko lisungu.

12Kaha jino, nge kuhingika chavo chinapu kutohwesa likoji lyenyi muli vaka-kaye#11:12 Nge ngwavo, navaka-mafuchi navaze vaIsalele navafwelela., kaha nawa nge kuhona chavo chinapu kutohwesa likoji lyenyi muli vaka-mafuchi, kaha kumana nachikapwa ngachilihi kukaye kosena omu kuvahilwisa chikupu nachikatesamo?!

13Mwomwo nguli nakuhanjika kuli enu vaka-mafuchi, ami hakupwa ngukaposetolo kuli vaka-mafuchi, shikaho ngweji kufukisanga milimo yami,

14mangana mujila yimwe, ngwivwise vaka-muyachi wami lisungu nakulwilako#11:14 Muka-kulwila vatu Ikiye Kulishitu kaha. Oloze eji kuzachisanga vangamba jenyi kukokweza vatu. Tala 1 Koli 9:22. vamwe.

15Mwomwo nge hakuvasuva hakiko nahejila kuwanyisa vaka-kaye naKalunga, kaha kuvetavila cheka nachihonena ika kupwa mwono hakuvafumisa muvafu?

16Shikaho nge uze unga wakavánga wahawana wakulumba wapwa wajila, kaha unga wosena nawa wajila. Kaha nge mwiji wapwa wajila, kaha namitango yawo nawa yajila.

17Kaha hakumona mitango yimwe vayinóngeleko, kaha ove hakupwa umulive wamuchipapa vánungilileko, unapu jino uwakutambwila hamwe kumiji nakukuwaha chamulive,

18shikaho kanda ulisasa nakulelesa mitangoko. Oloze nge naulisasa, anuka ngwove, keshi yove wasokesa mwìjiko, oloze mwiji ukiko wasokesa ove.

19Kaha nawamba ngwove, Mitango vayinóngeleko mangana vangunungileko ami.

20Mukiko vene. Hakukana chavo kufwelela, hakiko vavanóngeleleko, oloze ove unemanyina hakufwelela. Kanda ulivwimbako, oloze ivwanga woma.

21Mwomwo nge yize yivene mitango yawo Kalunga kayitételeleko, chipwe ove nawa keshi kukutételako.

22Shikaho shishika kukokweza chaKalunga, nakukaluhwa chenyi nawa. Kukaluhwa chenyi chili hali vaze valimbuka, oloze mwakukokweza, chikalu uli mukukokweza chenyi, nge chiku, nayove nawa navakakutetako.

23Kaha navakiko nawa, nge kaveshi kutwalililaho kukana kufwelelako, kaha navakavanungilako, mwomwo Kalunga nahase kuvanungilako cheka.

24Mwomwo nge ove vakutétele kumulive wakulisokela, kaha nge vanakunungila kumulive wakutumba mwakulisepasana namwaya kusoka chamitango yawo — kumana yize mitango yamulive wakutumba, kayeshi kuhambakana chikumanyi kuyinungila cheka kumulive wayoko numba?!

Kuhilwisa vaIsalele cheka

25Mwomwo enu vandumbwami, ngunasake#11:25 MuchiHelase ngwavo, kangwasakile ngwami muzeneke kutachikiza. ngwami, awa mangana ápwile akusweka amilumbunukile, kuchina namulivwimba. Ngwami, kunjinjila#11:25 Nge ngwavo, kukaluhwa chimwe chamuchima. chamuchima#11:25 Chipwe ngwavo, kukaluhwa chamuchima (kunjinjila) chinavawane vaIsalele vamwe chinawane vaIsalele, palanga nomu seteko yavaka-mafuchi navakayitesamo.

26Kaha ngocho vaIsalele vosena hinavakavalwila, nge muze vasoneka ngwavo,

Muka-kuyovola mwakafuma kuZeyone,

Mwakalumuna Yakova afume kukuzamukila Kalunga.

27Mwomwo echi chikiko chilongeselo chami chalushiko nangukalishika navo

Omu milonga yavo yashili nangukavafumisayo.

28Hamujimbu wamwaza vanapu vaka-kole jaKalunga hali yenu#11:28 Chipwe ngwavo, mangana enu muwanyineho., oloze hakuvuluka kuvasakula, vanapu ava vazanga mwomwo wavakakuluka javo.

29Mwomwo mawana aKalunga akulikoji lyenyi nakusanyika chenyi kavyalumukako.

30Mwomwo ngana muze enu mwakanyine Kalunga hamwaka, oloze jino munawane kutetela mwomwo wakukana chavo,

31ngocho nawa navakiko vanalikange mangana vavatetele nakutetela kana vanamitetela enu.

32Mwomwo Kalunga navasokelela vosena mukulikanga naIkiye, mangana ngwenyi, avatetele vosena.

33Ocho kutohwa chakutetela #11:33 Hamazu awa kaposetolo Paulu ali nakukomoka hakwanuka kutohwa chakutetela chaKalunga nalikoji lyenyi nazangi yenyi nakushishika chenyi nangolo naumwenemwene wenyi, navikwavo navikwavo vyangana. nakukunama chamangana nachinyingi vyatwama muli Kalunga! Ocho chiyulo chenyi, nomu vahona kuchihehula! Najijila jenyi omu vahona kujilengeza!

34 Mwomwo iyaze atachikiza kujina chaMWATA?

Mokomoko iyaze amunangula lyehi mangana?

35Mokomoko iyaze alivangaho lyehi kumuhana

Numba akamuhilwishile cheka?

36Mwomwo kuli Ikiye kuvyafuma vyosena, kaha muli Ikiye muvyapwila vyosena, kaha kuli Ikiye kuvyatwala vyosena. Kuli Ikiye kupwenga upahu kujingonde jázeneka kukuma. Amene!

Currently Selected:

Loma 11: LUE

Highlight

Copy

Compare