MAAKU 6

Nazɛradenɔ gina Yesui

(Mat 13:53-58; Luk 4:16-30)

1Yesu bò gwe à gɛ̀ɛ a bɛ wɛ̃tɛn, a ìbanɔn tɛ́i. 2Kũ kámmabogɔrɔ kà, akũ àtɛn yã dańnɛ aduakɛkpɛn. Akũ pari kũ ò a yã mànɔ bídi kɛ̀ ò pì: Mákpan gɔ̃gbɛ̃ pì yã dínɔ lènn? Ɔ̃ndɔ̃ kpaten ò kpàa, akũ àtɛn daboyã dí takanɔ kɛɛ? 3Àkũmɛ lí'ari ũroo? Mariama nɛ́nloo? Yamisi kũ Yusufuo kũ Yudao kũ Simɔnɔ vĩ̀nin gweroo? A dãrenɔ mɛ́ ò kú kũoo laroo? Akũ ò gìi. 4Akũ Yesu pìńnɛ: Annabii dìgɔ̃ bɛ̀ɛrɛɛ sariro, sé a bɛ wɛ̃tɛn kũ a danɛnɔ kĩnaao kũ a ɔnnwo baasiro. 5Yesu dí fɔ̃ à daboyã ke kɛ̀ gwero, sé gyãre kũ à ɔ nàḿma à ń wérekɔ̃a kenɔ baasiro. 6Kũ odi a náani kɛro, ń yã bò a sarɛ manamana.

Yesu zĩ̀rinɔ zĩnaa

(Mat 10:5-15; Luk 9:1-6)

Akũ à gɛ̀ɛ lakutu kũ lakutuo, àtɛn yã dańnɛ. 7Akũ à a ìba gbɛ̃nɔn kuri awɛɛplanɔ sìsiai, akũ à ń zĩ gbɛ̃nɔn plapla, à ń gbá iko ò tãnanɔ goḿma. 8À pìńnɛ: Àsun pɔ́ke sɛ́ à gɛ́oro, zàna ke bɔ̀kɔlokona ke ɔgɔ, sé gòo. 9À kyate kpá, ama àsun uta da mɛ̀n plaro. 10Bɛ kũ a kipan, àgɔ̃ kú gwe ari à gɛ́ boo wɛ̃tɛ pìi gũn. 11Gu kũ odi gbãnakɛ kpáái ke odi sã kpá á yãiro, tó átɛn tá, à lukutɛ̃ warawara á gbánɔa ń tona kũ Ludao sèeda ũ. 12Akũ ò dà zɛ́n ò nɛ̀sɛlitɛna waazi kɛ̀ gbɛ̃nɔnɛ 13ò tãnanɔ gòḿma dasi, ò nísi màma gyãrenɔa dasi ò ń wérekɔ̃a.

Yahaya Da'itɛkɛri ganaa

(Mat 14:1-12; Luk 9:7-9)

14Kí Hɛrɔdu yã pìnɔ mà, zaakũ Yesu tɔ́ kà gu sĩnda pínkia. Gbɛ̃kenɔ tɛn pi Yahaya Da'itɛkɛri mɛ́ à fùtɛ bona gan, abire yãin à gbãna lè àtɛn daboyãnɔ kɛ. 15Gbɛ̃kenɔ pì Iliasumɛ, gbɛ̃kenɔ pì annabiimɛ lán annabi yãnɔ doke bà. 16Kũ Hɛrɔdu mà à pì: Yahaya kũ ma a mìi zɔ̃̀ mɛ́ à vù bona gan.

17-18Zaakũ Hɛrɔdu dokɔ̃nɔ pì mɛ́ à a vĩ̀ni Filipi nɔ Hɛrɔdia sìa à sɛ̀. Kũ Yahaya dìgɔ̃ onɛ a vĩ̀ni nɔ sinaa manaro, akũ Hɛrɔdu tò ò Yahaya kũ̀ ò mɔ̀ɔ kàa ò a dà kpɛ́siran. 19Hɛrɔdia sɔ̃ à Yahaya pɛ̃tɛ̃ kũnamɛ à ye à a dɛ, ama adi zɛ́ lero, 20zaakũ Hɛrɔdu dɔ̃̀ kũ Yahaya bi Luda gbɛ̃ súsumɛ, akũ àdi vĩna kɛnɛ àdi tó ò wari dɔaro. Tó à gɛ̀ɛ à a yã ma, laasun dì gɛ̃mmɛ. Bee kũ abireo àdigɔ̃ ye a fàaibonaai.

21Hɛrɔdia zɛ́ è Hɛrɔdu ina gɔrɔ kɔ̃kɔ̃ zĩ. Hɛrɔdu gbãnadenɔ kũ soza gbɛ̃ zɔ̃kɔ̃nɔ kũ Galili gbɛ̃ bɛ̀ɛrɛdenɔ kàkara pɔ́blekia. 22Akũ Hɛrɔdia nɛ́nɔkpare gɛ̃̀ à ũ wã̀. À kɛ̀ Hɛrɔdunɛ nna kũ a nibɔnɔ ń pínki, akũ kína pì nɛ́ pìinɛ: Pɔ́ kũ ń yei ǹ a wɛ́ kɛma, mani n gba. 23Akũ à ɛ̀ra à pìnɛ: Ma la dànnɛ pɔ́ kũ n a wɛ́ kɛ̀ma pínki, mani n gbamɛ, bee ma kpata kpaatɛ. 24Akũ nɛ́nɔkpare pìi bò à gɛ̀ɛ à a da là à pì: Bɔ́n mani wɛ́ kɛaa? Akũ a da pìnɛ, Yahaya Da'itɛkɛrii mìi. 25Gwe gɔ̃̀nɔ à ɛ̀ra à sù likalika à gɛ̀ɛ à ò kínanɛ: Má yei ǹ ma gba Yahaya Da'itɛkɛrii mì dana tiree gũn la tera.

26Akũ kína pɔ yàka manamana, ama kũ à la dà nibɔnɔ wára yãin adi fɔ̃ à gì doro. 27Akũ kína pì a dogari ke zĩ̀ gɔ̃̀nɔ, à pìnɛ à gɛ́ à a mì zɔ̃ à mɔ́o. Akũ à gɛ̀ɛ à a mìi zɔ̃̀ kpɛ́siran 28à dà tiree gũn à sù à kpà nɛ́ pìia, akũ à kpà a daa. 29Kũ Yahaya ìbanɔ yã pìi mà, akũ ò sù ò a gɛ̀ɛ sɛ̀ ò vĩ̀.

Pɔ́blekpana gbɛ̃nɔn dúbu sɔɔronɔa

(Mat 14:13-21; Luk 10:9-17; Yuh 6:1-15)

30Yesu zĩ̀rii pìnɔ sù a kĩnaa, akũ ò yã kũ ò kɛ̀nɔ kũ yã kũ ò dàńnɛnɔ ònɛ pínki. 31Òtɛn gɛ́ òtɛn su, akũ Yesu kũ a zĩ̀rinɔ dí zɛ́ le ò pɔ́ blè sero pari yãi. Akũ à pìńnɛ: À mɔ́ ò gɛ́ gusarɛ ó tɛ̃nɛ ò kámma bo fíti. 32Akũ ò dà zɛ́n gó'itɛ gũn òtɛn gɛ́ gusarɛ ńtɛ̃nɛ. 33Kũ gbɛ̃nɔ ń gɛnaa è, ò ń dɔ̃, akũ ò bò wɛ̃tɛ kũ wɛ̃tɛo dasi ò bàa lɛ̀ gɛ̀sɛ ò kà gwe ń ã. 34Kũ Yesu bò gó gũn, à gbɛ̃nɔ è dasidasi, akũ ò kɛ̀nɛ wɛ̃nda, zaakũ ò de lán sã kũ ò dã̀ri vĩronɔ bàmɛ. Akũ àtɛn yã dańnɛ manamana.

35Kũ ifãntɛ̃ bùsa, akũ a ìbanɔ nài ò pì: Gu dí bi sɛ̃̀ntɛpɔrɔtumɛ, akũsɔ̃ gu tɛn si. 36Ǹ gbɛ̃nɔ gbarɛ ò tá bura kũ lakutu kũ ò kú kãninɔa, ò pɔ́ wɛtɛ ò lú ò ble. 37Akũ Yesu wèḿma à pì: À pɔ́ kpáḿma ò ble. Akũ ò pìnɛ: Ń ye ò gɛ́ burodi lú andurufu ɔgɔ wàa do ò kpáḿma ò blen yá? 38Akũ Yesu ń lá à pì: Burodi mɛ̀n ũgban á vĩi? À gɛ́ gwa. Kũ ò kà, ò pì: Burodi kun mɛ̀n sɔɔro kũ kpɔ̀ɔo mɛ̀n pla.

39Akũ à pìńnɛ: À gbɛ̃nɔ vutɛvutɛ sɛ̃̀la bɔ̀tɔɔa gã̀agãa. 40Akũ ò vùtɛvutɛ gã̀ kũ gã̀ao, gã̀ kenɔ gbɛ̃nɔn basɔɔro, gã̀ kenɔ gbɛ̃nɔn bupla akuri. 41Akũ Yesu burodi mɛ̀n sɔɔro kũ kpɔ̀ɔo mɛ̀n pla pìioo sɛ̀ à wɛ́ sɛ̀ musu à arubarikaa dàn. Akũ à burodii pìi ɛ̀'ɛ à kpà a ìbanɔa, ò kpàatɛtɛ gbɛ̃nɔnɛ. Akũ à kpɔ̀ mɛ̀n pla pìnɔ kpàatɛtɛńnɛ ń pínki. 42Ò pɔ́ blè ò kã̀ ń pínki. 43Akũ ò burodi kpara kũ kpɔ̀ kpara kũ à gɔ̃̀nɔ sɛ̀tɛ tãnko mɛ̀n kuri awɛɛpla pà. 44Gɔ̃gbɛ̃ kũ ò pɔ́ blènɔ kà gbɛ̃nɔn dúbu sɔɔro.

Yesu táa'ona sɛ̀bɛla

(Mat 14:22-36; Yuh 6:16-21)

45Yesu gã nà a ìbanɔa gɔ̃̀nɔ ò gɛ̃ gó'itɛn, de ò donɛ arɛ gɛna Bɛtɛsaida ari àgɔ̃ pari gbarɛ. 46Kũ à lɛ́ zàḿma, akũ à dìdi kpi musu à gɛ̀ɛ adua kɛ. 47Kũ ɔkɔsi kɛ̀ gó'itɛ kú sɛ̀bɛɛ dagura, Yesu sɔ̃ à kú í bara ado. 48Akũ à è gófĩna tɛn wari dɔḿma, kũ ĩa gbãna tɛn kákańyĩ yãi. Gudɔnaao à gɛ̀ɛ ń kĩnaa àtɛn táa o íla, akũ à kɛ̀ deran á ye à gɛ̃tɛḿma bà. 49Kũ ò a è àtɛn táa o íla, òtɛn da gyãwãndemɛ, akũ ò wiki lɛ̀. 50Zaakũ ò a è ń pínki, akũ swɛ̃̀ɛ kɛ̃̀ńgu. Akũ Yesu pìńnɛ gɔ̃̀nɔ: À á laakari kpátɛ, makũmɛ. Àsun tó vĩna á kũro. 51Kũ à gɛ̃̀ gó gũn, akũ ĩa zɛ̀, akũ yã pìi bò ń sarɛ manamana, 52zaakũ ń wɛ́ dí kɛ̃ burodi yãaro kũ laasun kĩ̀aḿma yãi.

Yesu gyãrenɔ werekɔ̃ana zaa Gɛnɛsarɛti

(Mat 14:34-36)

53Kũ ò bikũ̀ bara, ò kà Gɛnɛsarɛti, akũ ò ń gó bàa dɔ̀ gwe. 54Kũ ò bɔ̀tɛ gó gũn, ò Yesu dɔ̃̀ gɔ̃̀nɔ, 55akũ ò bàa lɛ̀ ò gɛ̀ɛ bùsuu pì lakutu pínkin, ò gyãrenɔ sɛ̀tɛ kũ wútɛbɔnɔ, gu kũ ò mà à kunwa pínki òdigɔ̃ su kũńwo a kĩnaa. 56Gu kũ à gɛ̀ɛn pínki, lakutunɔ ke wɛ̃tɛnɔ ke buranɔ, òdigɔ̃ sunɛ kũ gyãrenɔ ari ò ń kátɛ ɛtɛnɔn, akũ òdi wɛ́ kɛa de ò ɔ na bee a uta lɛ́a. Akũ gbɛ̃ kũ ò ɔ nàanɔ wèrekɔ̃a ń pínki.

Currently Selected:

MAAKU 6: BB2005

Highlight

Copy

Compare