NARONAA 11
11
Dikiri tɛ́ futɛnaa
1Isarailanɔ zuka kà Dikirii ń warikɛna yãi. Kũ Dikiri mà, à pɔ fɛ̃̀, akũ a tɛ́ fùtɛ ń tɛ́, ń bùra kpado tɛ́ kũ̀. 2Akũ gbɛ̃nɔ wiki lɛ̀ Musaa. Kũ à wɛ́ kɛ̀ Dikiria, akũ tɛ́ pìi zɛ̀. 3Akũ ò tɔ́ kpà gu pìinɛ Tabera, kũ Dikiri tɛ́ fùtɛ ń tɛ́ gwe yãi.
Dikiri kpɛkpɛrɛwinɔ gbarɛnaa
4Buri pãndenɔn kú Isarailanɔ tɛ́, òtɛn pɔ́ble pãnde ni dɛ, akũ Isarailanɔn tɛn ɔ́ɔ dɔ se ò pì: Mán óni nɔ̀bɔ len ò sóo? 5Ótɛn kpɔ̀ kũ o sò Misila ó pɔyeinaaa bɛgɛ kɛ kũ plɛ̃̀nɔ kũ gbɛzɛnɔ kũ ɛfɔnɔ kũ arubasanɔ kũ arubasa gizonɔo. 6Tera sà ó lɛ́ gà, zaakũ odì pɔ́ke lero, séde mana dí baasiro.
7Manaa pì wɛ́ kete, à de lán lí'ɔ bàmɛ. 8Isarailanɔ dì sɛ́tɛ ò lɔ́ gbɛ̀n ke òdi zɔ̃ gón. Òdi disa ò kàra kɛo. A nna lán kàra asãnaa bà. 9Tó plí kpà bùran gwãani, akũ manaa pìi dì kɔ́tɛ se.
10Musa mà òtɛn ɔ́ɔ dɔ ɔnlɛ kũ ɔnlɛo. Dikiri pɔ fɛ̃̀ manamana, akũ à kɛ̀ Musanɛ ĩni 11à pìnɛ: Bɔ́yãin ntɛn wɛ́ tãmaii? Ma yã kpate mɛ́ à kɛ̀nnɛ vãni, akũ n gbɛ̃ pìnɔ gwana aso dìmɛnɛɛ? 12Makũ mɛ́ ma gbɛ̃ pìnɔ nɔ̀ɔ sì yá? Makũ mɛ́ ma ń í yá? Bɔ́yãi n pìmɛnɛ mà ń kú kpɛ lán nɛ́rande bà mà gɛ́ kũńwo bùsu kũ n la dà ń dizinɔnɛnn? 13Mákpan mani nɔ̀bɔ len mà kpá gbɛ̃ pìnɔa ń pínkii? Zaakũ òtɛn ɔ́ɔ dɔmɛnɛ òtɛn pi mà ń gba nɔ̀bɔɔ ò só. 14Mani fɔ̃ mà gbɛ̃ pìnɔ aso sɛ́ ń pínki madoro, zaakũ ń aso demala. 15Tó lɛn ĩni kɛmɛnɛ lɛ, ǹ tó ma n pɔnna le ǹ ma dɛ gɔ̃̀nɔ. Ǹsun tó mà wari pì kɛ doro. 16Akũ Dikiri pìnɛ: Ǹ Isaraila gbɛ̃ zɔ̃kɔ̃ kũ ń ń dɔ̃ don'arɛde ũnɔ kakara gbɛ̃nɔn baaakɔ̃ akuri ǹ su kũńwo dakarɛki kuta kia ògɔ̃ kú kũnwo gwe. 17Mani kipa mà yã onnɛ gwe mà a Nini kũ à kúmma kpado go mà dińnɛ, oni gbɛ̃nɔ gwana aso sɛ́ kũnwo de ǹsungɔ̃ ń sɛna ndo doro yãi. 18Ǹ o gbɛ̃nɔnɛ ò gbã̀ bo ń zĩdanɛ zia yãi, oni nɔ̀bɔ le ò só. Zaakũ ò ɔ́ɔ dɔ̀mɛnɛ ò pì, mán óni nɔ̀bɔ len la ò sóo? Ò pì ò sã̀na Misila. Abire yãin mani ń gba nɔ̀bɔ ò só. 19Oni só adi kɛ gɔrɔ donlo, gɔrɔ planlo, gɔrɔ sɔɔronlo, gɔrɔ kurinlo, gɔrɔ baronlo. 20Oni só mɔ do gbãngbãn ari à bo ń yĩn a ni bo ń pɔn. Zaakũ makũ Dikiri má kú ń tɛ́, akũ ò pã kpàmai. Ò zuka dɔ̀ma ò pì, bɔ́yãi ò bò Misilai? 21Akũ Musa pì: Gɔ̃gbɛ̃nɔn kú kũmao tá gũn gbɛ̃nɔn dúbu wàa aakɔ̃, akũ n pì ĩni nɔ̀bɔ kpáḿma ò só ari mɔ do gbãngbãn yá? 22Bee tó ò sãnɔ kũ zùnɔ dɛ̀dɛ dasidasi, ani mɔ́ḿma yá? Tó ò ísira kpɔ̀nɔ sɛ̀tɛ pínki, ani mɔ́ḿma yá? 23Dikiri wèa à pì: Ma gbãna ni kánloo? Ĩni e tera, tó yã kũ ma ònnɛ ni kɛ ke ani kɛro.
24Musa bò à Dikiri yã pìnɔ òńnɛ. À Isaraila gbɛ̃ zɔ̃kɔ̃nɔ kàkara gbɛ̃nɔn baaakɔ̃ akuri à ń zɛ́ ò lìka kuta pìii. 25Akũ Dikiri kìpa tɛ́luku gũn à yã ò kãao. À a Nini kũ à kúa kpado gò à dì gbɛ̃ zɔ̃kɔ̃ gbɛ̃nɔn baaakɔ̃ akurii pìnɔnɛ. Kũ à a Nini pìi dìńnɛ lɛ, ò annabikɛyã ò, abire gbɛra odi ɛra ò kɛ̀ doro. 26Gbɛ̃ kũ Musa ń sɛ́ gbɛ̃nɔn planɔ gɔ̃̀ bùran, gbɛ̃ do tɔ́n Ɛlɛdada, gbɛ̃ do sɔ̃ Mɛdada. Odi gɛ́ kuta kĩnaaro, ama Nini pìi sùḿma se, akũ ò annabikɛyã ò bùran. 27Kɛfɛnna ke bàa lɛ̀ à gɛ̀ɛ à pì Musanɛ: Ɛlɛdada kũ Mɛdadao tɛn annabikɛyã o bùran. 28Nuni nɛ́ Yɔsuamɛ Musa kpàasi ũ zaa a kɛfɛnnakɛgɔrɔa, akũ à pì: Baa Musa, ǹ gíńnɛ. 29Akũ Musa pìnɛ: Ntɛn nɛ̀sɛgɔ̃ba kɛ kũńwo ma yã musun yá? Tó Dikiri a Nini dì a gbɛ̃nɔnɛ ò gɔ̃̀ annabinɔ ũ ń pínki, à manaroo? 30Akũ Musa ɛ̀ra bùran kũ Isarailanɔ gbɛ̃ zɔ̃kɔ̃ɔ pìnɔo.
31Dikiri tò ĩa bò ísira kpa à sù kũ kpɛkpɛrɛwinɔ, ò dà bùrala. Ò lìka bùraai gu sĩnda pínki à kà tágɔrɔ do ũ, akũsɔ̃ ń vurana lei kà gã̀sãkuru pla. 32Fãnantɛ̃ birea kũ gwãanio kũ a gu làa dɔnaao ò fùtɛ ò gɛ̀ɛ ò kpɛkpɛrɛwinɔ kũ̀kũ. Gbɛ̃ kũ adi kũkũ dasiro kũ̀kũ bùruma baro. Akũ ò fã̀tɛ à kori kɛ̀. 33Kũ ò a nɔ̀bɔɔ dà ń lɛ́n gɔ̃̀nɔ, odi le ò só dasiro, akũ Dikiri pɔ fɛ̃̀ńyĩ à gagagyã kàńgu. 34Akũ ò tɔ́ kpà gu pìinɛ Lɛ́'idenɔ Mira, zaakũ gwen ò gbɛ̃ kũ nɔ̀bɔ lɛ́'i ń kũnɔ vĩ̀n. 35Akũ Isarailanɔ fùtɛ gwe ò gɛ̀ɛ Azero ò gɔrɔ pla kɛ̀ gwe.
Currently Selected:
NARONAA 11: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
