Hose'a 10
10
Heennyitoode laamu Isira'iila
1Himɓe Isira'iila laatino nun innabooje booɗɗe
dimooje ɓikkon ɗuukkon.
Hande no gese maɓɓe rimirta sanne,
non non ɓe mahiranta tooruuje kiisirɗe ɗuuɗɗe.
Hande no leydi maɓɓe yahirta e wooɗa,
non non ɓe jurirta kaaƴe ɗe ɓe caafata.
2Munaafitaare tan hebbi der ɓerɗe maɓɓe.
Amma, ɓe keɓan loocol majjum.
Joomiraawo doƴƴan kiisirɗe maɓɓe ɗen,
o pusa kaaƴe ɗe ɓe caafata ɗen.
3Den ɓe bi'an:
En galaa kade laamiiɗo
gam en kulay Joomiraawo.
Amma baa to en keɓii laamiiɗo ume ɗum nafata en kade?
4Ɓee bata haalaaji baanjaaji.
Ɓee kunoroo fewre,
ɓee bi'a ɓe kaɓɓan nun alkawal joonne seese.
Tokkugo sariya laatani ɓe nun ko halli hande fuɗo bonko puɗuko e sollooji gesa.
5Himɓe Samariya e hulana ga'el ŋel tiggi Beti Awen.
Himɓe wanŋarde nen wulla gam sabbu ŋel halkii.
Mawɓe saafooɓe ŋel e diwna gam sabbu wayɓe hooran ŋel leydi janandi, den tedduŋal maggel yana.
6Himɓe dillidan ŋel faa leydi Asuura,
ɓe kokkora ŋel laamiiɗo leydi nin.
Senteene tawan himɓe Efurayimu.
Himɓe Isira'iila sentan gam sabbu dabareeji mum kalluɗi.
7Samariya laatake bille,
laamiiɗo mayri halkii
hande sawru ŋol diyam ilini.
8Nokkuuje to tooruuje saafetee, to himɓe Isira'iila waɗannoo hakkeeji mawɗi halkete.
Gi'e e janjayɗe fuɗan e kiisirɗe maɓɓe.
Ɓe bi'an: Baalle cawree nyoƴƴee men,
tile, janee dow amen.
Isira'iila ruggan ko aawi
9Joomiraawo wi'i:
Onon himɓe Isira'iila,
diga nyanne gaɗuɗon hakke dow waanne Gibeya, on bonƴitaaki.
To non, sey konu yanta waɗuɓe hakke dow waanne Gibeya ɓen fu.
10Mi eltan ɓe jaka no jiɗirmi.
Mi accan lenyi hawrita wara yanta ɓe gam sabbu boofi maɓɓe ɗuuɗɗi ɗin.
11Efurayimu laati nun hande nagge wiige eltaaŋe.
Ŋee yiɗi piiɗe alkamaari.
Mi haɓɓanan ŋe leggal ga'i demooji e daane magge wooɗune.
Mi haɓɓanan Efurayimu leggal ga'i demooji.
Mi hasinan Yahuuda
den Yaakuubu pusa ɓote.
12Peƴƴee gesa kesa,
aawon gooŋa,
den on duggan ko wooɗi.
Wakkati kaanuki darton am min Joomiraawo nun ɗoo,
den mi wara mi janŋina on gooŋaaku.
13Amma on aawu nun ko halli,
dugguɗon ko boni.
On nyaamii riiba jamma.
On koolake semme mon
e ɗuuggo soogeeji mon.
14Bojji konu nanete caka mon.
Wanŋarɗe mon ɗe biriniiji fu halkete hande no Salman laamiiɗo yantiri wanŋarde Beti Aribel,
go o wari inniraaɓe e sukaaɓe mum fu.
15Onon himɓe Beteli, ɗum ɗon nun tawata on,
gam sabbu hallande mon sattune.
Diga subaka kecco laamiiɗo Isira'iila halkete.
Currently Selected:
Hose'a 10: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
