NARONAA 22
22
Mɔabunɔ kína Balaki Balamu sísinaa
1Isarailanɔ dà zɛ́n, akũ ò bùraa kàtɛ Mɔabunɔ bùsu sɛ̃̀n Yoda bara dire kũ à arɛ dɔ Yɛrikoa. 2Zipo nɛ́ Balaki Mɔabunɔ kína è lákũ Isarailanɔ kɛ̀ Amɔrinɔnɛ nà, 3akũ swɛ̃̀ɛ kɛ̃̀ Mɔabunɔgu, vĩna ń kũ Isarailanɔ dasikɛ yãi. 4Akũ Mɔabunɔ pì Midiã gbɛ̃ zɔ̃kɔ̃nɔnɛ: Pari díkĩna ni pɔ́ kũ à likawáinɔ ble pínki lán zùu dì sɛ̃̀ só nà. 5Akũ Balaki gbɛ̃nɔ zĩ̀ Bɛɔ nɛ́ Balamua ari Peto, Yuflati sarɛ a bɛ bùsun. À pìńnɛ ò a sísi à su, ò pinɛ: Gbɛ̃ kenɔ bò Misila ò dàgula ò kátɛ ma sarɛ. 6N yã nna! Ǹ mɔ́ ǹ lɛ́ kɛńnɛmɛnɛ, zaakũ ń gbãna demala. Òdigɔ̃ dɔ̃ro ke mani le mà zĩ̀ bleḿma mà pɛ́ḿma bùsu dín gwɛɛ. Má dɔ̃ kũ gbɛ̃ kũ n sa mana ònɛ nigɔ̃ de arubarikade ũmɛ. Gbɛ̃ kũ n sa vãni ònɛ sɔ̃, anigɔ̃ de láaribona pɔ́ ũmɛ.
7Mɔabu kũ Midiã gbɛ̃ zɔ̃kɔ̃nɔ dà zɛ́n, ò màsokɛna gba kũ oni da Balamunɛ kũna. Kũ ò kà a kĩnaa, ò yã kũ Balaki ń zĩoo ònɛ. 8À pìńnɛ: À i la, mani yã kũ Dikiri ni omɛnɛ oárɛ. Akũ Mɔabu kínanɛ pìnɔ ì Balamu bɛa. 9Akũ Luda bò à sù Balamua à a là à pì: Dínɔn gbɛ̃ kũ ò kú kũnwo díkĩnanɔ ũu? 10À wèa à pì: Zipo nɛ́ Balaki, Mɔabunɔ kína mɛ́ à ń zĩma. Ò pì 11gbɛ̃ kenɔ bò Misila ò dàgula. Akũ à pì mà su mà lɛ́ kɛńnɛarɛ de à le à zĩ̀ bleḿma à pɛ́ḿma. 12Akũ Luda pìnɛ: Ǹsun tɛ́ńyĩro. Ǹsun sa vãni ońnɛro, zaakũ ma arubarikaa dàńgu kɔ̀. 13Kũ Balamu fùtɛ kɔnkɔ, à pì Balaki kínanɛnɔnɛ: À tá á bùsun, zaakũ Dikiri gì mà tɛ́ái. 14Akũ Mɔabu kínanɛ pìnɔ fùtɛ ò tà Balaki kĩnaa ò pì: Balamu gì su kũooi.
15Balaki ɛ̀ra à kínanɛ pãndenɔ zĩ̀ dɔ, ń dasi kũ ń gakurio de gbɛ̃ káakunɔ pɔ́la. 16Kũ ò kà Balamu kĩnaa, ò pì: Zipo nɛ́ Balaki pì ǹsun tó pɔ́ke kpánnɛ kũ suna a kĩnaaoro, 17zaakũ áni gba kɛnnɛ manamana. Pɔ́ kũ n òarɛ pínki, áni kɛ. N yã nna! Ǹ mɔ́ ǹ lɛ̀ kɛarɛ gbɛ̃ pìnɔa. 18Akũ Balamu pì Balaki zĩ̀rii pìnɔnɛ: Bee tó Balaki andurufu kũ wura kũ à kú a bɛaoo kpàma pínki, mani fɔ̃ mà bo Dikiri ma Luda yã kpɛro, bee fíti. 19À i la gwãaniala lákũ gbɛ̃ káakunɔ kɛ̀ nà ari mà ma dɔ yã kũ Dikiri ni karamɛnɛ. 20Luda bò à sùa gwãani à pìnɛ: Zaakũ gbɛ̃ díkĩnanɔ sù n sísi, ǹ futɛ ǹ gɛ́ kũńwo, ama yã kũ mani on ǹ kɛ.
Balamu zaaki yã'onaa
21Balamu fùtɛ kɔnkɔ à gàarii yĩ̀ a zaakinɛ, akũ à gɛ̀ɛ kũ Mɔabu kínanɛ pìnɔo. 22Luda pɔ fɛ̃̀ kũ à gɛ̀ɛ yãi, akũ Dikiri Malaikaa gɛ̀ɛ à zɛ̀ à zɛ́ zɔ̃̀nɛ. Balamu di a zaaki kpɛ, a zĩkɛri gbɛ̃nɔn planɔn tɛ́ kãao. 23Kũ zaaki pìi è Dikiri Malaika zɛna zɛ́ gũn à fɛ̃nɛda wòto à kũna, akũ à lìtɛ sɛ̃̀n. Balamu a lɛ̀, akũ à ɛ̀ra à dà zɛ́n. 24Dikiri Malaikaa gɛ̀ɛ à zɛ̀ zɛ́ tererennan geepi líkpɛ kũ gbɛ̀ karaa likainɔ dagura. 25Kũ zaaki pì Dikiri Malaikaa è, à nà gbĩ̀ia à Balamu gbá lɔ̀a. Akũ Balamu ɛ̀ra à a lɛ̀ dɔ. 26Dikiri Malaikaa ɛ̀ra à gɛ̀ɛ arɛ dɔ à zɛ̀ gu kpakoto kũ à litɛki vĩron. 27Kũ zaaki pì Dikiri Malaikaa pìi è, à kùtɛ kũ Balamuo. Akũ Balamu pɔ fɛ̃̀ à a lɛ̀ kũ gòoo. 28Akũ Dikiri zaaki pìi gbà lɛ́ à yã ò Balamunɛ à pì: Bɔ́n ma kɛ̀nnɛ n ma lɛ ari gɛ̃̀n aakɔ̃ɔ? 29Balamu wèa à pì: Kũ n yɔ̃nkɔyã kɛ̀mɛnɛ yãimɛ. Tó má fɛ̃nɛ kũna, de ma n dɛ gɔ̃̀nɔ. 30Akũ zaaki pìi pìnɛ: N zaaki kũ ndìgɔ̃ dia gɔrɔ sĩnda pínkia ari suna gbãramɛ ma ũroo? Ma kɛ̀nnɛ lɛ yã yá? À pì: Oi. 31Akũ Dikiri Balamu wɛ́ kɛ̃̀nɛ, à a Malaikaa è zɛna zɛ́n à fɛ̃nɛda wòto à kũna. Akũ à kùtɛ à mìi pɛ̀tɛ.
32Dikiri Malaika a là à pì: Bɔ́yãin n n zaaki lɛ̀ ari gɛ̃̀n aakɔ̃ɔ? Ma su zɛ́ zɔ̃nnɛmɛ, zaakũ n wãmɛnɛ. 33Kũ zaaki pì ma e, akũ à lìtɛmɛnɛ ari gɛ̃̀n aakɔ̃. Tó adi litɛmɛnɛ yãro, de ma n dɛ ma a tò. 34Balamu pì Dikiri Malaikaa pìinɛ: Ma durunna kɛ̀, zaakũ má dɔ̃ kũ n zɛ́ zɔ̃̀mɛnɛro. Zaakũ ma gɛnaa kɛ̀nnɛ ĩni, mani ɛra mà tá. 35Akũ Dikiri Malaikaa pì Balamunɛ: Ǹ gɛ́ kũ gbɛ̃ pìnɔ, yã kũ mani dannɛn ǹ o. Akũ Balamu gɛ̀ɛ kũ Balaki kínanɛ pìnɔo.
36Kũ Balaki mà Balamu tɛn su, akũ à gɛ̀ɛ à dàalɛ wɛ̃tɛ kũ à kú Anɔ bara, Mɔabunɔ bùsu lɛ́zɛkin. 37Akũ à pì Balamunɛ: Kũ ma gbɛ̃nɔ zĩ̀ ò n sísi yã, à kɛ̀ dera ńdi suroo? Mani fɔ̃ mà gba kɛnnɛnloo? 38Balamu wèa à pì: Ma su sà, ama má yã sĩnda pínki ona zɛ́ vĩro. Yã kũ Luda ni damɛnɛn mani o. 39Akũ Balaki gɛ̀ɛ kũ Balamuo Kiria'uzo. 40À sa ò kũ zùnɔ kũ sãnɔ à a nɔ̀bɔɔ kpà Balamua kũ kínanɛ kũ ò kú kãao lɛɛlɛnɔ. 41Kũ gu dɔ̀, à Balamu sɛ̀ à gɛ̀ɛ kãao Bamɔbaali. Gwen Balamu Isarailanɔ bùra kpado èn.
Currently Selected:
NARONAA 22: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
