Fuɗɗoode 49
49
Haalaaji cakitiiɗi ɗi Yaakuubu bati sukaaɓe mum
1Yaakuubu noddi sukaaɓe mum wi'i:
Kawritee ɗoo mi bata on ko tawoyta on yeeso.
2Kawritee onon ɓiɓɓe am,
nanon ka batanmi, min baaba mon Isira'iila.
3Rubeni, an nun woni suka am afo,
an nun woni semme am, an nun laatii suka mo dimumi e gojankaaku am.
An nun ɓuri sukaaɓe am horiiɓe fu manŋu e semme.
4Amma a ƴuufii hande diyam maayo, a su'aaki, gam mum a heɓetaa manŋu.
Gam a waalidii e debbo am dow banni am min laatiiɗo baaba maa,
a tuuninii banni am.
5Simeyon e Leewi laati nun banniraaɓe.
Ɓe ettan nun kaafaaje maɓɓe ɓe gaɗira ko halli.
6Ɓerne am naatataa der dawriine maɓɓe hallune.
Ruuhu am bo hawtataa e maɓɓe.
Gam ɓe barii himɓe gam sabbu mone maɓɓe.
Gam sabbu hallande maɓɓe bo, ɓe taƴii siniyaaji ga'i kalkali.
7Mi yaa'oto mone maɓɓe, gam nee woodi semme.
Non bo hallande maɓɓe,
gam ne walaa yurumeene.
Lenyol maɓɓe sankitinto der leydi Isira'iila fu.
8An bo Yahuuda, mawniraaɓe maa e miiraaɓe maa maantete.
A ɗeɗɗan daaɗe wayɓe maa.
Hawra baabaaɓe maa fu jiccante.
9An Yahuuda suka am, a laati nun hande ɓinŋa takkere,
baroyŋa tew e warta, go yottii banni mum.
A jiccoto nun ladaa, pukkoɗaa hande takkere rewre.
Moy nun suusata finnini ne?
10Laamaare eggataa diga e lenyol Yahuuda.
Sawru laamu sottataako diga e juuɗe makko,
faa nyanne jewɗo laamu ŋun wari.
Kanko nun lenyi fu ɗowtantoo.
11Gese innabooje maa ɗuuɗan,
faa kaɓɓaa babba maa e ɓinŋel mum der majje.
A heɓan innabojam ɗuuɗɗam,
faa loonniraa ɗam kolte maa.
12Gite maa wojjam gam sabbu innabojam,
nyiiƴe maa bo rawnan gam sabbu kosam.
13Jabulon kan jooɗoto takkol maayo,
to laanaaji diyam darotoo.
Leydi makko yaajan, yottoo faa Sidon.
14An Isakaa, a nandu nun hande babba cemmiɗinŋa,
fukkotooŋa caka kara mum.
15Ŋa yi'ii no nokkuure ne ŋa siwtii e wooɗi,
no leydi nin bo e wooɗi,
kan acci ŋa nooti ŋa roonoo dongal,
ŋa nyaama maccuŋaaku.
16An Dan, an nun laatotoo,
kiitantooɗo lenyi Isira'iilaaɓe.
17A laatoto hande boddi puri,
pukkiini e laawol e soppa koyɗe pucci,
gam waɗɗiiɓe ɗi yana.
18Alla Joomiraawo, emii heɗii faabuwe maa.
19Wayɓe ɗuuɓɓe yantan Gada, haɓida e mum,
amma o jaaloto ɓe o riiwa ɓe.
20Leydi Asee riman nafa ɗuukka.
O nyaaman nafa laamiiɓe.
21An Nefutali, a nandu nun hande taakawre yoofaane,
dimoore ɓikkon booɗukon.
22An Yusufu, a nandu nun hande licce leggal dimoowal,
dariiŋal takkol siiɓiire diyam,
ŋal licce mum ɓilii dow bombooru.
23Wayɓe maa sorkake maa,
ɓe janti maa e semme, ɓe piɗi maa kure.
24Amma biroogal maa yanay.
Alla Yaakuubu mo baawɗe fu semmiɗinii juuɗe maa,
Alla laatiiɗo duroowo,
e tepaare suuɗune Isira'iila.
25Alla baaba maa wallete.
Alla mo baawɗe fu barkiɗine.
O barkiɗine e diyam ɗam dow kammu,
o barkiɗine e diyam ɗam dow leydi.
O barkiɗine e ɓiɓɓe, o ɗuuɗina mareefuuji maa.
26Barke maa ɓuran barke baaba maa.
Ɗee mawni,
ɗee ɓuri baalle gonuɗe diga ɓooyii.
Barke ɗen jooɗoo dow hoore maa, an Yusufu,
an mo nandaa e mawniraaɓe maa.
27An Benyamin, a nandu nun hande rawaanu ladde.
Subaka, nu nyaama ko nu nanŋoy,
kiikiiɗe nu seennira ko nu nanŋoy.
28Kamɓe woni sukaaɓe sappo e ɗiɗo, laatiiɓe lenyi Isira'iila sappo e ɗiɗi. Non non bo o barkiɗiniri ɓe, o barkiɗini moy fu e barka mum.
Maayde Yaakuubu
29Ɓaawo mum, Yaakuubu bati sukaaɓe mum wi'i: Mi maayan, mi tawaa kookiraaɓe am. To mi maayii, uwon am der yanaane kookiraaɓe am, wonune der lowol gesa Eforoni Hetiyankeejo. 30Der lowol gonuŋol der gesa Mapela, takkol Mamure der leydi Kanaana. Gesa ŋan nun Iburaahiima soodunoo to Eforoni Hetiyankeejo gam uwugo maayɓe mum. 31Ɗon nun Iburaahiima e debbo mum Saratu uwaa, e Isiyaaku e debbo mum Rebeka. Ɗon nun bo uwumi Leya. 32Gesa ŋan e lowol gonuŋol der magga fu sooda nun to Hetiyankeeɓe. 33No Yaakuubu batidi sukaaɓe mum haala kan, o etti koyɗe makko, o ɓili dow banni, o maayi, o tawoy kookiraaɓe makko.
Currently Selected:
Fuɗɗoode 49: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
