MAAKU 5

Tãnanɔ gbarɛna alɛdɛnɔa

(Mat 8:28-34; Luk 8:26-39)

1Ò kà Gadara bùsun sɛ̀bɛɛ bara. 2Kũ Yesu bò gó gũn gɔ̃̀nɔ, tãnade ke bò gɛ̀vĩkia à sù à dàalɛ. 3Àdigɔ̃ kú gbɛ̀wɛɛ kũ à de mira ũnɔ gũn. Bee mɔ̀kakɔ̃anaa dì fɔ̃ à a yĩ̀ doro. 4Zaakũ òdi a yĩ kũ mɔ̀kakɔ̃anaaomɛ òdi a da lín baala'i, ama àdi mɔ̀ɔ pìnɔ kɛ̃kɛ̃ àdi lí pìnɔ gborogboro. Gbɛ̃ke dì a gbãna fɔ̃ro. 5Gwãani kũ fãnantɛ̃o pínki àdigɔ̃ kure gɛ̀vĩkin kũ sĩ̀sĩgɛrɛnɔo, àdigɔ̃ wiki lɛ́ àdigɔ̃ a zĩda líli kũ gbɛ̀ɛo.

6Kũ à Yesu è zãa, akũ à bàa lɛ̀ à sù à kùtɛ a arɛ. 7-8Kũ Yesu pì tãna pì goa, akũ à wiki gbãna lɛ̀ à pì: Yesu, Luda Musude Nɛ́, bɔ́n ó vĩ kɔ̃ ɔĩi? Ma nannɛ Ludai, ǹsun wɛ́ tãmaro. 9Akũ Yesu a là à pì: N tɔ́n deraa? Akũ à wèa à pì: Ma tɔ́n Dasi, zaakũ ó dasi. 10Akũ ò kútɛ kɛ̀ Yesunɛ manamana ò pì àsun pɛ́ḿma bùsuu pìi gũnlo.

11Alɛdɛ kpàsa zɔ̃kɔ̃ kú gwe, òtɛn pɔ́ ble sĩ̀sĩgɛrɛɛi. 12Akũ tãna pìnɔ wɛ́ kɛ̀ Yesua ò pì: Ǹ ó gbarɛ alɛdɛnɔ tɛ́ ò diḿma. 13Yesu ń gbá zɛ́, akũ tãna pìnɔ gòa ò dì alɛdɛɛ pìnɔa. Akũ alɛdɛ kpàsa kũ à kà wàa kuri taka pìnɔ bò kũ bàao ò sòro sĩ̀sĩgɛrɛɛi ò sì sɛ̀bɛn, akũ ò gàga gwe. 14Akũ alɛdɛdãrinɔ bàa lɛ̀ ò gɛ̀ɛ yã pì bàbańnɛ wɛ̃tɛ gũn kũ buranɔ. Akũ gbɛ̃nɔ bɔ̀tɛ ò gɛ̀ɛ yã kũ à kɛ̀ɛ pì gwa. 15Kũ ò sù Yesu kĩnaa, ò gɔ̃gbɛ̃ kũ tãna kú a gũn dasi yã pìi è vutɛna gwe, à uta dana à bã̀nn pìi wèrea, akũ vĩna ń kũ. 16Gbɛ̃ kũ ò yã pìi è kũ wɛ́onɔ yã kũ à tãnade pì lèe òńnɛ kũ alɛdɛnɔ yão. 17Akũ ò kútɛ kɛ̀ Yesunɛ kũ à bońnɛ ń bùsun.

18Kũ Yesu tɛn gɛ̃ gó'itɛn, gɔ̃gbɛ̃ kũ à tãnanɔ vĩ yã pì wɛ́ kɛ̀a de à le à tá kãao. 19Yesu dí wero à pìnɛ: Ǹ tá n bɛa n gbɛ̃nɔ kĩnaa, ǹ yã kũ Dikiri kɛ̀nnɛ ońnɛ pínki, dera à n wɛ̃nda bò nà. 20Akũ gɔ̃gbɛ̃ pìi tà, àtɛn yã kũ Yesu kɛ̀nɛ kpàkpa kɛ Wɛ̃tɛmɛnkuri bùsun, akũ yã pìi bò gbɛ̃ sĩnda pínki sarɛ.

Yairu nɛ́ vuna kũ nɔgbɛ̃ kũ à ɔ nà Yesu utaaao

(Mat 9:18-26; Luk 8:40-56)

21Yesu ɛ̀ra à bikũ̀ sɛ̀bɛɛ bara kũ góo, akũ pari kàkarai sɛ̀bɛ lɛ́a. 22Aduakɛkpɛ gbɛ̃ zɔ̃kɔ̃ kũ òdi pinɛ Yairu sù gwe. Kũ à Yesu è, à wùtɛ a kùaa a gbá sarɛ, 23akũ à kútɛ kɛ̀nɛ manamana à pì: Ma nɛ́nɔgbɛ̃ kú ga lɛ́i. Ǹ mɔ́ ǹ ɔ naa de à gbãna kũ àgɔ̃ kú wɛ̃̀ndiio. 24Akũ Yesu dà zɛ́n kãao. Pari tɛ́i òtɛn nakaraa.

25Nɔgbɛ̃ ke kú gwe aru dì bɔtɛa à kà wɛ̃̀ kuri awɛɛpla. 26Ɛzɛdenɔ a kɛ̀ takaside ũ manamana, à a ɔgɔ dɛ̀ pínki. Adi aafia lero, àdi kɛkɛ àgɔ̃ karamɛ. 27Kũ à Yesu baaruu mà, akũ à nà Yesui pari gũn kpɛ kpa. Akũ à ɔ nà a utaa, 28zaakũ à pì: Bee tó ma ɔ nà a utaa dé, mani werekɔ̃a. 29Akũ a arubɔtɛnaa pìi zɛ̀ gɔ̃̀nɔ. À dɔ̃̀ a mɛ̀ɛ gũn a werekɔ̃a kũ a gyã pìio. 30Zaa gwe gɔ̃̀nɔ Yesu dɔ̃̀ a mɛ̀ɛ gũn gbãna ke bò a gũn, akũ à lìtɛ pari gũn à pì: Dí mɛ́ à ɔ nà ma utaaa? 31Akũ a ìbanɔ pìnɛ: N è lákũ gbɛ̃nɔ tɛn nakaramma nà, akũ n pì dí mɛ́ à ɔ nàmma yá? 32Akũ Yesu gbɛ̃nɔ gwà à lìkai de à gbɛ̃ kũ à yã pìi kɛ̀ e. 33Vĩna nɔgbɛ̃ pìi kũ̀ àtɛn lukaluka, zaakũ à dɔ̃ yã kũ à a lè a mɛ̀ɛ gũn, akũ à sù à wùtɛ a kùaa a gbá sarɛ à a yãpura ònɛ pínki. 34Akũ Yesu pìnɛ: Nɔgbɛ̃, ma náani kũ n kɛ̀ mɛ́ à n werekɔ̃a. Ǹ tá bɛ aafia, n gyã pìi kɛ̃̀mman gwe.

35Kũ Yesu kpɛ́ àtɛn yã o, ò bò aduakɛkpɛ gbɛ̃ zɔ̃kɔ̃ɔ pì bɛa ò sù ò ònɛ: N nɛ́ pìi kɛ̀ sari, ǹsun wari dɔ dannɛriia doro. 36Yesu dí sã kpá ń yãiro, ben à pì gbɛ̃ zɔ̃kɔ̃ɔ pìinɛ: Ǹsun tó swɛ̃̀ kɛ̃nguro, ǹ ma náani kɛ dé. 37Adi we gbɛ̃ke gɛ́ zɛarɛro, sé Pita kũ Yamisio kũ Yamisi dakũna Yuhanao. 38Kũ ò kà gbɛ̃ zɔ̃kɔ̃ɔ pì bɛa, Yesu è òtɛn ɔ́ɔ dɔ òtɛn wiki gbãna lɛ́ òtɛn ń zĩda kɛ̃kɛ̃ manamana. 39Kũ à gɛ̃̀ kpɛ́n, à ń lá à pì: Bɔ́yãi átɛni á zĩda kɛ̃kɛ̃ átɛn ɔ́ɔ dɔɔ? Nɛ́ pì dí garo, àtɛn i omɛ. 40Kũ òtɛni a lalandi kɛ, akũ à pɛ̀ḿma ò bɔ̀tɛ bàai ń pínki. Sé nɛ́ pì de kũ a dao kũ a ìba kũ ò kú kãaonɔ, mɔ́kɔ̃nɔmɛ à ń sɛ́ à gɛ̃̀ kũńwo gu kũ nɛ́ pì kunwa. 41Akũ à nɛ́ pì ɔ kũ̀ à pìnɛ: Talita kum! Yã pìi pì, nɛ́nɔkpare, ǹ futɛ. 42Zaa gwe gɔ̃̀nɔ nɛ́ pìi fùtɛ à táa ò. Nɛ́ pì sɔ̃ à kà wɛ̃̀ kuri awɛɛpla. Yã pìi bò ń sarɛ manamana. 43Akũ Yesu gìńnɛ sãnsãn òsun o gbɛ̃ke maro. Akũ à pì ò pɔ́ble kpáa à ble.

Currently Selected:

MAAKU 5: BB2005

Highlight

Copy

Compare