Hose'a 11
11
No Alla yiɗiri Isira'iilaaɓe
1Joomiraawo wi'i:
Diga fuɗɗoode lenyol himɓe Isira'iila nun jiɗumi ŋol.
Noddumi ŋol ŋol wurtoo diga leydi Misira,
kanŋol ŋol himɓe mum laati sukaaɓe am.
2Amma jaka no noddiranmi ɓe nun,
ɓe jahirta ɓee boɗɗodoo am.
Ɓe gaɗanii tooruuje Ba'ali kiiseteeɗi,
ɓe buuɗanii tooruuje wardi buuɗeteeɗum.
3Nanii bo min nun jogotonoo juuɗe himɓe lenyol Efurayimu, ekkitinmi ɓe yaadu.
Amma ɓe paamay naa mii hakkilani ɓe.
4Mi duriranno ɓe nun e neɗɗaaku,
mii holla ɓe yidde.
Mi taƴanii ɓe ɓoggi maccuŋaaku ɗi ɓe kaɓɓaa e daaɗe,
mi hokkii ɓe nafa ɓe nyaami.
5Ɓe bittataa kade leydi Misira.
Amma leydi Asuura laamanto ɓe,
gam ɓe calake wittoygo to am.
6Konu yantan wanŋarɗe maɓɓe,
ŋu heltan janɗe palaaɗe e dammuɗe maɓɓe fu,
ŋu halka ko woni ɗon fu.
Gam ɓe koolake dabareeji maɓɓe tan.
7Himɓe am salake tokkugo am.
Ɓee noddee gam ɓe bittaa to am min Alla mo dow,
amma goɗɗo maɓɓe nootaaki.
8Efurayimu, mi waawan woppugo maa naa?
Isira'iila, mi waawan jammaago maa naa?
Mi waawan halkugo on hande no kalkirmi wanŋarde Adima naa?
Mi waawan halkugo on hande no kalkirmi wanŋarde Seboyimu naa?
Iri miilooji ɗii ɗon jiɓii hakkillo am
gam sabbu yurumeene mon mawne ne goodumi.
9Mi accataa mone am sattune halka on.
Mi wittoytaa mi halka Efurayimu,
gam mi laati nun Alla, mi laataaki neɗɗo.
Onon himɓe Efurayimu,
mi laati nun Ceniiɗo caka mon.
Mi warataa hollugo on mone am.
10To min Joomiraawo mi halɓii hande jaggere,
nanŋanooɓe maccuŋaaku ummoyto tokkammi.
To sukaaɓe am nanii bojji am,
ɓe garan diga gorgal ɓee diwna.
11Ɓe doggaan diga Misira ɓee diwna hande pooli.
Ɓe ummoyto diga Asuura hande tantabaraaji.
Mi accan ɓe garta ɓe jooɗoo der leydi maɓɓe.
Min Joomiraawo nun bati ka.
Currently Selected:
Hose'a 11: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
