YAASINƆ 2
2
Tɛna ɔ̃ndɔ̃i àree
1Ma nɛ́, tó n ma yã sì,
tó ń ma yãditɛnanɔ kũna n swɛ̃̀n,
2tó ntɛn sã kpá ɔ̃ndɔ̃yãi,
tó n swɛ̃̀ɛ kpà yã asãnsia,
3tó n lɛ́ zù wɛ́zɛ̃i,
tó n wiki lɛ̀ yã dɔ̀rɔ dɔ̃naaa,
4tó n kpatɛ kɛ̀i lán andurufuu bà,
tó n wɛ̀tɛ lán aruzɛkɛ kũ à utɛnaa bà,
5ĩnigɔ̃ vĩnakɛna Dikirinɛ dɔ̃ sà,
ĩni bo Luda dɔ̃naaa.
6Zaakũ Dikiri mɛ́ àdi ń gba ɔ̃ndɔ̃,
dɔ̃na kũ yã dɔ̀rɔ dɔ̃naao dì bo a kĩnaamɛ.
7À zĩ̀blena kũna gbɛ̃ mananɔnɛ,
à de sɛ̃gbako ũ taarisaridenɔnɛ.
8Àdi ɔ lika gbɛ̃ mananɔi ń zɛ́ gũn,
àdi a yãmarinɔ dãkpã ń táa'onaa gũn.
9Ĩnigɔ̃ yãzɛde dɔ̃ sà kũ yã súsuo
kũ yã manao kũ zɛ́ manao pínki.
10Zaakũ ɔ̃ndɔ̃ ni gɛ̃ n swɛ̃̀n,
dɔ̃na ni n pɔ kɛ nna.
11N laakari ni n dãkpã,
asãnsi ni ɔ likanyĩ.
12Ani n bo gbɛ̃ vãninɔ zɛ́n
ani n sí yãbɛ̃nɛ'orinɔ ɔĩ.
13Gbɛ̃ pìnɔ pã̀ zɛ́ súsunɛ,
ò gusira zɛ́ sɛ̀.
14Òdi pɔnna kɛ vãnikɛnaa gũn,
òdi yã vãni fayasari nna ma.
15Ń yãkɛna súsuro,
òdigɔ̃ yã kɛ kũ manafikiomɛ.
16Ɔ̃ndɔ̃ pì ni n sí zinakɛri ɔĩ,
ani n bo karua yãnnanna'onnɛnan.
17Nɔgbɛ̃ pì pã kpà a nɛ́nɔkparekɛgɔrɔ gɔ̃i,
à Luda bàka kunna kãao yã gbòro.
18A bɛ dì mì pɛ́ kũńwo gaamɛ,
a kpɛ́ zɛ́ dì tá kũńwo gyãwãn.
19Gbɛ̃ kũ à gɛ̃̀ii dì nɛ̀sɛ litɛro,
àdi wɛ̃̀ndi zɛ́ le doro.
20Ɔ̃ndɔ̃ pì ni n da gbɛ̃ mananɔ zɛ́a,
ĩnigɔ̃ dɔ̀rɔdenɔ zɛ́ kũna.
21Zaakũ nɛ̀sɛpuradenɔ mɛ́ oni gɔ̃ bùsu vĩ,
taarisaridenɔ mɛ́ onigɔ̃ kú a gũn.
22Yãvãnikɛrinɔ sɔ̃, oni pɛ́ḿma ò ń bɔtɛ bùsun,
oni náanisaridenɔ kpakɛ a gũn.
Bisã Bible © SIM International, 2005.