NARONAA 21
21
Zĩ̀blena Kanaanɔa Nɛgɛvi bùsun
1Aradi kũ à kú Nɛgɛvi bùsun kína bi Kanaa gbɛ̃mɛ. Kũ à mà Isarailanɔn tɛ́ Atarimu zɛ́n òtɛn su, akũ à bò à dàńlɛ kũ zĩ̀io à ń gbɛ̃kenɔ kũ̀kũ. 2Akũ Isarailanɔ lɛ́ sɛ̀ Dikirinɛ ò pì: Tó n gbɛ̃ pìnɔ nàwɛrɛ ó ɔĩ, óni ń wɛ̃tɛnɔ kakatɛ mámmam. 3Dikiri Isarailanɔ yã mà, akũ à Kanaa pìnɔ kpàḿma. Ò ń kákatɛ kũ ń wɛ̃tɛnɔ pínki, akũ ò tɔ́ kpà gu pìinɛ Ɔɔma.
Mɔ̀gotɛ̃ mlɛ̃̀ɛ
4Kũ ò fùtɛ Oru kpi pì kĩnaa, ò Isira Tɛ̃ra zɛ́ sɛ̀ de ò pã Ɛdɔmunɔ bùsuunɛ. Akũ ò fù mɛnaa zɛ́n 5ò Luda kũ Musao taari è ò pì: Bɔ́yãi a ó bɔ́tɛ Misila de ò gaga gbárannann? Pɔ́ble kunlo, í kunlo, o zã pɔ́ble gina dín. 6Akũ Dikiri mlɛ̃̀ pãsĩnɔ zĩ̀ḿma ò ń lɛlɛ, akũ ò gàga dasidasi. 7Gbɛ̃nɔ sù Musa kĩnaa ò pì: O durunna kɛ̀, zaakũ o Dikiri kũ mɔkɔ̃nwoo taari è. Ǹ kútɛ kɛnɛwɛrɛ de à ó kɛ̃kɔ̃a kũ mlɛ̃̀ dínɔ. Akũ à kútɛ kɛ̀nɛńnɛ. 8Dikiri pìnɛ: Ǹ mlɛ̃̀ pi ǹ loko lía ǹ pɛ́tɛ. Tó mlɛ̃̀ gbɛ̃ lɛ̀, tó à wɛ́ sɛ̀ à a gwà, ani aafia le. 9Akũ à mɔ̀gotɛ̃ pì mlɛ̃̀ ũ à lòko lía à pɛ̀tɛ. Tó mlɛ̃̀ gbɛ̃ lɛ̀ akũsɔ̃ à wɛ́ sɛ̀ à mɔ̀gotɛ̃ mlɛ̃̀ɛ pìi gwà, àdi aafia le.
Isarailanɔ pãna Ɛdɔmunɔ kũ Mɔabunɔ bùsunɔnɛ
10Isarailanɔ dà zɛ́n, akũ ò bùraa kàtɛ Obo. 11Bona Obo ò gɛ̀ɛ ò bùraa kàtɛ Iyɛ'abarimu gbárannan Mɔabunɔ bùsu ifãboki kpa. 12Bona gwe ò gɛ̀ɛ ò bùraa kàtɛ Zeredi guvutɛn. 13Bona gwe ò bùraa kàtɛ Anɔ bara dire, gbáranna kũ à kú Amɔrinɔ bùsu lɛ́zɛkin. Anɔ pìmɛ Mɔabunɔ kũ Amɔrinɔ bùsunɔ lɛ́zɛki ũ. 14Abire yãin ò pì Dikiri zĩ̀katakada gũn:
Waɛbu kũ à kú Sufa bùsun kũ Anɔ swa'ɔnɛnɔ
15kũ ń guvutɛ kũ ò tà ari Aranɔo
Mɔabunɔ bùsu lɛ́zɛkin.
16Bona gwe dɔ ò gɛ̀ɛ Lɔ̀gɔ, gu kũ Dikiri pìn Musanɛ: Ǹ gbɛ̃nɔ kakara mà í kpáḿma. 17Gwen Isarailanɔ lɛ̀ díkĩna sìn:
Í bo lɔ̀gɔn, gbasa ò lɛ̀ sínɛ,
18lɔ̀gɔ kũ ó don'arɛdenɔ yɔ̃̀ kũ línɔ,
lɔ̀gɔ kũ kínɛnɔ pà kũ ń gònɔ.
Bona gbárannan ò gɛ̀ɛ Matana. 19Matana gbɛra Naliɛli, Naliɛli gbɛra Bamɔ. 20Bamɔ gbɛra guvutɛ kũ à kú Mɔabunɔ bùsun, gu kũ Pisiga mìsɔ̃ntɛ arɛ dɔ gbárannaa.
Zĩ̀blena Siɔ̃ kũ Oguooa
21Isarailanɔ gbɛ̃nɔ zĩ̀ Amɔrinɔ kína Siɔ̃a ò pì: 22Ǹ ó gba zɛ́ ò gɛ̃tɛ n bùsuua. Óni pã buranɔ ke geepi líkpɛlaro, óni á lɔ̀gɔ'i miro. Ónigɔ̃ tɛ́ kína zɛ́da gũmmɛ ari ò gɛ́ gɛ̃tɛo n bùsula. 23Siɔ̃ dí ń gba zɛ́ ò gɛ̃tɛ a bùsuuaro. À a zĩ̀karinɔ kàkara ń pínki, ò bɔ̀tɛ òtɛn gɛ́ńyĩ gbárannan. Kũ ò kà Yaza, ò zĩ̀i kà kũ Isarailanɔ, 24akũ Isarailanɔ ń dɛdɛ kũ fɛ̃nɛdao ò ń bùsuu sìḿma zaa Anɔ ari Yabokui Amɔninɔ bùsun, zaakũ Amɔninɔ bùsu lɛ́zɛki pì pãsĩ, àdi sí gɛ̃nlo. 25Isarailanɔ Amɔri wɛ̃tɛnɔ sì pínki kũ Ɛsɛbɔ̃o kũ a lakutunɔ pínki, akũ ò vùtɛn. 26Ɛsɛbɔ̃mɛ Amɔrinɔ kína Siɔ̃ wɛ́ra ũ. Siɔ̃ zĩ̀i kà yã kũ Mɔabunɔ kína káakuo, akũ à a bùsuu sìa ari Anɔ swai. 27Abire yãin kɛrɛnɔ dì pi:
À mɔ́ Ɛsɛbɔ̃,
ò Siɔ̃ wɛ́ra pì kɛkɛ ò kátɛ!
28Tɛ́ bò Ɛsɛbɔ̃ yã,
zĩ̀karinɔ bò Siɔ̃ wɛ̃tɛ pìi gũn,
ò Mɔabunɔ bùsu wɛ́ra Ara kàkatɛ
Anɔ mìi sĩ̀sĩ gbɛ̃ pìnɔ.
29Waiyoo Mɔabunɔ!
Kɛmɔsi gbàgbarinɔ, a kakatɛmɛ!
Kɛmɔsi tò á gɔ̃gbɛ̃nɔ fã̀kɔ̃a,
à á nɔgbɛ̃nɔ kpà Amɔrinɔ kína Siɔ̃a zĩ̀zɔnɔ ũ.
30Akũ o ń fú,
o ń dɛdɛ zaa Ɛsɛbɔ̃ ari Dibɔ̃.
O ń kákatɛ ari Nɔfa kũ Mɛdɛbao.
31Lɛn Isarailanɔ vùtɛ Amɔrinɔ bùsun lɛ. 32Musa gbɛ̃nɔ zĩ̀ Yaza asiri gwa, akũ Isarailanɔ gwe sì kũ a lakutunɔ pínki, ò pɛ̀ Amɔri kũ ò kú gwenɔa.
33Akũ Isarailanɔ lìtɛ ò Basã zɛ́ sɛ̀. Akũ Basã kína Ogu gɛ̀ɛńyĩ kũ a zĩ̀karinɔ ń pínki ò zĩ̀i kà kũńwo Ɛdɛrɛi. 34Dikiri pì Musanɛ: Ǹsun vĩna kɛnɛro, zaakũ ma a nànnɛ n ɔĩ kũ a gbɛ̃nɔ kũ a bùsuuo pínki. Ǹ kɛnɛ lákũ n kɛ̀ Amɔrinɔ kína Siɔ̃ kũ à kí blè Ɛsɛbɔ̃nɛ nà. 35Akũ ò Ogu dɛ̀ kũ a nɛ́nɔ kũ a zĩ̀karinɔ ń pínki, bee gbɛ̃ mɛ̀n do dí boro, akũ ò a bùsuu pìi sì.
Currently Selected:
NARONAA 21: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
