Loma 10
10
1Enu vandumbwami, mwaya kufwila chamuchima wami nakulemba kuli Kalunga chapwa ngwami vaIsalele vavalwile.
2 Mwomwo ami nguchinjiho ngwami vasungwila Kalunga, oloze keshi mwaya chinyingiko.
3Mwomwo vakiko, hakuzeneka kutachikiza kwoloka chakuli Kalunga, kaha hakusaka ngwavo vazamise kwoloka chavo vavene, vakanyine kuwa kukwoloka chaKalunga.
4Mwomwo Kulishitu Ikiye kutesamo chaJishimbi nakujikumisa mangana anehe kwoloka kuli weshowo mwafwelela.
5Mwomwo Mose asoneka nakuvuluka kwoloka chakuJishimbi ngwenyi,
Mutu álinga mwaya Jishimbi mwáyoyelangaho.
6Oloze kwoloka chahakufwelela chamba ngana ngwacho,
Kanda wamba mumuchima wove ngwove, Iya mwaya mwilu?
(nge ngwavo, kusulula Kulishitu afume mwilu),
7Chipwe kwamba ngwove,
Iya mwashikumuka muwina wakuzeneka kukuma?
(chikiko, kusangula Kulishitu muvafu).
8Oloze ngwavo ika? Ngwavo,
Mazu ali hakamwihi nayove, mukanwa kove namumuchima wove
nge ngwavo, mazu alufwelelo, awa tweji kwambululanga,
9ngwetu nge naulitavila hatoma nakanwa kove ngwove, Yesu apwa Mwangana, nakufwelela mumuchima wove ngwove, Kalunga amusangula muvafu, navakulwila.
10Mwomwo mutu mwafwelela namuchima wenyi nakumuvuluka kupwa wakwoloka, kaha mwalitavila nakanwa kenyi nakuwana ulwilo.
11Mwomwo Mazu-vasoneka-ajila anambe ngwavo,
Weshowo mwamufwelela kaveshi kukamwivwisa sonyiko.
12Mwomwo kakweshi chihandwa mukachi kakaYuleya nakaHelaseko, mwomwo Mwangana yOu umwe kaha Ikiye Mwangana wavosena, kaha éji kukisulanga chikuma nazangi nalikoji veshovo navamusanyika.
13Mwomwo,
Weshowo mwasanyika MWATA halijina lyenyi navamulwila.
14Kaha jino, navatwa kawelele ngachilihi kuli Ou vazeneka kufwelela? Kaha navamufwelela ngachilihi Ou vazeneka kwivwa? Kaha navevwa ngachilihi chakuzeneka muka-kuvambulila?
15Kaha navambulula ngachilihi chakuzeneka kuvatuma? Nge muze vasoneka ngwavo,
Omwo awaha mahinji aava navambulula mujimbu wamwaza wavyuma vyamwenemwene!
16Oloze keshi nge vaIsalele vosena vononokele mujimbu wamwazako, mwomwo Isaya nambe ngwenyi,
Ove MWATA, omu tunambulula mujimbu wetu, iya naufwelela?
17Shikaho jino, kufwelela nachijila hakwivwa, kaha kwivwako nachifuma hamazu akulumbununa Kulishitu.
18Oloze nanguhulisa ngwami, Kavévwileko tahi? Nduma, vevwile vene. Mwomwo vasoneka ngwavo,
Kuvuma chavyo chinayi nakumavu kwosena,
Mazu avyo anayi kujisongo jamafuchi.
19Kaha nanguhulisa cheka ngwami, Kachalumbunukilile vaIsaleleko tahi? Chatete, Mose ambile ngwenyi,
Ami nangukamivwisa lisungu hakukisula vaze vazeneka kupwa vaka-lifuchi
Nangukamisangumwina kuutenu hakukisula vaka-lifuchi vazeneka mangana.
20Oloze Isaya nomika chikuma, hakwamba ngwenyi,
Vananguwane kuli vaze kavangutondeleko,
Ngunalisolola kuli vaze kavanguhulyejeleko.
21Kaha hakuvuluka vaIsalele ngwenyi,
Musana wosena ngunolwela mavoko ami vatu vamuyachi wakukana kwononoka, wakulingulula.
Currently Selected:
Loma 10: LUE
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
