YAASINƆ 3
3
Dikiri náanikɛnaa dì ń gba ɔ̃ndɔ̃
1Ma nɛ́, ǹsun tó ma yãdannɛna sãnguro,
ǹgɔ̃ yã kũ ma dìtɛnnɛnɔ kũna n swɛ̃̀n.
2Zaakũ ani n ká wɛ̃̀ndi gbã̀naa,
ani aafia karannɛ.
3Gbɛ̃kɛ kũ náanio sún kɛ̃mmaro,
ǹgɔ̃ dana mɔ̀wakarɛ ũ,
ǹ kɛ̃ n swɛ̃̀ɛa lákũ òdi yã kɛ̃ anloa nà,
4n tɔ́ nigɔ̃ nna,
ĩnigɔ̃ mana Luda kĩnaa kũ bisãsirinɔ.
5Ǹ Dikiri náani kɛ kũ nɛ̀sɛ mɛ̀n doo,
ǹsun gbãna kpá n zĩda dɔ̃naaaro.
6Ǹgɔ̃ a dɔ̃ n yã sĩnda pínki kɛnaa gũn,
ani zɛ́ poronnɛ súsu.
7Ǹsun n zĩda gwa ɔ̃ndɔ̃de ũro,
ǹgɔ̃ Dikiri vĩna vĩ ǹ kɛ̃ yã vãnia.
8Abirekũ nigɔ̃ de n mɛ̀ aafia ɛzɛ ũ,
ani n wánɔ gba gbãna.
9Ǹ bɛ̀ɛrɛ lí Dikirinɛ kũ n aruzɛkɛo
kũ n burapɔ káakunɔ pínki,
10pɔ́blewɛnɔ ni n dɔ̃̀ pa ari àgɔ̃ kɔ́tɛ,
n lo zɔ̃kɔ̃nɔ ni pa yɛ́rɛrɛ kũ sèwɛ̃ dufuo.
11Ma nɛ́, tó Dikiri tɛn foru dɔmma,
ǹsun dɔkɛ kũ a yãoro,
tó à kpã̀kɛ̃nyĩ, ǹsun tó à kɛnnɛ ĩniro.
12Zaakũ gbɛ̃ kũ Dikiri yeiin àdi toto,
lákũ de dì kɛ a nɛ́ kũ à kɛ̀nɛ mananɛ nà.
Ɔ̃ndɔ̃ àree
13Arubarikaden gbɛ̃ kũ à ɔ̃ndɔ̃ lè à kũ̀
à dɔ̃naa lè à pàpa ũ.
14Zaakũ à àre vĩ de andurufula,
àdi karana kɛńnɛ de wurala.
15À bɛ̀ɛrɛ vĩ de gbɛ̀ bɛ̀ɛrɛdela,
pɔ́ kũ ń a ni vĩnɔ ke dí ká a ũro.
16Wɛ̃̀ndi gbã̀na kú a ɔplan,
aruzɛkɛ kũ gakurio kú a ɔzɛn.
17A yãkɛnanɔn nna,
a zɛ́ sĩnda pínki aafia vĩ.
18À de lí wɛ̃̀ndide ũ gbɛ̃ kũ ò kũnanɔnɛ,
arubarikadenɔn gbɛ̃ kũ ò sìnɔ ũ.
19Dikiri gonikɛ gũn à zĩtɛ kàtɛ,
a ɔ̃ndɔ̃ gũn à musu kɛ̀.
20À ísira wɛ̀ɛ bò a dɔ̃naa gũn,
à tò ludambɛ luku mɔtɔ vĩ.
21Ma nɛ́, ǹgɔ̃ wɛ́zɛ̃ vĩ kũ fayaao,
ǹsun wɛ́ vĩalaro.
22Anigɔ̃ de n nini wɛ̃̀ndi ũ,
anigɔ̃ de mɔ̀wakarɛ ũ n wakaaa.
23Ĩnigɔ̃ kure n laakariia,
pɔ́ke ni kpánnɛro.
24Tó n wutɛ, vĩna ni n kũro,
ĩni wútɛ ǹ i o nna.
25Ĩni vĩna kɛ kariinɛro,
ke kisira kũ àdi yãvãnikɛrinɔ le kãnto.
26Zaakũ Dikiri nigɔ̃ de n mìkpaki ũmɛ,
ani tó n gbá vĩ tankutɛla.
27Tó n ɔ tɛni n kpɛ le,
ǹsun gí ǹ yã mana kɛ gbɛ̃ kũ à de ǹ kɛnɛɛnɛro.
28Tó ń kpányĩ zɛ́ vĩ,
ǹsun pi n gbɛ̃dakenɛ à gɛ́ gĩa ari ziaro.
29N gbɛ̃dake kũ à kú n sarɛ kũ à n náanikɛna,
ǹsun a kũ yã vãnioro.
30Tó gbɛ̃ dí yãke kɛnnɛro,
ǹsun lɛ́kpakɔ̃a kɛ kãao pãro.
31Ǹsun gbãnamɔnnɛri kunna ni dɛro,
ǹsun tɛ́ a yãkɛna keiro.
32Zaakũ Dikiri tɛ̃̀ɛmɛ manafikidenɔ ũ,
nɛ̀sɛpuradenɔn àdi kɛ a kpàasinɔ ũ.
33Dikiri dì láari bo gbɛ̃ vãninɔ ɔnnwa,
àdi arubarika da gbɛ̃ mananɔ bɛn.
34Àdi lalandidenɔ lalandi kɛ,
ama à gbɛ̃kɛ vĩ kũ zĩdabusarinɔ.
35Ɔ̃ndɔ̃de dì bɛ̀ɛrɛ le,
yɔ̃nkɔ sɔ̃ àdi wé'i da a zĩdaa.
Bisã Bible © SIM International, 2005.