MAAKU 11

Gbãnakɛkpana Yesui Yurusalɛmu

(Mat 21:1-11; Luk 19:28-40; Yuh 12:12-19)

1Kũ ò kà kãni kũ Yurusalɛmuo, ò kà Bɛtɛfage kũ Bɛtani kũ à kú Kùkpɛ sĩ̀sĩgɛrɛɛiio, akũ Yesu a ìbanɔ zĩ̀ gbɛ̃nɔn pla 2à pìńnɛ: À gɛ́ lakutu kũ à kátɛ á arɛ dire gũn. Tó a gɛ̃ gɔ̃̀nɔ, áni zaakinɛ bɔ̀rɔ e bàdɔna gwe, gbɛ̃ke dí dia zikiro. À poro à suo. 3Tó ò á lá ò pì, bɔ́n átɛn kɛ gwe, à pi Dikiri mɛ́ à yei, ani ɛra à suo tera. 4Akũ ò gɛ̀ɛ ò zaaki è bàdɔna kpɛ́lɛlɛ bàai. Kũ òtɛn poro, 5akũ gbɛ̃ kũ ò zɛ gwenɔ ń lá ò pì: Bɔ́n átɛn kɛ kũ zaaki pìio kũ átɛn poroo? 6ò wèḿma lákũ Yesu òńnɛ nà, akũ ò ń tó ò táo. 7Ò sù kũ zaaki pìio Yesunɛ, ò ń utanɔ kpàtɛa, akũ Yesu dìa. 8Gbɛ̃nɔ tɛni ń utanɔ kpátɛ zɛ́ gũn dasi, gbɛ̃kenɔ tɛn lánɔ zɔ̃ sɛ̃̀n òtɛn kpátɛ dɔ. 9Gbɛ̃ kũ ò tɛ́ arɛnɔ kũ gbɛ̃ kũ ò tɛ́ kpɛnɔ tɛn wiki lɛ́ òtɛn pi:

Ǹ gbãna kɛ!

Arubarikaden gbɛ̃ kũ àtɛn su kũ Dikiri tɔ́o ũ.

10Luda arubarika da ó dizi Dauda kpata kũ àtɛn bo gupuraan.

Ò gbãnakɛ kpái ari ludambɛ.

11Kũ Yesu kà Yurusalɛmu, à gɛ̃̀ Luda ɔnn, akũ à pɔ́ sĩnda pínki gwà à lìkai. Kũ ifãntɛ̃ tɛn gɛ̃ kpɛ́n yãi, akũ à bò à gɛ̀ɛ Bɛtani kũ a ìba gbɛ̃nɔn kuri awɛɛplanɔ.

Yesu láaribona kaka lía kũ a kunna Luda ɔnnwo

(Mat 21:12-22; Luk 19:45-48; Yuh 2:13-22)

12Kũ gu dɔ̀, ò bò Bɛtani, akũ nà tɛn Yesu dɛ. 13À kaka lí è zã̀ dire a lá kù. Akũ à gɛ̀ɛ gwa ke tó à nɛ́ vĩ. Kũ à kà gwe, adi pɔ́ke lero, sé a lánɔ, zaakũ kaka gɔrɔ dí ká kɔ̀ro. 14Akũ à pì lí pìinɛ: Gbɛ̃ke ni n nɛ́ ble ziki doro. A ìbanɔ yã pìi mà.

15Kũ ò kà Yurusalɛmu, Yesu gɛ̃̀ Luda ɔnn, akũ à pɛ̀ ɛtɛblerinɔa kũ lagatarinɔ à ń bɔ́tɛ. À ɔgɔlilinkɛrinɔ teburunɔ kũ potɛ̃nɛyarinɔ gbànɔ yĩ̀pa à kɔ̀tɛńnɛ. 16Adi we gbɛ̃ke a aso sɛ̀ à gɛ̃̀tɛo Luda ɔnnlo. 17Akũ à yã dà gbɛ̃nɔnɛ à pì: Ò kɛ̃̀ Luda yãn ò pì: Ma kpɛ́ nigɔ̃ de aduakɛkpɛ ũ buri sĩnda pínkinɛ, akũ a kɛ̀ gbɛ̃blerinɔ tò ũ. 18Sa'orikinɔ kũ ludayãdannɛrinɔ yã pìi mà, akũ òtɛn zɛ́ wɛtɛ ò a dɛ. Òtɛn vĩna kɛnɛ, zaakũ a yãdannɛnaa bò gbɛ̃ sĩnda pínki sarɛ. 19Kũ ɔkɔsi kɛ̀, akũ Yesu kũ a ìbanɔ bɔ̀tɛ wɛ̃tɛ pìi gũn.

20Kũ gu dɔ̀, òtɛn gɛ̃tɛ, akũ ò kaka lí pìi è à kori kɛ̀ kũ a zĩnio. 21Akũ à yã dɔ̀ Pitan, akũ à pì Yesunɛ: Rabi, ǹ kaka lí kũ n láari bòa gwa, à kori kũ̀. 22Yesu wèḿma à bè: Àgɔ̃ Luda náani vĩ. 23Yãpuran matɛn oárɛ, tó gbɛ̃ ò kpi dínɛ à futɛ à a zĩda sɛ́ à zu sɛ̀bɛn, tó ádi sika kɛ a nɛ̀sɛɛ gũnlo, tó à náani vĩ kũ yã kũ à òo pì ni kɛ, ani kɛnɛmɛ. 24Abire yãi matɛn oárɛ, tó átɛn adua kɛ, yã kũ a a wɛ́ kɛ̀ pínki, à ditɛ à gĩnakɛ a lè kɔ̀, áni le sɔ̃. 25Tó a futɛ átɛn adua kɛ, tó á nɛ̀sɛ vãni kũna kũ gbɛ̃keo, à kɛ̃nɛ, de á De kũ à kú musu á durunnanɔ kɛ̃árɛ dɔ. 26Tó ádi gbɛ̃nɔ kɛ̃ sɔ̃ro, á De kũ à kú musu ni á durunnanɔ kɛ̃árɛ sero.

Yesu gbɛkana a ikooi

(Mat 21:23-27; Luk 20:1-8)

27Akũ ò kà Yurusalɛmu. Lákũ Yesu tɛn kure Luda ɔnn nà, sa'orikinɔ kũ ludayãdannɛrinɔ kũ gbɛ̃ zɔ̃kɔ̃nɔ sù 28ò a la ò pì: Iko kpaten ntɛn yã dínɔ kɛoo? Dí mɛ́ à n gba yã pì kɛna ikoo? 29Akũ Yesu wèḿma à pì: Yã mɛ̀n don mani gbɛkaáwa. À wema, mani iko kũ matɛn yã dínɔ kɛo oárɛ. 30À omɛnɛ. Yahaya gbɛ̃nɔ da'itɛkɛnaa bò Luda kĩnaan yá, ke bisãsiri kĩnaamɛ? 31Akũ ò yã gɔ̃̀gɔ̃ ò pì: Tó o pì Luda kĩnaamɛ, ani ó lá bɔ́yãin ódi Yahaya yã síroo? 32Tó o pì bisãsiri kĩnaamɛ sɔ̃, tɔ̀! Ò gbɛ̃nɔ vĩna vĩ, zaakũ gbɛ̃ sĩnda pínki Yahaya annabikɛ sì. 33Akũ ò wè Yesua ò pì: Ó dɔ̃ro. Akũ Yesu pìńnɛ: Ɛ̃hɛ̃ makũ se, mani iko kũ matɛn yã dínɔ kɛo oárɛro.

Currently Selected:

MAAKU 11: BB2005

Highlight

Copy

Compare