NARONAA 10
10
Andurufu kãkãki mɛ̀n planɔ
1Dikiri yã ò Musanɛ à pì: 2Ǹ kãkãki pi mɛ̀n pla kũ andurufu kũ ò gbɛ̃̀gbɛ̃ manamanao gbɛ̃nɔ kakarabɔ ũ de ò bùra futɛ. 3Tó ò kãkãki pìnɔ pɛ̀, gbɛ̃nɔ ni su ò kakaranyĩ ń pínki dakarɛki kpɛ́lɛlɛa. 4Tó kãkãki mɛ̀n don ò pɛ̀, Isaraila buri don'arɛde kũ ò de kína ũnɔ mɛ́ oni su ò kakaranyĩ. 5Tó ò kãkãki pìnɔ pɛ̀ kũ yĩsãmpanaao, gbɛ̃ kũ ń bùra kú ifãboki kpanɔ mɛ́ oni bùra futɛ káaku. 6Tó ò a gɛ̃̀n plade pɛ̀ kũ yĩsãmpanaao, gbɛ̃ kũ ń bùra kú gɛ̀nɔmidɔki kpanɔ mɛ́ oni bùra futɛ. Kãkãkipɛna kũ yĩsãmpanaao pìimɛ gbɛ̃nɔ dana zɛ́n sèeda ũ. 7Tó ò ye ò gbɛ̃nɔ kakara, ògɔ̃ pɛ́ yĩsãmpanaa sari.
8Haruna nɛ́ sa'orinɔ mɛ́ oni kãkãki pìnɔ pɛ́. Anigɔ̃ deárɛ doka ũ gɔrɔ sĩnda pínki, ákɔ̃nɔ kũ á burinɔ. 9Gɔrɔ kũ a ka á bùsun, tó átɛn gɛ́ zĩ̀ ká kũ á ibɛrɛ kũ oni sù ò futɛ kãáonɔ, àgɔ̃ kãkãki pìnɔ pɛ́ kũ yĩsãmpanaao, de á yã le à dɔ makũ Dikiri á Ludagu, mani á bo á ibɛrɛɛ pìnɔ ɔĩ. 10Gɔrɔ kũ átɛn pɔnna kɛ sɔ̃, dikpɛn yá, mɔ dufu gɔrɔ káaku zĩn yá, àgɔ̃ kãkãki pìnɔ pɛ́ á sa'opɔ kũ òdi ká tɛ́n à tɛ́ kũnɔa kũ á sáabukpana sa'opɔnɔ, á yã ni dɔmagu. Makũmɛ Dikiri á Luda ũ.
Isarailanɔ futɛna Sinai
11Wɛ̃̀ plade mɔ plade gɔrɔ barode zĩ, tɛ́luku gò sèeda kutala, 12akũ Isarailanɔ bùraa fùtɛ Sinai gbárannan, òtɛn bùra sɔ̃sɔ̃ ari tɛ́luku gɛ̀ɛ à zɛ̀ Parani gbárannan. 13Ń bùra futɛna káakun gwe. Ò kɛ̀ lákũ Dikiri dà Musanɛ à òńnɛ nà.
14Yuda zĩ̀karinɔ mɛ́ ò bùraa fùtɛ gã̀ kũ gã̀ao káaku kũ ń tutaao. Aminadabu nɛ́ Nasɔ̃mɛ ń don'arɛde ũ. 15Zua nɛ́ Nɛtanɛlimɛ Isaka zĩ̀karinɔ don'arɛde ũ. 16Eloni nɛ́ Ɛliabumɛ Zɛbuluni zĩ̀karinɔ don'arɛde ũ. 17Gɛsɔmu burinɔ kũ Mɛrari burinɔ kuta pìi gbòro, akũ ò sɛ̀ ò dào zɛ́n.
18Akũ Rubɛni zĩ̀karinɔ bùraa fùtɛ gã̀ kũ gã̀ao kũ ń tutaao. Sedeu nɛ́ Ɛlizumɛ ń don'arɛde ũ. 19Zurisadai nɛ́ Selumiɛlimɛ Simɛɔ zĩ̀karinɔ don'arɛde ũ. 20Dɛwɛli nɛ́ Ɛliasafamɛ Gada zĩ̀karinɔ don'arɛde ũ. 21Akũ Koa burinɔ Luda pɔ́nɔ sɛ̀ ò dào zɛ́n. Ò kuta pìi dɔ̀ ari ògɔ̃ ká.
22Akũ Ɛflaimu zĩ̀karinɔ bùraa fùtɛ gã̀ kũ gã̀ao kũ ń tutaao. Amiudu nɛ́ Ɛlisamamɛ ń don'arɛde ũ. 23Pedazu nɛ́ Gamaliɛlimɛ Manase zĩ̀karinɔ don'arɛde ũ. 24Gideoni nɛ́ Abidãmɛ Biliaminu zĩ̀karinɔ don'arɛde ũ.
25Akũ Dã zĩ̀karinɔ bùraa fùtɛ gã̀ kũ gã̀ao kũ ń tutaao. Mɔ́kɔ̃nɔ mɛ́ òdigɔ̃ tɛ́ kpɛkpɛ. Amisadai nɛ́ Ayɛzamɛ ń don'arɛde ũ. 26Ɔkɔrana nɛ́ Pagiɛlimɛ Asa zĩ̀karinɔ don'arɛde ũ. 27Enana nɛ́ Airamɛ Nafatali zĩ̀karinɔ don'arɛde ũ. 28Lákũ Isarailanɔ dì bùra futɛfutɛ ògɔ̃ tɛ́tɛkɔ̃i nàn gwe gã̀ kũ gã̀ao.
29Obabumɛ Musa anzure Ruɛli nɛ́ ũ, Midiã burimɛ. Musa pìnɛ: Ótɛn da zɛ́n ò gɛ́ bùsu kũ Dikiri pì áni ó gban. Ǹ mɔ́ ǹ gɛ́ kũoo, óni yã mana kɛnnɛ, zaakũ Dikiri nnamana gwe lɛ́ sɛ̀wɛrɛ. 30Akũ à pìnɛ: Mani gɛ́ro, mani ɛra ma bùsun ma bedenɔ kĩnaamɛ. 31Musa pì: N yã nna. Ǹsun ó tónlo, zaakũ ń bùrakatɛki mana dɔ̃ akũsɔ̃ mɔkɔ̃n mɛ́ ĩni kɛ ó wɛ́de ũ. 32Tó n gɛ kũoo, óni yã mana kũ Dikiri ni kɛwɛrɛ kɛnnɛ se.
33Isarailanɔ bùraa fùtɛ Dikiri kpi sarɛ ò táa ò gɔrɔ aakɔ̃. Ò dò arɛ kũ Dikiri bàka kunna kũńwo àkpatiio de à bùrakũki mɔńnɛ. 34Tó ò fùtɛ ò dà zɛ́n, Dikiri tɛ́luku pìi dìgɔ̃ kúńla fãnantɛ̃. 35Tó ò dà zɛ́n kũ àkpatiio, Musa dì pi:
Ǹ futɛ Dikiri, de n ibɛrɛnɔ fãkɔ̃a,
n zãngurinɔ bàa lɛ́nnɛ.
36Tó ò dìtɛ, Musa dì pi:
Dikiri, ǹ ɛra ǹ su Isaraila dúbu ũgbangbanɔa.
Currently Selected:
NARONAA 10: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
